यसरी बनेको थियो चिनियाँ नागरिकको अपहरण योजना

A+ A A-

चिनियाँ नागरिक याङ बुधबार साँझ लाजिम्पाटस्थित आफ्नै कोठामा एक्लै बसेका थिए । केही समयदेखि उनले दोभाषेका रूपमा ओखलढुंगा चिसङ्खुगढी गाउँपालिका–५ का सूर्यबहादुर राईलाई राखेका थिए ।

राई बुधबार दिउँसो याङलाई कोठामा छोडेर बेलुका ७ बजे कपुरधारा पुगे । त्यही बेला मोटरसाइकलमा गोरखा आरुघाटका कर्ण बहादुर गुरुङ, गोरखा सिरानचोकका लक्ष्मण गुरुङ, सर्लाही लालबन्दी नगरपालिका–११ का रोहित मगर, प्युठानका विशाल मगर, नुवाकोटका विनोद केसी र बर्दिया राजापुरका शिव सुनार एकसाथ राई भएको ठाउँमा पुगे ।

उनीहरूले राईलाई आफू प्रहरी भएको र चिनियाँ नागरिक बसेको ठाउँ लैजान दबाब दिए । राईलाई उनीहरूले हत्कडी र पेस्तोलसमेत देखाएका थिए । राईलाई लाग्यो– उनीहरू साँचिक्कैका प्रहरी नै हुन् ।

राईले उनीहरूलाई चिनियाँ नागरिक याङ बसेको कोठामा पुर्‍याए । उनीहरूले चिनियाँ नागरिकको कोठामा खानतलासी गरे । कोठामा भेटिएको ८ लाख नगद र २६ थान मोबाइल बोकेर उठे ।

थप अनुसन्धान आवश्यक भएको भन्दै याङ र राई दुवैलाई ट्याक्सीमा चढाए । उनीहरूलाई लाजिम्पाटबाट गोंगबु बसपार्कको न्यू स्वर्गद्वारी प्युठान होटल एण्ड लजमा पुर्‍याए । राई र याङलाई उनीहरूले गेस्ट हाउसको १०४ नम्बर कोठामा पुर्‍याए ।

कोठामा थुनेपछि भने उनीहरूले सकुशल जाने भए १ करोड रुपैयाँ फिरौती ल्याउन दबाब दिए । चिनियाँ नागरिक याङले आफ्नो साथीमार्फत रकम दिने आश्वासन अपहरणकारीलाई दिए । त्यसका लागि आफ्नो साथीलाई फोन गर्नुपर्ने सर्त याङको थियो । उनीहरूले याङलाई उनको साथीसँग कुरा गर्ने अनुमति दिए ।

तर, उनको साथीले १ करोड होइन, ५० लाख रुपैयाँ ल्याएर दिने बताए । १ करोडको डिल गरेका अपहरणकारी ५० लाखमै राजी भए । ५० लाख आउने आसमा उनीहरू होटलको कोठामै बसेका थिए ।

रकम बुझ्न जाँदा पक्राउ

याङका साथी ५० लाख रुपैयाँ बोकेर बसपार्क आउने विश्वासमा रहेका अपहरणकारीले यो सूचना प्रहरीसम्म पुगेको अनुमान नै गरेनन् । उनीहरूले याङको साथीलाई प्रहरीलाई खबर गरे याङको हत्या गर्ने धम्की पहिला नै दिइसकेका थिए ।

त्यसैले उनीहरू याङको साथी ५० लाख रुपैयाँ बोकेर याङलाई छुटाउन आउने आसमा बसे । उनीहरूले फोन गरेको २ घण्टापछि याङको साथीले ५० लाख रुपैयाँ बोकेर नयाँ बसपार्कको बीजी मलअगाडि पुगेको खबर याङलाई गरे ।

उक्त रकम बुझ्न लक्ष्मण गुरुङ र विनोद केसी बीजी मल पुगे । अन्य चार जना भने होटलको कोठामै चिनियाँलाई बन्धक बनाएर बसे । प्रहरी लिएर पुगेका याङका साथी अपहरणकारीलाई फिरौती दिन बीजी मल बोलाएर उनीहरूलाई पक्राउ गराउन सफल भए ।

सुरुमा ५० लाख रुपैयाँ फिरौती लिन पुगेका गुरुङ र केसीलाई नियन्त्रणमा लिएको प्रहरीले बाँकी चार जनालाई गेस्ट हाउसको कोठाबाटै नियन्त्रणमा लिएको हो ।

सम्बन्धित समाचार

चिनियाँ नागरिक अपहरणमा दुई प्रहरी पक्राउ- एक न्यायाधीशका पीएसओ, अर्का बालाजु वृत्तका घुमुवा

यसरी बनेको थियो अपहरणको योजना

पछिल्लो समय प्रहरीले उपत्यकाका विभिन्न ठाउँबाट अवैध कलसेन्टर सञ्चालन गरेको अभियोगमा धमाधम चिनियाँ नागरिकमाथि धरपकड गर्दै आएको छ । त्यही मौकामा उनीहरूले चिनियाँ नागरिकलाई धम्काए रकम असुल्न सहज हुने अनुमान उनीहरूको थियो ।

त्यसका लागि उनीहरूले चिनियाँ नागरिकको सहयोगीलाई निसाना बनाए । त्यही योजनाअनुसार उनीहरूले सूर्य राईलाई नियन्त्रणमा लिएर चिनियाँ नागरिकको अपहरण गरेको खुलेको काठमाडौं प्रहरी परिसरका प्रमुख (एसएसपी) भरतबहादुर बोहराको भनाइ छ ।

याङको अपहरणमा दुई जना प्रहरी कर्मचारी नै सहभागी भएका थिए । पक्राउ परेकामध्ये कर्णबहादुर गुरुङ र शिव सुनार प्रहरी कर्मचारी हुन् ।

गुरुङ पाटन उच्च अदालतका न्यायाधीशका पीएसओ हुन् भने सुनार प्रहरी वृत्त बालाजुका घुमुवा प्रहरी हुन् । चिनियाँ नागरिकको अपहरणको मुख्य योजनाकार भने लक्ष्मण गुरुङ र विनोद केसी भएको प्रहरीको दाबी छ ।

पक्राउ परेकामाथि मुलुकी अपराध संहिता २०७४ को परिच्छेद–१७ को अपहरण वा शरीर बन्धकसम्बन्धी कसुरमा जिल्ला अदालत काठमाडौंबाट पाँच दिनको म्याद थप गरेर अनुसन्धान भइरहेको परिसरका एसपी दिनेश मैनालीको भनाइ छ ।

प्रकाशित मिति: बिहीबार, साउन १९, २०७९ २०:५३