४३ जिल्लामा बाढी र पहिरोको प्रभाव, ३५ जनाले ज्यान गुमाए, तीन जना हराए

A+ A A-

उदयपुरको बेलका नगरपालिका– ८ स्थित जिरो पोइन्टबाट सप्तकोसी नदी मंगलबार रातिदेखि १, २ र ३ वडाको बस्तीमा बसेको छ । कोसीको बाढी बस्ती पस्दा सयौँ मानिस प्रभावित भएका छन् । केही घरहरूसमेत उच्च जोखिममा परेको छ । मंगलबार दिउँसैदेखि बाढी रोक्ने प्रयास गरिए पनि बुधबार बिहान सप्तकोसीले अस्थायी बाँध भत्काएर बाढी बस्ती पसेको हो ।

मंगलबार बिहान म्याग्दीमा पनि पहिरोमा पुरिएर एकै घरका पाँच जनाको ज्यान गएको थियो । मालिका गाउँपालिका– २ मा गएको पहिरोमा परेर ३८ वर्षीय घामबहादुर विक, उनकी श्रीमती ३४ वर्षीया राममाया विक, छोरा १५ वर्षीय नवीन विक, ३ वर्षीय छोरा राजन विक र ७ वर्षीया छोरी अस्मी विकको ज्यान गएको थियो ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रवक्ता डाक्टर डिजन भट्टराईका अनुसार देशभरका विभिन्न ठाउँमा आएको बाढी र पहिरोमा परेर ३५ जनाले ज्यान गुमाएका छन् । त्यस्तै तीन जना बेपत्ता भएका छन् ।

बाढीमा परेर ३९ जना घाइते भएको तथ्यांक प्राधिकरणसँग छ । जसमध्ये देशभरको ४३ वटा जिल्लामा बाढी र पहिरोको प्रभाव देखिएको छ । बाढी र पहिरोले ८२ घर पूर्ण रूपमा क्षति गरेको छ भने ६४ वटा घरमा आंशिक क्षति भएको छ । हालसम्म देशभर बाढीपहिरो प्रभावित २ हजार ६ सय व्यक्तिको उद्धार गरिएको प्राधिकरणले जनाएको छ ।

बाढीका कारण प्रभावितको उद्धारका लागि सशस्त्र प्रहरी बल, नेपाल प्रहरी र नेपाली सेनाको टोली तैनाथी अवस्थामा राखिएको छ । सशस्त्र प्रहरी बलले यो वर्षको मनसुनका कारण उत्पन्न हुने विपद् व्यवस्थापन गर्न विपद् व्यवस्थान तालिम केन्द्र कुरिनटारमा निरन्तर तालिम सञ्चालान गरिरहेको छ ।

तालिमप्राप्त जनशक्तिलाई प्रभावित जिल्ला खटाइएको सशस्त्र प्रहरी बल मुख्यालयले जनाएको छ ।

सशस्त्र प्रहरी बलले प्रदेश– १ को सुनसरी, बागमती प्रदेशको कुरिनटार र काठमाडौं उपत्यका, गण्डकी प्रदेशको पोखरा, लुम्बिनी प्रदेशको शमशेरगंज र सुदूपश्चिम प्रदेशको कैलालीमा उद्धार सामग्रीहरूसहित सशस्त्र प्रहरी बलको तालिमप्राप्त टोली तैनाथी अवस्थामा राखेको छ । सशस्त्र प्रहरीबाहेक नेपाल प्रहरी र सेनाले समेत तालिमप्राप्त टोली प्रभावित ठाउँमा राखेको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणको अध्यनअनुसार यस वर्षको मनसुन सकिँदासम्म २० लाख मानिस प्रभावित हुने आकलन गरेको छ । देशभर २३ जेठबाट मनसुन सक्रिय भएको हो । कुल प्रभावितमध्ये ५ लाख मानिसलाई उद्धार र राहतको व्यवस्था गर्नुपर्ने प्रक्षेपण रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत अनिल पोखरेलले बताउँदै आएका छन् ।

प्राधिकरणका अनुसार ललितपुर, भक्तपुरसहित धादिङ, नुवाकोट, तनहुँ, स्याङ्जा, पाल्पा, गुल्मी, अर्घाखाँची, इलाम, पाँचथर, धनकुटा, तेह्रथुम, ओखलढुङ्गा, सिन्धुपाल्चोक, बागलुङ, प्युठान, रोल्पा, रुकुम पश्चिम, दैलेख, अछाम र बैतडी पहिरोको उच्च जोखिममा छन् ।

त्यस्तै कैलाली, कञ्चनपुर, बाँके, बर्दिया, कपिलवस्तु, दाङ, सुर्खेत, चितवन, पूर्व नवलपरासी, पश्चिम नवलपरासी, रुपन्देही, उदयपुर, सप्तरी, सिरहा, धनुषा, महोत्तरी, सर्लाही, रौतहट, बारा, पर्सा, सुनसरी, झापा, मोरङ र सुनसरीलाई बाढीको उच्च जोखिममा राखिएको छ ।

यीसहित कुल ७२ जिल्ला बाढी र पहिरोको जोखिममा रहेको प्राधिकरणको भनाइ छ । विगतमा आउने बाढीपहिरो र मौसम पूर्वानुमानका आधारमा प्राधिकरणले जोखिमयुक्त जिल्लाहरू घोषणा गरेको हो । यो वर्ष केही जिल्लामा अत्यधिक पानी पर्ने आकलन प्राधिकरणको छ ।

गृह मन्त्रालयले विपद् प्रतिकार्य योजनासहित राहत र उद्धारको तयारी पनि गरेको छ । गृह मन्त्रालयअन्तर्गको प्राधिकरणले समेत यो वर्ष उद्धारमा स्वयम्‌सेवक परिचालन गर्ने जनाएको छ । त्यसका लागि स्थानीय तहमा युवाहरूलाई तालिम दिएर परिचालन गर्ने तयारी भइरहेको छ ।

विपद् व्यवस्थापन प्राधिकरणले चार जिल्लामा पूर्वसूचना प्रणालीबारे ‘पाइलट प्रोजेक्ट’ सञ्चालन गरिरहेको छ । बाग्लुङ, रसुवा, म्याग्दी र सिन्धुपाल्चोक जिल्लाका १७ वटा स्थानीय तहमा त्यस्तो सूचना प्रणाली सञ्चालन गरिएको छ । सो सूचनाका आधारमा सम्पर्क व्यक्तिहरूले माइकिङ र साइरन बजाएर सम्भावित बाढी र पहिरोबाट सजग रहन स्थानीयलाई जानकारी गराउन सहजीकरण हुनेछ ।

प्रकाशित मिति: बुधबार, साउन १८, २०७९ १३:११