२६ बैंकको विवरण : खराब कर्जा असुलीले बढ्याे नाफा, औसत वृद्धिदर ३४ प्रतिशत

A+ A A-

आर्थिक वर्ष २०७८/७९ मा सञ्चालनमा रहेका २६ वाणिज्य बैंकको खुद नाफा ७४ अर्ब ८० करोड १४ लाख पुगेको छ । आर्थिक वर्ष २०७७/७८ मा सञ्चालनमा रहेका बैंकहरूले कमाएको जम्मा खुद नाफा र गत आर्थिक वर्षको नाफालाई रकमगत आधारमा हेर्ने हो भने २३ दशमल १४ प्रतिशत नाफा वृद्धिदर देखिन्छ ।

यो बीचमा नेपाल बंगलादेश बैंक नबिल बैंकसँग गाभिएको छ । अहिले सञ्चालनमा रहेका २६ बैंकको गत आर्थिक वर्षसँग औसत नाफा तुलनामा गर्ने हो भने ३४ प्रतिशत देखिन्छ । यो जम्मा नाफा रकमको आधारमा नभई वृद्धिदरको औसत मात्रै हो ।

गत आर्थिक वर्षमा कुनै पनि बैंक अर्ब क्लबभन्दा तल रहेनन् । तर, लगानी प्रतिफल अर्थात् कुल सम्पत्तिलाई आधार मानेर बैंकको नाफा हेर्ने हो भने यस्तो प्रतिफल बढ्न सकेको छैन ।

रकमगत आधारमा आर्थिक वर्ष २०७७/७८ मा २० प्रतिशतको नाफा बढाएका बैंककाे त्यसभन्दा अघिल्लाे आर्थिक वर्ष अर्थात् २०७६/७७ मा भने १२ प्रतिशत नाफा घटेको थियो ।

कोभिडको असरले बैंकको ऋण नउठेका कारण खराब कर्जा (तोकिएको समयमा नउठेको रकम) बढी भयो । असुली नभएको कर्जाबापत बैंकले तोकिएको प्रतिशतमा पैसा छुट्याएका हुन्छन् । भविष्यमा कर्जा असुली भए यसअघि बैंकले व्यवस्था गरेको रकम पुनः नाफा कोषमा फर्किन्छ ।

अहिले यस्तै रकम बैंकिङ सिस्टममा फर्किएको अर्थात् रिटर्न ब्याक भएका कारण नाफा उल्लेख्य बढेको देखिएको हाे । रकमगत आधारमा र वृद्धिदरका आधारमा सबैभन्दा बढी नाफा गर्ने राष्ट्रिय वाणिज्य बैंक, सिभिल बैंक र सेञ्चुरी बैंकको ठूलो हिस्सा यस्तै रकम रहेकाे छ ।

सेञ्चुरी बैंकको अघिल्लो वर्ष ६३ करोड एडिसनल रकम गएको मा यो वर्ष १३ करोड राइट ब्याक भएको कारण ७६ करोडको नाफा यसै कारणले बढेको देखिएको हाे । त्यस्तै, सिभिल बैंकको पनि यस्तो रकम ३९ करोड रुपैयाँ देखिएको छ ।

७४ अर्बको नाफा, कसको कति (कराेडमा)

१४ अर्ब ५ करोड नाफा बढ्दा कसले कति बढाए ?

औसत नाफा वृद्धिदर ३४ प्रतिशत पुग्दा कृषि विकासको २४ प्रतिशत घट्यो

सिभिल र सेञ्चुरीको उछाल

सिभिल बैंकले सर्वाधिक धेरै १६२ प्रतिशतले नाफा वृद्धि गरेको छ । हिमालयन बैंकसँग मर्जरमा जान लागेको यस बैंकले उल्लेख्य नाफा गर्दै गत आर्थिक वर्षमा १ अर्ब ३८ करोड रुपैयाँ नाफा गरेको हो । अघिल्लो आर्थिक वर्षमा जम्मा ५२ करोड रुपैयाँ नाफा गरेको थियो । सिभिल बैंकले गत आवमा ९६ अर्ब रुपैयाँ निक्षेप संकलन गरेर ८७ अर्ब रुपैयाँ कर्जा प्रवाह गरेको छ । बैंकको वितरणयोग्य नाफा १ अर्ब रुपैयाँ देखिएको छ । बैंकको प्रतिशेयर आम्दानी १५ दशमलव २६ रुपैयाँ पुगेको छ ।

सेञ्चुरी बैंकले गत आर्थिक वर्षमा १ अर्ब ३५ करोड रुपैयाँ नाफा गरेको छ । अघिल्लो वर्ष बैंकको नाफा ६२ करोड रुपैयाँ थियो । बैंकले ब्याज आम्दानीबाट ३ अर्ब २० करोड रुपैयाँ कमाएको छ । अघिल्लो वर्ष २ अर्ब ४३ करोड रुपैयाँ थियो ।

९ अर्ब ५३ करोड रुपैयाँ चुक्ता पुँजी रहेको सेञ्चुरी बैंकले गत वर्षको नाफाबाट शेयरधनीलाई वितरण गर्न मिल्ने नाफा ९१ करोड रुपैयाँ गरेको छ । गत वर्षको नाफाबाट मात्र बैंकले साढे ९ प्रतिशत लाभांश दिने क्षमता राख्छ ।

असार मसान्तसम्म बैंकमा ९८ अर्ब ९५ करोड रुपैयाँ निक्षेप तथा कर्जा ८८ अर्ब ८५ करोड रुपैयाँ छ । अघिल्लो वर्ष बैंकमा ९३ अर्ब ४९ करोड निक्षेप तथा कर्जा ७८ अर्ब थियो ।

प्रकाशित मिति: शनिबार, साउन २१, २०७९ १९:०४