शिवाकोटी हत्याका आरोपित सानो धने अमेरिकी ग्रीन कार्डहोल्डर भएको प्रहरी आशंका

शिवाकोटी हत्याका आरोपित सानो धने अमेरिकी ग्रीन कार्डहोल्डर भएको प्रहरी आशंका

A+ A A-

१८ वर्षअघि बीभत्स हत्या गरिएका अर्जुन भनिने खिमबहादुर शिवाकोटीको हत्याका एक जना आरोपित अझै पक्राउ परेका छैनन् । दोलखाको भीमेश्वर नगरपालिका– ३१ का शिवाकोटीको २२ पुस २०६१ मा हत्या भएको थियो ।

शिवाकोटीको हत्या भएको १७ वर्षपछि १५ असोजमा प्रहरीले एक जनालाई पक्राउ गरेको थियो । अर्का आरोपित भने अझै 'फरार' छन् ।

गत वर्ष काठमाडौं प्रहरीले शिवाकोटीको हत्याको आरोपमा प्युठान साविक खलङ्गा गाविस घर भई हाल काठमाडौंको धुम्बाराही बस्ने ४१ वर्षीय शनिनरसिंह राणालाई पक्राउ गरेको थियो । पक्राउ परेका राणा जिल्ला अदालत काठमाडौंको आदेशले पुर्पक्षका लागि जेल चलान भएका छन् । मुद्दा निकारा लाग्न भने अझै बाँकी छ । हाल उनी डिल्लीबजार कारागारमा छन् ।

पक्राउ परेका शनिनरसिंह राणा

शिवाकोटीको हत्यामा संलग्न अर्का आरोपित गोरखा सिरानाचोक गाउँपालिका–५ का ‘सानो धने कामी’ भनिने धनबहादुर गुरुङ भने अझैसम्म फरार छन् ।

प्रहरीका अनुसार शिवाकोटीलाई राणा र गुरुङले उनकै छापाखानाअगाडि मोटरसाइकल पार्किङ गर्दा उत्पन्न सामान्य विवादको विषयमा कुटेर हत्या गरेका थिए । त्यसबेला उनीहरू बा १६ प ८६५४ नम्बरको बुलेट मोटरसाइकलमा शिवाकोटीको छापाखाना पुगेको प्रहरीले जनाएको छ ।

उक्त मोटरसाइकल ईश्वरी राणाको नाममा रहेको खुलेको थियो । प्रहरीले ईश्वरीको पनि खोजी गरेको थियो । तर, हालसम्म पनि पक्राउ गर्न सकेको छैन ।

पक्राउ परेका शनिनरसिंहले ईश्वरी आफ्नी फुपू रहेको बयान प्रहरीलाई दिएका थिए । शनिनरसिंह पक्राउ पर्नु केही समयअगाडि ईश्वरीले बानेश्वरमा रहेको आफ्नो घर ४ करोड रुपैयाँमा बिक्री गरेको र त्यसयता सम्पर्कमा नरहेको प्रहरीको दाबी छ ।

कहाँ छन् ‘सानो धने कामी’ ?

शिवाकोटीको १८ वर्षअघि भएको हत्या मुद्दामा लामो अनुसन्धानपछि प्रहरीले शनिनरसिंहलाई पक्राउ गरेको थियो । तर, ‘सानो धने कामी’ भन्ने धनबहादुर गुरुङलाई भने प्रहरीले अझै पनि पक्राउ गर्न सकेको छैन ।

प्रहरीस्रोतका अनुसार उनी हाल अमेरिका छन् । उनीमाथि प्रहरीले अन्तर्राष्ट्रिय प्रहरी सञ्जाल इन्टरपोलमार्फत रेड नोटिस जारी गरेर पक्राउ गर्ने तयारी थालेको छ ।

२ वैशाख ०७८ मा जिल्ला अदालत काठगमाडौंले उनको नाममा ३५ दिने पक्राउ पुर्जी बेपत्ते तामेल भएर फिर्ता आएको र आफैँ अदालतमा हाजिर हुन सूचना निकालेको थियो ।

काठमाडौं जिल्ला अदालतबाट जारी भएको पक्राउ पुर्जी ।

तर, सूचना निकालेको चार महिनासम्म पनि उनी सम्पर्कमा आएका छैनन् । उनले अमेरिकी ‘ग्रीन कार्ड’ लिएको आशंका प्रहरीको छ ।

प्रहरीको रेकर्डअनुसार शिवाकोटीको हत्याबाहेक गुरुङ विभिन्न आपराधिक गतिविधिमा संलग्न थिए । उनी गुण्डागर्दीमा संलग्न राजु गोर्खाली समूहका एक महत्त्वपूर्ण सदस्य थिए ।

०५९ मा दरबारमार्गको रोयल डिस्कोमा राकेश लिम्बुमाथि गोर्खालीले खुकुरी प्रहार गरेर हत्या गर्दा धने गुरुङसमेत उनीसँगै थिए । लिम्बू हत्या अभियोगमा गोर्खाली १० वर्ष जेल बसेर छुटिसकेका छन् ।

गोर्खाली समूहका धनेबारे अनुसन्धान गर्न प्रहरीले गोर्खालीसहित अर्का गुण्डा नाइके चक्र गुरुङ ‘चक्रे मिलन’लाईसमेत सोधपुछ गरेको थियो ।

चक्रे मिलनले शिवाकोटी हत्यामा धने र राणाकै संलग्नता रहेको सनाखत प्रहरीलाई गरेका छन् । ०६१ अघि शनिनरसिंह राणाले शम्भु राणाको परिचय दिने गरेको समेत खुलेको थियो ।

शिवाकोटी हत्या हुँदा उनी राणा र गुरुङ एक मोडल युवती भेट्न शिवाकोटीको छापाखानाअगाडि पुगेको खुलेको थियो । हाल ती मोडलसमेत अमेरिकामै छिन् ।

राणाले हत्या अभियोगबाट जोगिन दुई वटा कीर्ते नागरिकता बनाएको समेत खुलेको थियो । राणाले भोजपुरबाट दिलीप केसीको नामबाट र जिल्ला प्रशासन कार्यालय काठमाडौंबाट अर्कै नामको नागरिता लिएको खुलेको थियो । उनीमाथि किर्ते मुद्दा पनि चलेको थियो ।

प्रकाशित मिति: आइतबार, साउन २२, २०७९ १४:४८