हेटौँडामा अटो र मयुरी नियन्त्रण गर्न टाँसियो स्टिकर, तर सरकारी निकायसँगै छैन तथ्यांक

हेटौँडामा अटो र मयुरी नियन्त्रण गर्न टाँसियो स्टिकर, तर सरकारी निकायसँगै छैन तथ्यांक

A+ A A-

हेटौँडा उपमहानगरपालिकामा हाल सञ्चालनमा रहेका अटो र मयुरीलाई नियन्त्रण गर्न हरियो स्टिकर टाँसिएको छ ।

बजारको सडक क्षमताभन्दा बढी अटो र मयुरी सञ्चालन भएका कारण ट्राफिक व्यवस्थापनमा समस्या निम्तिएपछि बिहीबारबाट स्टिकर टाँस गर्न थालिएको हो । हेटौँडा–११ थानाभर्‍याङस्थित जिल्ला ट्राफिक प्रहरी कार्यालयमा औपचारिक कार्यक्रम गर्दै हेटौँडाकी नगर प्रमुख मिनाकुमारी लामा, बागमती प्रदेश प्रहरी प्रमुख प्रहरी नायव महानिरीक्षक किरण बज्राचार्यलगायतले अटो र मयुरीमा स्टिकर टाँस गरेका छन् ।

अब हरियो स्टिकर भएका अटो र मयुरीमात्रै हेटौँडा नगरभित्र सञ्चालन हुन पाउने छन् । ट्राफिक प्रहरीले बिहीबार एक दिनमा ६९ वटा अटो र मयुरीमा स्टिकर टाँस गरेको जिल्ला ट्राफिक प्रहरी प्रमुख प्रहरी निरीक्षक मुनेन्द्र थापाले जानकारी दिए । उनका अनुसार शुक्रबारदेखि स्टिकर नटाँसिएका तथा हेटौँडा नगरभित्र सञ्चालन अनुमति नलिएका अटोहरूमा कारबाही सुरु गरिने भएको छ ।

बजारको सवारीचाप व्यवस्थापन गर्न उपमहानगरपालिकाले आफ्नो क्षेत्रभित्र सञ्चालन अनुमति प्राप्त तीन पाङ्ग्रे सवारी साधनलाई मात्र सञ्चालन अनुमतिसहितको स्टिकर प्रदान गरेको हो । पहिलो चरणमा तीन पाङ्ग्रे सवारी साधनलाई व्यवस्थित गर्न स्टिकर टाँस्ने काम गरेको मेयर लामाले बताइन् । ७ पुस २०७६ सालदेखि हेटौँडा उपमहानगर क्षेत्रमा थप तीन पाङ्ग्रे सवारीसाधन दर्ता अनुमति नदिने निर्णय गरेको थियो । उपमहानगरले यातायात कार्यालयलाई थप अटो र मयुरीलाई रुटपरमिट नदिन परिपत्र गरेको हो ।

सोही परिपत्रलाई टेकेर २०७६ सालअघि अनुमति पाएका अटो र मयुरीहरूलाई मात्रै सञ्चालनको अनुमति दिइने लामाले जानकारी दिइन् । तर, उपमहानगरले रुट परमिट नदिन यातयातलाई पत्र लेखेपछि व्यवसायीहरूले मकवानपुर जिल्लाभरको परमिट बनाएर सञ्चालन गरिरहेका छन् । कतिपय व्यवसायीहरूले बारा र पर्साको रुट परमिट लिएर अटो खरिद गरेपछि पुनः प्रतिलिपि परमिट बनाउँदा सेटिङमा मकवानपुरको परमिट पनि थप गर्न लगाएको जनाइएको छ ।

ट्राफिक प्रहरी प्रमुख थापाले २०७६ पुसपछि जुन स्थानको रुट परमिट लिए पनि नगरभित्र सञ्चालन गर्न नपाइने बताए । २०७६ पुसपछि विभिन्न पालिका तथा अन्यत्र जिल्लामा सञ्चालन अनुमति (परमिट) लिएर हेटौंडा बजार क्षेत्रमा अनधिकृतरुपमा सञ्चालन भइरहेका तीन पाङ्ग्रे सवारीसाधनलाई निषेध गर्ने गरी यो निर्णय गरिएको उपमहानगरका प्रवक्ता सविन न्यौपानेले बताए ।

कुनै निकायसँग छैन तथ्यांक
हेटाँैडामा हाल सञ्चालनमा रहेका अटो र मयुरीको तथ्यांक कुनै पनि सरकारी निकायसँग छैन् । उपमहानगरका सूचना अधिकारी भानुभक्त थपलियाले यकिन तथ्यांक नभएको बताए ।

सवारी दर्ता गर्ने निकाय यातायात व्यवस्था सेवा कार्यालय, हेटौंडाले पनि तथ्यांक दिन नसकेको थपलियाले बताए । ‘हामीले यातायात कार्यालयसँग तथ्यांक मागेका थियौं । उहाँहरूले पनि तथ्यांक दिन सकेनन् ।,’ थपलियाले भने । हेटौँडामा सडकभरी अटो र मयुरी बग्रेल्ती भेटिन्छन् । चोक–चोक र सडक छेउमै अटो र मयुरीका लाइन लागेका हुन्छन् । धेरै जसो बारा र पर्सामा दर्ता भएका अटो र मयुरी हेटौँडामा सञ्चालन रहेको अटो चालक नवराज ढुंगानाले बताए ।