जसको बयानका आधारमा त्रिभुवन विमानस्थलबाट समातिए लामिछाने

A+ A A-

काठमाडौंस्थित त्रिभुवन अन्तर्राष्ट्रिय विमानस्थलबाट पक्राउ परेका धनगढीका सुन व्यवसायी सन्तोष लामिछानेलाई कैलाली ल्याइएपछि अनुसन्धान सहज भएको छ ।

नेपाल सुनचाँदी व्यवसायी महासङ्घ, सुदूरपश्चिमका सभापतिसमेत रहेका लामिछानेलाई यसअघि पक्राउ परेका तीन जनाको बयानको आधारमा प्रहरीले पक्राउ गरेको हो ।

भारतको मुम्बईमा आफ्नी श्रीमती मिना सिजापति लामिछानेसँग उड्न तयार भएका उनी विमानस्थलबाटै समातिएका थिए । सन्तोषको बयानपछि उनकी श्रीमतीलाई भने छोडिएको छ ।

भारतबाट सुन चोरी गरी बिक्री गरेको अभियोगमा तीन जना समातिएपछि प्रहरीले लामिछानेलाई पनि पक्राउ हो ।

भारतका विभिन्न क्षेत्रबाट एक करोडभन्दा बढीको सुनचाँदी चोरी भएको सूचना पाएसँगै अनुसन्धान थालेको प्रहरीले लामिछानेलाई यसअघि पक्राउ परेका तीन जनाको बयानका आधारमा पक्राउ गर्न सफल भएको हो ।

तीन जना धनगढी र अत्तरियाबाट पक्राउ भए पनि प्रहरीले उनीहरूको नाम सार्वजनिक गरेको छैन । पक्राउ परेकामध्ये केही चोरीमा र केही चोरीका सामान व्यवस्थापनमा संलग्न रहेको प्रहरीको प्रारम्भिक अनुसन्धानबाट खुलेको छ ।

प्रहरीको केन्द्रीय अनुसन्धान ब्यूरोले बुधवार अन्तर्राष्ट्रिय विमानस्थलबाट धनगढीका सुनचाँदी व्यवसायी लामिछानेलाई पक्राउ गरेपछि थप तथ्य बुझ्न सहज भएको प्रहरीको भनाइ छ । कैलाली प्रहरीकै सूचनाको आधारमा मुम्बई उड्न लागेको नेपाल वायु सेवा निगमको जहाजबाट यात्रु ओरालेर २ जनालाई पक्राउ गरिएको थियो ।

प्रहरी स्रोतले अनुसन्धान जारी रहेकाले थप कुरा अनुसन्धानपछि मात्रै आउने बतायो । यो घटनामा अन्यको पनि संलग्नता हुन सक्ने प्रहरीको अनुमान छ ।

प्रकाशित मिति: बिहीबार, साउन १९, २०७९ १७:३७