कहाँ छन् १४ वर्ष जेल सजायकाे मागदाबी भएका 'तपस्वी' रामबहादुर बम्जन ? प्रहरी भन्छ- खाेज्दैछाैँ

कहाँ छन् १४ वर्ष जेल सजायकाे मागदाबी भएका 'तपस्वी' रामबहादुर बम्जन ? प्रहरी भन्छ- खाेज्दैछाैँ

A+ A A-

प्रहरीको केन्द्रीय अनुसन्धान ब्युरो (सीआईबी) को टोलीले पछिल्लोपटक ४ असार २०७७ मा लिटिल बुद्ध भनेर चिनिएका तपस्वी रामबहादुर बम्जनको आश्रममा छापा मार्‍यो । सिन्धुलीकाे कमलामाई नगरपालिका– ८, पैरेनीस्थित २० रोपनीभन्दा बढी जंगल अतिक्रमण गरेर बसेका बम्जनको आश्रममा सीआईबीको टोली तालिमप्राप्त कुकुरसहित हतियार नै लिएर पुगेको थियो ।

आश्रमभित्र आफ्नो लागि छुट्टै दरबार निर्माण गरेर बसेका बम्जन त्यो बेला फेला परेनन् । आश्रमभित्र उनले स्वीमिङ पुल, जिमखानादेखि अन्य धेरै निजी भाैतिक संरचना निर्माण गरेका छन् । उनको आश्रममा नेपालीबाहेक केही विदेशी नागरिक पनि छन् । आश्रमका चारै नाकामा उनले निजी सुरक्षा चेक पोस्ट राखेका छन् ।

त्यसयता भने प्रहरीले उनको आश्रममा छापा मारेको छैन । बम्जनमाथि २० साउन २०७३ मा आफ्नो आश्रममा आएकी आनीलाई प्रलोभनमा पारेर यौनशोषण र बलात्कारपछि बेपत्ता गरेको आरोप छ ।

त्यसको ३ वर्षपछि सर्लाही प्रहरीमा पीडितका परिवारले किटानी जाहेरी दिएका थिए । जाहेरीपछि पनि पक्राउ नपरेका बम्जनलाई जिल्ला अदालत सर्लाहीले हाजिर हुन भन्दै त्यहीबेला ३५ दिने म्यादसमेत दिएको थियो । तर, म्याद नाघ्दा पनि बम्जन अदालतमा हाजिर भएनन् ।

सर्लाही अदालतले २०७६ माघमा पहिलो पटक उनीविरुद्ध पक्राउ पुर्जी जारी गरेको थियो । तर प्रहरीको पक्राउ गर्ने पटक–पटकको प्रयाससमेत सफल हुन सकेन । प्रहरीले २१ असार २०७७ मा उनीविरुद्धको अनुसन्धान प्रतिवेदन सर्लाही जिल्ला वकिल कार्यालय हुँदै जिल्ला अदालत टेकाइसकेको छ । तर, बम्जन अझै अदालतमा हाजिर भएका छैनन् ।

प्रहरीका अनुसार उनी सिन्धुपाल्चोक आश्रममै छन् । प्रहरीले बम्जनको विभिन्न आश्रमबाट यसअघि शव गलाउन प्रयोग गरिएका नुनका ढिकाहरू बरामद गरेको थियो । बम्जनमाथि सर्लाहीकी रीता बोट, नुवाकोटकी कर्मा तामाङ र मकवानपुरकी फुलमाया तामाङलाई यौनशोषणपछि बेपत्ता पारेको अभियोग छ ।

उनीविरुद्ध बालबालिकासम्बन्धी ऐन, २०७६ अनुसार १४ वर्ष जेल सजायको माग राखेर प्रहरीले प्रतिवेदन पेस गरेको थियो । जसमा बम्जनसहित उनका सहयोगी ज्ञानकुमार बम्जन तथा जितबहादुर तामाङलाई त्यसको आधा सजायको माग दाबी गरेर प्रतिवादी बनाइएको छ ।

खोजीमै छौँ : प्रहरी

जिल्ला प्रहरी कार्यालय सर्लाहीका प्रहरी प्रमुख प्रहरी उपरीक्षक (एसपी) प्रविण पोखरेलका अनुसार बम्जनको खोजी कार्य जारी छ । ‘हामी खोजी कार्यमै छौँ । फेला परेको छैन । म्याद तामेलीको लागि नजिकको प्रहरी कार्यालयलाई समेत निर्देशन दिएका छौँ,’ एसपी पोखरेलले भने ।

सीआईबीका प्रवक्ता एसपी श्यामकुमार महतोले पनि नसुल्झेका केही ठूला अपराधका घटनाको अनुसन्धान जारी रहेको र बम्जनको हकमा पनि त्यही भएको बताए ।

‘हामीले खोजी कार्य छाडेको भन्ने होइन । हामी आफ्नो तरिकाले लागिनै रहेका हुन्छौँ । जिल्लामा उजुरी परेकोले जिल्ला प्रहरी कार्यालयलाई हामीले सपोर्ट गर्ने काम पनि गरिराखेका हुन्छौँ,’ एसपी महतोले भने ।

तर, प्रहरीले लामोसमय बित्दा पनि बम्जनलाई पक्राउ गर्न सकेको छैन । प्रहरीले पक्राउ गर्न नसकेपछि जिल्ला अदालत सर्लाहीले बम्जनको ठेगानामा तामेली गर्न निर्देशन दिएको थियो । जिल्ला अदालत सर्लाहीका सूचना अधिकारी ज्ञानबहादुर कार्कीले प्रहरीले बम्जनबारेको मुद्धा तामेली गर्न पत्र पठाउँदासमेत प्रहरीले कुनै जानकारी गराउन नसकेको बताए ।

‘हामीले बम्जन पक्राउ नपरेपछि म्याद तामेल गर्न प्रहरीलाई पहिला नै पत्राचार गरेका हौँ । तर, उनको म्याद तामेल भएकोबारे अहिलेसम्म प्रहरीले कुनै जानकारी दिएको छैन्,’ सूचना अधिकारी कार्कीले शिलापत्रसित भने ।

जिल्ला अदालत सर्लाहीले प्रहरीबाट कुनै जानकारी नआएपछि जिल्ला प्रहरी कार्याल सर्लाही प्रमुख र मकवानपुर प्रहरी प्रमुखलाई सम्बोधन गरेर बम्जनबारेको मुद्दा हालसम्म के कति कारणले म्याद तामेल हुन सकेन त्यसबारे जानकारी दिनभन्दै २ फागुन २०७८ मा ताकेता पत्र पठाइएको कार्कीको भनाइ छ ।

वन फडानी गरेर आश्रम निर्माण

बम्जनले सिन्धुली पैरेनीस्थित २० रोपनीभन्दा बढी जंगल अतिक्रमण गरेर बसेको आंशका प्रहरीको छ । अवैध रूपमा वन अतिक्रमण गरेर बनाएका उनकाे आश्रमसमेत भत्काउन वन विभागलाई सीआईबीले यसअघिनै पत्राचार गरेको थियो । तर, अझै उनको आश्रम भने भत्किएको छैन ।

धर्मको नाममा जंगल मासेर संरचना बनाइएको प्रहरीको दाबी छ । बम्जनले सिन्धुपाल्चोक, सर्लाही र नुवाकोटमा पनि आश्रम निर्माण गरेका छन् । आश्रममा बस्दा उनले आपराधिक गतिविधि सञ्चालन गरेको प्रहरीको निष्कर्ष छ ।

प्रकाशित मिति: बुधबार, साउन ११, २०७९ ०६:४७