बुटवल-बेलहिया सडकको ठेक्का तोड्ने प्रक्रिया सुरु, ठेकेदार कम्पनीलाई आयोजनाले सोध्यो स्पष्टीकरण

बुटवल-बेलहिया सडकको ठेक्का तोड्ने प्रक्रिया सुरु, ठेकेदार कम्पनीलाई आयोजनाले सोध्यो स्पष्टीकरण

A+ A A-

निकै चासोका साथ हेरिएको हेरिएको बुटवल बेलहिया व्यापारिक आयोजनले ठेकेदार कम्पनीसँग ठेक्का तोड्ने प्रक्रिया सुरु गरेको छ । निर्माण सम्झौता भएको ६ वर्षसम्म पनि सडक निर्माणको काम सम्पन्न नभएपछि आयोजनाले ठेकेदार कम्पनीसँग ठेक्का सम्झौता अन्त्य गर्ने प्रक्रिया सुरु गरेको हो ।

व्यापारिक मार्ग विस्तार आयोजनाले ठेक्का लगाएका कार्यको न्युन कार्य प्रगति भएको, म्याद समाप्त भएका र बाह्य समस्याबिना पनि लामो समयसम्म निर्माणको कार्य रोकिएको भन्दै ठेक्का सम्झौता अन्त्य किन नगर्ने भन्दै सूचना प्रकाशित गरेको छ ।

आयोजनाकी सूचना अधिकारी सविता ज्ञवालीले ठेकेदार कम्पनीलाई निर्माण कार्य अगाडि बढाउन विभिन्न मितिमा लिखित र मौखिक ताकेता गर्दासमेत सन्तोषजन कार्य प्रगति नभएको भन्दै सार्वजनिक खरिद ऐन २०६३ तथा नियमावली २०६४ बमोजिक ठेक्का किन अन्त्य नगर्ने भन्दै सूचना प्रकाशित गरेको बताइन् ।

उनले ठेक्का सम्झौता अन्त्य गर्न नपर्ने कुनै मानासिब कारण भए सात दिनभित्र भरपर्दो स्पष्टीकरणसहित आयोजनाको कार्यालयमा उपस्थित हुन भनिएको जानकारी दिइन् । स्पष्टीकरण चित्तबुझ्दो नभएमा ठेक्का सम्झौताका सर्त र सीओसी तथा प्रचलित ऐन-नियमअनुसार कानुनी कारबाही अगाडि बढाइने बताइन् ।

आयोजनाले तीन वटा ठेक्का तोड्ने गरी प्रक्रिया सुरु गरेको छ । बिरुवा कन्स्ट्रक्सन प्रालि मध्यबानेश्वर काठमाडौंले लिएको ठेक्का नं. टीआरआईपी/३३७३१२४/बीबी/०७३/०७४-००१, बिरुवा-श्रेष्ठ-एपेक्स जेभी काठमाडौंको ठेक्का नं. टीआरआईपी/३३७३१२४/बीबी०७१/०७२-००२ र द कञ्चनजंगा-बिरुवा जेभी, मध्यबानेश्वर काठमाडौंले ठेक्का पाएको ठेक्का नं. टीआरआईपी/३३७३१२४/बीबी/०७३/०७४-००३ तोड्ने गरी प्रक्रिया अघि बढाएको हो । यी तीन वटा ठेक्का बेलहिया, पडसरी र बुटवलका हुन् ।

अर्को एक पत्र समेत काटिएको छ जसको बोधार्थ सडक विभाग ललितपुर, उत्तर दक्षिण व्यापारिक रूट ललितपुर, संघीय सडक निरक्षण तथा कार्यान्वयन कार्यालय पोखरा, बुटवल उपमहानगरपालिका र जिल्ला प्रशासन कार्यालय रूपन्देहीलाई पठाइएको छ ।

प्रकाशित मिति: शुक्रबार, साउन १३, २०७९ १७:२८