अख्तियारका दुई पूर्वप्रवक्ता जनार्दनका अबका सारथी, क्याडरले जोडबल नगरेपछि पुष्करलाई सहज

अख्तियारका दुई पूर्वप्रवक्ता जनार्दनका अबका सारथी, क्याडरले जोडबल नगरेपछि पुष्करलाई सहज

A+ A A-

अन्तत: सरकारले अर्थसचिवको जिम्मेवारी कृष्णहरि पुष्करलाई दिएको छ भने राजस्व सचिवमा रामेश्वर दंगालललाई ल्याइएको छ । बिहीबार बसेकाे मन्त्रिपरिषद् बैठकले पुष्कर र दंगालललाई जिम्मेवारी दिने निर्णय गरेकाे हाे ।

जनार्दन शर्मा पुन: अर्थमन्त्री बनेपछि पुष्करले अर्थसचिवकाे जिम्मेवारी पाउने चर्चा पहिला नै थियाे ।

'नयाँ मन्त्री आउदा बैकुन्ठ अर्याल, अर्जुन पोखरेल वा केवल भण्डारी अर्थसचिवमा आउनुहुनेछ यदि जनार्दन फेरि मन्त्री बने भने लेखेर राखे हुन्छ कृष्णहरि अर्थसचिव हुन्छन्, राजस्वमा सचिवमा रामेश्वरले नै ठाउँ पाउछन्', एक सहसचिवले ११ साउनमा भनेका थिए । यो लविङ सायद पुष्करकै पनि थियो । आखिर त्यस्तै नै भयो ।

अर्थसचिवका लागि जोडबल गर्ने आधा दर्जन सचिव थिए । तर, जनार्दन नै अर्थमन्त्री बनेपछि अन्य सचिवहरूले खासै चासो नदेखाएको र पुष्करले भने जोड गरेका कारण उनलाई सहज भएको अर्थमन्त्रालय स्रोतको दाबी छ ।

संयोग राजस्व सचिवमा जिम्मेवारी पाएका रामेश्वर दंगाल र अर्थसचिवको जिम्मेवारी पाएका पुष्कर अख्तियार दुरूपयोग अनुसन्धान आयोगको प्रवक्ताको जिम्मेवारीबाट आएका पात्र हुन् ।

पुष्करले लोकमानसिंह कार्कीको कार्याकालमा अख्तियारको प्रवक्ताको जिम्मेवारी सम्हालेका थिए भने दंगाल नविन घिमिरेको पालामा अख्तियारको प्रवक्ता बनेका थिए ।

अर्को संयोग दुवै जना अर्थका खास क्याडर भने होइनन् । पुष्करले त सचिव बनेपछि मात्रै अर्थमा प्रवेश पाएका थिए ।सचिवमा बढुवा भएपछि एक महिना प्रधानमन्त्री तथा मन्त्रिपरिषद् कार्यालयमा काम गरेका उनी एक महिनापछि नै राजस्व सचिवको रुपमा अर्थमन्त्रालय प्रवेश गरेका थिए ।

उद्योग मन्त्रालय, वैदेशिक रोजगार विभाग, अख्तियार दुरुपयोग अनुसन्धान आयोग लगायतका निकायमा काम गरे पनि उनले अर्थको जिम्मेवारीमा काम गरेका थिएनन् । जहाँ बस्छन् त्यहाँ प्रमुखका विशेष र विश्वासिला पात्रका रुपमा आफूलाई सावित गर्ने गुण उनीसँग भएको उनका समकक्षीहरू बताउँछन् । मन्त्रीका रूपमा अफताब आलमदेखि टेकराज गुरुङ हुँदै जनार्दनसम्म आउँदा पनि उनी जहाँ पनि विश्वासिला पात्रका रुपमा गनिए ।

त्यस्तै रामेश्वर दंगालको पनि अर्थमा लामो समय अनुभव भने छैन । करिब एक वर्ष भन्सार विभागको प्रमुख बनेका उनी ७ महिना राजस्व महाशाखा प्रमुख बनेका थिए । राजस्व महाशाखा प्रमुख हुँदा पनि विष्णु फौडेलको पालामा बजेटमा कुनै पनि भूमिका उनले पाएका थिएनन् ।

अन्तत: त्यहाँबाट बाहिरिएर गण्डकी प्रदेशको अर्थसचिव बनेका थिए । सचिवमा बढुवा भएपछि सुदूरपश्‍चिम प्रदेश मुख्यमन्त्री कार्यालयको प्रमुख सचिसवको जिम्मेवारीमा रहेका उनलाई बिहीबारको मन्त्रिपरिषद् बैठकले राजस्व सचिवका रुपमा अर्थ मन्त्रालय भित्र्याउने निर्णय गरेको हो ।

अर्थतन्त्र अहिले पनि जोखिमबाट बाहिर नआएको अवस्थामा सचिवको जिम्मेवारी पाएका दुवै जनाको प्राविधिक ज्ञान कमजोर भएको अर्थका पूर्व अधिकारीहरूको भनाइ रहेको छ ।

'अहिले अर्थतन्त्र जोखिमपूर्ण अवस्थामा रहेको छ । प्राविधिक ज्ञान भएका र गरिएको काम र निर्णयको प्रभाव केलाएर नेतृत्वलाई सम्झाउन सक्ने किसिमका अर्थसचिवजमा हुनुपर्ने अवस्था हो', एक पूर्व अर्थसचिवले भने, 'उहाँहरू अर्थका यी विषयसँग खासै घुलमिल हुनु भएको छैन ।'

उनले थपे, 'मन्त्री छिटो निर्णय लिने र काम गरिहाल्ने भन्ने प्रकृत्तिको देखिनुहन्छ त्यसै कारणले पटकपटक विवादमा समेत आउनु भयो । सचिवले पनि सम्झाउन सकेन भने थप असहज बन्ने छ ।'

१५ साउनमा कृष्णहरिकाे सक्रियता

१५ साउन अर्थात् जनार्दन अर्थ मन्त्रालय फर्किएको दिन । करका दर हेरफेरको आरोपमा बाहिरिएका जनार्दन फर्कने दिन अर्थसचिव मधुकुमार मरासिनी, गभर्नर महाप्रसाद अधिकारी र अर्थकै एक सहसचिव स्वागतमा समेत आएनन् ।

तर, कृष्णहरिको सक्रियता भने निकै देखिएको थियो । उनले अर्थमन्त्री जनार्दन हुने पक्का भएसँगै स्वागतमा सबैजनालाई उपस्थित हुनका लागि समेत सर्कुलर गर्न निर्देशन दिएका थिए । आफू भने मन्त्रीको स्वागतमा भन्दै शीतल निवाससम्म पुगेका थिए ।

जनार्दनको पहिलो इनिङमा महालेखा नियन्त्रकको कार्यलयमा रहेका मधुकुमार मरासिनीको जस्तो सक्रियता देखिएको थियो १५ साउनमा कृष्णहरिकाे । सामान्यतया मन्त्रालयभित्र स्वागत गरिने गरे पनि अर्थमन्त्रीलाई लिन भन्दै उनी शीतल निवास नै पुगेका थिए । र मन्त्री आउनुभन्दा १० मिनेट अघि मन्त्रालय आएर फूल माला लिएर मन्त्रीको स्वागतमा बसेका थिए ।

उनले जनार्दन पुन: फर्कदा अर्थ मन्त्रालयको सिंगो टिम नै खुसी भएको बताउँदै 'लोक प्रिय बजेट' कार्यान्वयनमा आफूहरूको ध्यान हुने बताएका थिए ।

प्रकाशित मिति: बिहीबार, साउन २६, २०७९ २१:३५