भ्युटावरको नाममा रुख काटियो, मध्यवर्ती समितिका ७ जना निकुञ्जको हिरासतमा

A+ A A-

हेटौँडा उपमहानगरपालिका–१४ स्थित डाइभरडाँडामा निर्माणधिन भ्युटावर वरपरको सालका रुख काटेको आरोपमा एउटै गाउँका ७ जना हिरासत पुगेका छन् ।

भ्युटावरको भुई तला निर्माण भएर अलपत्र छ । हेटौँडा उपमहानगरपालिकाले डाइभरडाँडाको अग्लो स्थानमा भ्युटावर निर्माण गरेर पर्यटकीय क्षेत्रमा विकास गर्ने योजना कार्यान्वयन गरेको थियो । तर, सोही भ्युटावरका कारण वनस्पतिका ७ जना पर्सा राष्ट्रिय निकुञ्जको हिरासतमा पुगेका छन् । हरियाली मध्यवर्ती सामुदायिक वन समिति पर्सा राष्ट्रिय निकुञ्ज क्षेत्रमा पर्छ ।

निकुञ्जले ३१ असारमा वन समितिका ७ जना पदाधिकारीलाई पक्राउ गरेर १५ दिनको म्याद थप गरी कानुनी प्रक्रिया अघि बढाएको छ । जसमध्ये २ जना ७० वर्ष उमेरमाथिका रहेकाले निकुञ्जले जमानीमा छोडेको छ । २ जना वृद्धलाई आवश्यक परेको खण्डमा हाजिर गराउने गरी छोडिएको निकुञ्जले जनाएको छ । निकुञ्जले भ्युटावर क्षेत्रमा जग्गा अतिक्रमण गर्ने गरी रुख कटान गरेको आरोप लगाएको छ ।

निकुञ्जका सूचना अधिकारी सहायक वार्डेन सन्तोष भगतले जग्गा अतिक्रमण गर्ने उद्देश्य देखिएको भन्दै रुख काट्ने कार्यमा संलग्न ७ जनालाई पक्राउ गरिएको बताए । ‘रुख किन काटिएको भनेर खुलिसकेको छैन् । भ्युटावर बनिरहेकाले जग्गा अतिक्रमण गर्ने उद्देश्य काटिएको आशंका छ । अनुसन्धानकै क्रममा भएकाले ठ्याक्कै कारण नखुलेको हो । २ जना वृद्धाहरुलाई जमानीमा घर छोडेका छौँ । समितिका ५ जना हिरासतमै हुनुहुन्छ,’ भगतले शिलापत्रसँग भने ।

सहायक वार्डेन भगतका अनुसार साना–ठूला गरी करिब १ सय वटा रुख काटिएको छ । वडाध्यक्ष दिपक खड्काले टुक्रा र साना हाँगा काटेको बताए । ‘रुख भनेर ठूला रुख काटिएको हैन, साना हाँगा काटिएको रहेछ । स्थानीयले दाउराका लागि काटेका हुन्,’ खड्काले भने । उनले घटनालाई राजनीतिकरण गरिएको आरोप लगाए ।

भ्युटावर १४ नम्बर वडा कार्यालयको बजेटमा निर्माण भइरहेको हो । हालसम्म १४ लाख बढी रकम खर्चिएको वडाध्यक्ष खड्काले जानकारी दिए । भ्युटावरको जग निर्माण गरेर भर्‍याङसहित पिल्लर ठड्याइएको छ । केही वर्षअघि डाइभरडाँडामा भ्युटावरसहित होमस्टे निर्माण गर्ने भन्दै उपमहानगरपालिकाले स्थानीयलाई होमस्टे सञ्चाल सम्बन्धि तालिम पनि दिएको थियो ।

चुरियामाई उपभोक्ता समितिका अध्यक्ष मिनबहादुर घलानले स्थानीयले नियतबस रुख नकाटेको दाबी गरे । चुरियामाई उपभोक्ता समितिअन्तर्गत् हरियाली मध्यवर्ती सामुदायिक वनसहित चार वटा वन समिति छन् । घलान हरियाली वनका पूर्वसचिवसमेत हुन् । उनले भ्युटावर निर्माण समितिका स्थानीयलाई निकुञ्जबाट अनुमति पाएर मात्रै बनाउनुपर्छ भनेर आफूले सुझाव दिएको बताए । उनलाई पनि निकुञ्जले दिनभर नियन्त्रणमा लिएर साँझ छोडेको थियो ।

उनको मोबाइल फोनसमेत निकुञ्जकै नियन्त्रणमा छ । आफूले निकुञ्जलाई अनुसन्धानमा सहयोग पुर्‍याउने उनले बताए । भ्युटावर निर्माण हुँदा पनि निकुञ्जसँग दुई पटक आदेश लिएको घलानले जानकारी दिए । ‘निकुञ्जसँगको आदेशअनुसार भ्युटावर निर्माण भएको हो । मैले पछि अरु काम गर्दा पनि निकुञ्जको आदेश आवश्यक पर्छ भनेर भनेको हो । कतिपयले नबुझी रुख काटेछन् । उहाँहरूको नियत भने गलत थिएन,’ घलानले भने ।

‘सुरुमा एक जनाले लाथ्रा काट्नुभएको सुन्न आएको छ । त्यसपछि विस्तारै अरुले पनि काट्नुभएको रहेछ । उहाँहरूले नबुझेर अञ्जानमै काट्नुभएको हो । मैले नियतबस काटेको पाएको छैन,’ घलानले थपे । रुख काटानी हुँदा आफू काठमाडौंमा रहेको घलानले बताएका छन् ।

प्रकाशित मिति: मंगलबार, साउन १०, २०७९ १९:५९