मुख्यमन्त्री नछाडेपछि बागमतीमा एक्लियो नेकपा एस, कांग्रेसले बहिष्कार गर्‍यो प्रदेशसभा बैठक

मुख्यमन्त्री नछाडेपछि बागमतीमा एक्लियो नेकपा एस, कांग्रेसले बहिष्कार गर्‍यो प्रदेशसभा बैठक

A+ A A-

बागमती प्रदेशमा सरकारको नेतृत्व गरिरहेको नेकपा (एकीकृत समाजवादी) र गबठन्धनका सहयात्री दल नेपाली कांग्रेसबीचको विवाद बढ्दै गएको छ ।

प्रदेश सरकारको कार्यकाल आधा-आधा बाँड्ने सहमति कार्यान्वयन नगरेको भन्दै नेपाली कांग्रेसले पाण्डे नेतृत्वको सरकारप्रति बहिष्कारको नीति लिएको छ । सहमतिअनुसार बागमती सरकारको नेतृत्व छाड्नुपर्ने अडानमा कांग्रेस छ ।

१८ असारमा काठमाडौंस्थित पार्टी केन्द्रीय कार्यालयमा अध्यक्ष माधव नेपालसहितको उपस्थितिमा बसेको एकीकृत समाजवादी बागमती प्रदेशको संसदीय दलको बैठकले तत्काल सरकार नछोड्ने निर्णय गरेको थियो ।

कांग्रेसले उक्त बैठकबाट सहमति कार्यान्वयनको ढोका खुल्ने आशा राखेको थियो । तर, त्यसविपरीत केन्द्रीय गठबन्धनलाई प्रदेश सरकार परिवर्तनको जिम्मेवारी दिँदै एकीकृत समाजवादीले सहमति कार्यान्वयन नगर्ने भएपछि कांग्रेस बागमति असन्तुष्ट बनेको हो । त्यसयता कांग्रेसले मुख्यमन्त्री पाण्डेविरुद्ध बहिष्कारको नीति अपनाएको कांग्रेसकै सचेतक छिरिङ दोर्जे लामाले स्वीकार गरेका छन् ।

बिहीबार बसेको प्रदेशसभा बैठक कांग्रेसका सांसदहरूले बहिष्कार गरेका छन् । बैठकमा कांग्रेस सचेतक लामा र भौतिक पूर्वाधार विकासमन्त्री कृष्णलाल भँडेल मात्रै उपस्थिति थिए । बिहीबार नै भएको दोस्रो बैठकमा स्वास्थ्यमन्त्री निमा लामा पनि पुगे ।

सचेतक लामाले भने सहमति कार्यान्वयन नभएका कारण प्रदेशसभा बैठक बहिष्कार गरेको शिलापत्रलाई जानकारी दिए । ‘म र भँडेल मन्त्रीज्यू मात्रै थियौँ । अरु सांसदहरू आउनुभएन । सहमति कार्यान्वयन नगरेपछि उहाँहरू कसरी आउनु हुन्छ ?’ सचेतक लामाले प्रश्न गरे ।

प्रदेशसभा बैठकमा उपस्थित नभएर सहमति कार्यान्वयन नभएको विषयमा सांकेतिक विरोध जनाएको लामाले बताए । सहमति कार्यान्वयन नगरे आगामी प्रदेशसभा निर्वाचनमा समेत एकीकृत समाजवादीलाई सहयोग नरहने उनको चेतावनी छ ।

‘सहमति कार्यान्वयन गरेको खण्डमा प्रदेशभरिको निर्वाचनमा सहयोग गर्ने वातावरण बन्छ । यसरी वातावरण राम्रो बन्दैन्,’ लामाको चेतावनी थियो ।

प्रदेश सरकारका स्वास्थ्यमन्त्रीसमेत रहेका कांग्रेस बागमती प्रदेश संसदीय दलका सचिव निमा लामाले दोस्रो बैठकमा आफू गएको बताए । प्रदेशसभा बैठकमा अनुपस्थित भएर बहिष्कार गर्नुभएको भन्ने प्रश्न गरेपछि केही समय जवाफ नदिएका लामाले भने, ‘त्यो त म बोल्दिनँ, पार्टीको सचेतकसँगै कुरा गर्नु है ।’

एकीकृत समाजवादी बागमती प्रदेशकी प्रमुख सचेतक मुनु सिग्देलले कांग्रेसले बहिष्कार गरेको विषयमा आफूलाई थाहा नभएको प्रतिक्रिया दिइन् । कांग्रेसले असन्तुष्टि जनाइरहेको उनको भनाइ छ ।

मुख्यमन्त्री पाण्डेलाई एक्ल्याउने नीति लिएको कांग्रेसलाई नेकपा माओवादी केन्द्रको साथ छ । माओवादी केन्द्रले पनि सहमति कार्यान्वयन गर्नुपर्ने अडान लिएको छ । कांग्रेस र माओवादी एक ठाउँमा उभिएपछि बागमतीको सत्ता गठबन्धनबाट एकीकृत समाजवादी एक्लिँदै गएको देखिन्छ ।

प्रदेश सरकारले केही दिनअघि वितरण गरेको प्रदेश विभूषण र कर्मचारी सम्मान कार्यक्रममा समेत कांग्रेस र माओवादी केन्द्रका अधिकांश मन्त्री र सांसदहरू अनुपस्थि थिए ।

प्रदेशकै सम्मान कार्यक्रम छोडेर आर्थिक मामिला तथा योजनामन्त्री शालिकराम जम्मकट्टेल, भौतिक पूर्वाधारमन्त्री भँडेल, वन तथा वातावरण मन्त्री विशाल खड्का मकवानपुरकै विकट राक्सिराङ गाउँपालिकास्थित परेवाभिरमा निर्माण भइरहेको सडक योजनाको अनुगमनमा पुगेका थिए ।

परेवाभिर पुगेका मन्त्रीहरू ।

माओवादी केन्द्र बागमती प्रदेश संसदीय दलको उपनेतासमेत रहेकी सामाजिक विकासमन्त्री थाहा नगरपालिकामा भएको एक कार्यक्रममा पुगेकी थिइन् । उक्त कार्यक्रममा एकीकृत समाजवादीका मन्त्री, राज्यमन्त्री, सांसद तथा कर्मचारीहरूको मात्रै उपस्थिति थियो । बागमतीमा यसअघि पाण्डेविरुद्ध कांग्रेस र माओवादी केन्द्रका सांसदहरूको हस्ताक्षर संकलनसमेत भएको थियो ।

बागमती प्रदेशसभामा कुल १ सय ७ जना सांसद छन् । सरकार निर्माण गर्न ५४ जना सांसदसहित बहुमत संख्या हुनुपर्दछ । प्रदेशसभामा माओवादी २३, नेपाली कांग्रेस २२, एकीकृत समाजवादी १३ र जसपाको एकसहित ५९ सांसद छन् । प्रमुख प्रतिपक्षी एमालेसँग ४१, विवेकशील दलसँग ३, राप्रपा र नेमकिपाका २–२ सांसद छन् ।

प्रकाशित मिति: बिहीबार, साउन ५, २०७९ १९:१२