खस्किँदो एसईईको नतिजा, विज्ञहरू भन्छन्– ‘खारेज गरौँ’

A+ A A-

माध्यमिक शिक्षा परीक्षा (एसईई)को नतिजा खस्किँदै गएको छ । शैक्षिकसत्र २०७५ सालको तुलनामा शैक्षिकसत्र २०७८ को नतिजा घटेको छ । बोर्डले बुधबार सार्वजनिक गरेको २०७८ सालको नतिजामा ३.६ देखि ४ जीपीए ल्याउनेको संख्या ९ हजार ६ सय ३३ छ भने २०७५ मा १७ हजार ५ सय ८० जनाले ल्याएका थिए । नतिजा १.८८ प्रतिशतले खस्किएको छ ।

राष्ट्रिय परीक्षा बोर्डले नतिजा ओरालो लाग्नुको कारण कोरोना महामारीलाई देखाएको छ । ‘नतिजा केही घटेको छ । कोभिडका कारण विद्यार्थीले पूरा पढ्न पाएनन्,’ बोर्डका अध्यक्ष महाश्रम शर्माले भने, ‘दुई वर्षपछि भौतिक रूपमा विद्यार्थीले परीक्षा दिएका छन्, त्यसैको असर हो ।’

तर, शिक्षाविद्हरू बोर्डको तर्कसँग सहमत छैनन् । ‘शिक्षकले नपढाएर र पढाउने तरिका नभएर नतिजा ओरालो लागेको हो,’ शिक्षाविद् डा. विद्यानाथ कोइराला भन्छन्, ‘विद्यार्थीले पनि नपढेकै हो ।’

शैक्षिक गुणस्तर खस्किनुमा कोभिडलाई कारण देखाएर सरकार पन्छिन नमिल्ने बताउँछन् उनी । ‘सरकारले कोभिड भयो, पढाइ भएन भनेर दया गर्ने हो र ? दुई महिना पढाइ भएको भए त्यो अवधिमा कसरी पढाउने भन्ने महत्त्वपूर्ण हो । धेरै विद्यार्थी पास गराउने रणनीति मात्र देखियो । यसले भोलिका दिनमा ठूलो असर गर्छ,’ उनी भन्छन् ।

३.६ देखि ४ जीपीए ल्याउने मात्र होइन, अरु जीपीएमा पनि ओरालो लागेको छ । शैक्षिकसत्र ०७८ मा ३.२ देखि ३.६ जीपीए ४१ हजार ६ सय २७ जनाले ल्याएका छन् । ०७५ मा ५१ हजार १ सय ३७ जनाले ल्याएका थिए । यो २.७४ प्रतिशतले कमी आएको हो ।

०७५ र ०७८ को तुलनामा २.८ देखि ३.२ जीपीएमा ०.२ प्रतिशत, २.४ देखि २.८ जीपीए ल्याउनेमा १.६४ प्रतिशत, २ देखि २.४ जीपीए ल्याउनेमा १.३६ प्रतिशत, १.६ देखि २ जीपीए ल्याउनेमा ०.४६ प्रतिशत, १.२ देखि १.६ जीपीएमा ०.५५ प्रतिशतले कम र ०.८ देखि १.२ जीपीएमा ०.३० प्रतिशतले कमी आएको छ । अहिलेको परीक्षालाई सन्तोषजनक रूपमा लिन्छन्, बोर्डका अध्यक्ष शर्मा । ‘कोरोनाले कक्षा कोठामा पठनपाठन भएन । यस्तो स्थितिमा आएको नतिजा सन्तोषजनक छ,’ उनी भन्छन् ।

परीक्षा बोर्डले शैक्षिकसत्र २०७६ र २०७७ को परीक्षाको नतिजालाई मूल्याङ्कन गरेको छैन । ‘दुई वर्ष कोरोनाका कारण भौतिक रूपमा परीक्षा भएन । विशेष परिस्थितिका कारण विद्यालयले मूल्याङ्कन गरेका कारण दुई वर्षको नतिजालाई मूल्याङ्कनको आधार नबनाएको हो,’ बोर्डका सदस्य दुर्गाप्रसाद अर्यालले भने ।

यो वर्ष ४ जीपीए ल्याउनेमा छात्राभन्दा छात्रको संख्या धेरै देखिएको छ । ५ हजार २ सय ८१ छात्रले ४ जीपीए ल्याउँदा ४ हजार ३ सय ५२ छात्राले मात्र ४ जीपीए ल्याएका छन् । शैक्षिकसत्र २०७५ मा पनि ४ जीपीए ल्याउनेमा छात्रको संख्या धेरै थियो । ०७५ सालमा १० हजार ६७ जनाले ४ जीपीए ल्याउँदा ७ हजार ५ सय १३ जना छात्राले मात्र ४ जीपीए ल्याएका थिए । तर, कम जीपीए ल्याएर उत्तीर्ण हुनेमा भने छात्राको संख्या धेरै छ ।

नतिजा सुधार गर्न के गर्ने ?

शैक्षिक गुणस्तर माथि उकास्न विशेष कक्षाको व्यवस्था गर्न विज्ञहरूको सुझाव छ । ‘अब केटाकेटीलाई विशेष कक्षाको व्यवस्था गर्नुपर्छ । पढ्न मन नलाग्नेलाई गरिखाने शिक्षा दिनुपर्छ,’ शिक्षाविद् डा. कोइराला भन्छन् ।

एसईई खारेज गरौँ

एसईई के गर्ने भन्ने लामो समयदेखि बहस चलिरहेको छ । संसदको शिक्षा तथा स्वास्थ्य समितिले समेत पटक–पटक एसईई खारेज गर्न सरकारलाई निर्देशन दिएको छ । तर, ऐन नबनेका कारण एसईईको व्यवस्थापन हुन सकेको छैन । संविधानले पनि विद्यालय तहको अन्तिम कक्षा १२ लाई मानेको छ । त्यसैले एसईई खारेज गर्नुपर्ने पक्षमा विज्ञहरूसमेत उभिएका छन् । ‘एसईई बेकार हो । यसलाई १० कक्षामै छोड्नुपर्छ । १० को कापी विद्यालयले नै जाँच्नुपर्छ,’ डा. कोइरालले भने, ‘प्रदेशले लिने भनिएको छ । त्यो पनि हटाउनुपर्छ ।’

सम्बन्धित समाचार

प्रकाशित मिति: बुधबार, साउन ११, २०७९ १९:१६