आतंककारीको सदस्य भनिएका सन्तोष को हुन् ? के थियो अपराध ?

A+ A A-

काठमाडौंबाट बुधबार नेपाल एयरलाइन्सको न्यारो बडी आरए ३२० विमान मुम्बई उड्दै थियो । विमानमा चालक दलका सदस्यसहित १ सय ४१ जना यात्रु सवार थिए । तर, विमान उड्न केही समयअघि मात्रै प्रहरीको विशेष ब्युरोबाट विमानस्थल प्रहरीलाई खबर आयो, 'विमानमा केही शंकास्पद व्यक्ति चढेका छन् । केही समय होल्ड गर्नू ।'

सोही सूचनाका आधारमा प्रहरीले मुम्बई उड्न लागेको विमानमा सवार सबै यात्रुलाई ओराल्यो । सबैको टिकट हेरेर जाँच गर्‍यो । त्यतिबेलासम्म विमानस्थलमा हल्लीखल्ली नै मच्चिएको थियो । केही मिडियामा मुम्बई जान लागेको विमानमा आतंकवादी संगठनमा सामेल व्यक्ति सवार भनेर समाचार नै बन्यो ।

त्यही विमानबाट प्रहरीले दुई जनालाई नियन्त्रणमा लिएपछि भने विमान करिब २ घण्टा ढिलो उडेको छ । प्रहरीका अनुसार विमानबाट कैलालीका सन्तोष लामिछाने र उनकी श्रीमतीलाई प्रहरीले नियन्त्रणमा लिएको हो ।

को हुन् पक्राउ परेका लामिछाने ?

कैलाली प्रहरीका अनुसार सन्तोष लामिछाने सुनचाँदी व्यवसायी हुन् । उनको कैलाली धनगढी चौराहा– ३ स्थित सौगात सुनचाँदी गहना पसल छ । तर, उनी धनगढीमा भने खासै भेटिँदैनन् । उनको सुनचाँदी पसलमा उनकी श्रीमती बस्दै आएकी छिन् । लामिछानेको अधिकांश समय भारतको मुम्बई र कलकत्तामा बित्छ ।

प्रहरीका अनुसार बुधबारसमेत उनी मुम्बईमा सुनचाँदी व्यवसायीहरूको बैठकमा सहभागी हुन काठमाडौंबाट श्रीमतीसहित मुम्बई जान लागेका थिए । तर, प्रहरीले उनीमाथि निगरानी बढाएको थियो । लामिछाने भारत भाग्न लागेको आशंका गरेपछि प्रहरीले विमानस्थलबाटै नियन्त्रणमा लिएको हो । उनलाई अहिले प्रहरी वृत्त गौशालामा राखिएको छ ।

जिल्ला प्रहरी कार्यालय कैलालीका प्रहरी नायब उपरीक्षक (डीएसपी) वेदप्रसाद जोशीका अनुसार उनीमाथि भारतका विभिन्न ठाउँबाट करोडौँको सुन चोरीको आरोपमा उजुरी परेपछि प्रहरीले उनीमाथि निगरानी गरेको हो ।

‘लामिछानेमाथि भारतका विभिन्न ठाउँबाट करोडौँको सुन चोरीको उजुरी हामीलाई आएको थियो । सोही विषयमा अनुसन्धान गर्न हामीले विमानस्थल प्रहरीको सहयोग लिएका हौँ । आतंककारी संगठनसँग जोडिएको कुनै कुरा हामीले गरेका छैनौँ,’ डीएसपी जोशीले भने ।

प्रहरीका अनुसार लामिछानेले विभिन्न व्यक्तिलाई प्रयोग गरेर मुम्बईका सुन व्यवसायी र घरबाट सुन चोरी गरेर नेपाल भित्र्याउने गरेको खुलेको छ । प्रहरीले उनकी श्रीमतीलाई भने नियन्त्रणमा नराख्ने जनाएकाे छ ।

प्रकाशित मिति: बुधबार, साउन १८, २०७९ १९:०२