दाइ र श्रीमतीलाई सम्बोधन गरेर दिनेशले लेखेको सुसाइड नोटमा के छ ?

A+ A A-

दिनेश पाण्डे परिवारकै बीभत्स हत्या भएकाे घटनास्थलबाट प्रहरीले ‘सुसाइड नोट’ फेला पारेको छ । पाँच पाना लामो सुसाइड नाेटमा मृतक पाण्डेले श्रीमती सुनिता पाण्डेका कारण आफूले नसाेचेको घटना गर्न बाध्य बनेको उल्लेख गरेका छन् ।

उनले सुसाइड नाेटमा लेखेका छन्, ‘प्यारी सुनिता तिमीले मेरो मर्मलाई कहिल्यै बुझिनौँ । मैले घरमा खाना नखाएको एक महिना भयो । योबारेमा तिमीलाई कहिल्यै मतलब भएन । अझ जति माया गर्दा पनि मेरो उल्टै बदनाम गरेर छोड्यौ । प्रहरीमा लिएर थुनाउन खोज्यौ ।’

उनले अगाडि लेखेका छन्, 'परिवार र तिम्रो खुसीका लागि विदेशमा दु:ख गरेर घर बनाएँ । तर, यसलाई मास्ने प्रयास गर्‍याै । मलाई एक्लै पार्न खोज्यौ ।’

त्योबाहेक पाण्डेले आफ्नो सुसाइड नोटमा आफ्ना दाइ राजेन्द्र पाण्डेसँग माफी पनि मागेका छन् । उनले आफ्ना दाइ पाण्डेलाई सम्बोधन गर्दै अन्त्यमा भनेका छन्, ‘श्रीमतीकै कारण मैले नसोचेको घटना गर्न पुगेँ । यहाँसम्म आइपुग्दा तपाईंको माया र स्नेहले म यो ठाउँमा पुगेँ । तर, श्रीमतीका कारण यो अवस्थामा पुगेँ । श्रीमतीसँगको झगडाबारे तपाईंलाई पनि थाहा नै छ । मेरो कारण तपाईंलाई केही दु:ख परेको भए माफी चाहन्छु । मैले नचाहँदा नचाहँदै पनि यो अवस्थामा पुगेँ ।’

प्रहरीको अनुसन्धानले समेत पाण्डे परिवारको हत्या आर्थिक र परपुरुषसँगको सम्बन्धका कारण भएको खुलाएको छ । पाण्डे परिवारले तारकेश्वरको आफ्नो घर बिक्री गर्ने तयारी गरेको र त्योबापतको १० लाख रुपैयाँ बैनासमेत दिएको खुलेको एक प्रहरी अधिकारीकाे भनाइ छ ।

पाण्डे परिवारको बीभत्स हत्या, केही दिनपछि बेलायत जाँदै थिइन् सुनिता

उक्त रकमसमेत बिनाकाम दिनेशकी श्रीमती सुनिता पाण्डेले मासेको आरोप दिनेशले लगाउने गरेको खुलेको छ । यही विषयमा उनीहरूबीच यसअघिसमेत पटक–पटक झगडा भएको खुलेको छ । घर झगडाबारे छलफल गर्न उनीहरू श्रीमान्‌/श्रीमती प्रहरी वृत्त बालाजुसमेत पुगेको देखिएको प्रहरी अधिकारीको भनाइ छ ।

१० वर्ष वैदेशिक रोजगारीका लागि कुवेत बसेका दिनेश चार वर्षअघि मात्रै नेपाल फर्किएका थिए । दिनेशले सुसाइड नोटमा समेत आर्थिक पाटो खुलाएको अनुसन्धानमा संलग्न एक प्रहरी अधिकारीले बताए ।

‘सुसाइड नोट’ भेटियो, आफन्तलाई म्यासेजपछि हत्या

सोमबार प्रहरीले दिनेश पाण्डेसहित उनकी श्रीमती सुनिता पाण्डे, छोरी आशिका र ११ वर्षका छोरा आशिकको बीभत्स शव उनको घरमा फेला पारेको थियो । सुनिता भने केही समयपछि बेलायत जाने तयारीमा रहेको खुलको छ ।