वाम गठबन्धनका लागि एमालेले प्रचण्डलाई प्रधानमन्त्री अफर गर्न सक्छ ?

A+ A A-

मंसिरमा हुने संघीय तथा प्रदेशसभा चुनावकेन्द्रित रणनीति बनाउने क्रममा नेकपा एमालेभित्र विकल्पमा वाम गठबन्धनलाई प्राथमिकतमा राख्नुपर्ने आवाज उठ्न थालेको छ । स्थानीय चुनावसम्म वाम गठबन्धनको पक्षमा नरहेका नेताहरूसमेत अहिले गठबन्धनको पक्षमा खुलेका छन् ।

उनीहरूले अध्यक्ष केपी ओलीमाथि दबाब बढाउन थालेको एमालेस्रोतको भनाइ छ । एमालेका एक स्थायी कमिटी सदस्यले दिएको जानकारीअनुसार माओवादी केन्द्र र एकीकृत समाजवादीलाई गठबन्धनमा ल्याउनुपर्ने मत बढ्न थालेको छ । त्यसैको प्रभाबस्वरूप अध्यक्ष ओली तुलनात्मक रूपमा कम आलोचक हुन थालेका हुन् । त्यसो त, ओलीले सम्पादकहरूको बैठकमा हिमालय होटलमा पार्टी विभाजनमा आफ्नो पनि कमजारी रहेको स्वीकार गरेका थिए ।

स्रोतका अनुसार माओवादी र एकीकृत समाजवादीका नेताहरूसँग एमालेका दोस्रो तहका केही नेताहरू निरन्तर संवादमा छन् । यद्यपि, परिस्थिति अपेक्षित रूपमा विकास भने भइसकेको छैन । माओवादी केन्द्र, एकीकृत समाजवादीसहित वामदेव गौतम, बाबुराम भट्टराईसमेत मिलेर वाम पृष्ठभूमिको समाजवादी केन्द्र बनाउने र एउटै घोषणापत्र, चुनाव चिह्नसहित चुनावमा होमिने रणनीतिमा जुटेपछि एमाले थप दबाबमा पर्न थालेको छ ।

त्यही कारण दोस्रो तहका नेताहरूको दौडधुप पनि बढेको छ । एमाले स्रोतका अनुसार सुवास नेम्वाङ, विष्णु पौडेल, सुरेन्द्र पाण्डे, प्रदीप ज्ञवाली, पृथ्वीसुब्बा गुरुङलगायतका पदाधिकारी तहका नेताहरू अनौपचारिक संवादमा रहेका छन् ।

एमालेभित्र माओवादी केन्द्रलाई साथ लिन नसकेको अवस्थामा एकीकृत समाजवादीलाई भए पनि चुनावअघि एकतामा ल्याउनुपर्ने मत पनि रहेको छ । एकीकृत समाजवादीका नेताहरू पनि त्यसका लागि सकारात्मक देखिएका छन् । अध्यक्ष ओलीले संसद् विघटन र पार्टी विभाजनमा कमजोरी भएको स्वीकार गर्दाको अवस्थामा एकतामा बल पुग्ने बताइरहेका छन् । शिलापत्रसँगको कुराकानीमा नेता झलनाथ खनालले पनि एकताका लागि एकीकृत समाजवादीले सबै ढोका खुला राखेको बताएका छन् । खनालले भने, ‘वाम गठबन्धनका लागि सबै ढोकाहरू खुला राख्नुपर्छ ।’

एमालेका उपमहासचिव प्रदीप ज्ञवाली पनि विगतका गल्तीलाई आत्मसात् गरेर जानुपर्ने बताउँछन् । ज्ञवाली विगतमा विभिन्न घटना भए र त्यस्ता घटना राजनीतिमा बेला–बेला भइरहन्छ । ती गल्तीलाई आत्मासात् गर्दै आगामी दिनमा सकारात्मक सोच बनाएर अघि बढ्नुपर्ने बताउँछन् ।

शिलापत्रसँग कुराकानी गर्दै ज्ञवालीले कम्युनिस्ट र एउटै पार्टीको धारबाट आएका दलहरूले वाम गठबन्धन गर्नुपर्ने पक्षमा एमाले रहेको प्रस्ट पारे । शिलापत्रसँग ज्ञवालीले भने, ‘अहिले एमाले मात्र होइन, अन्य दल पनि चुनावी गठबन्धनका पक्षमा प्रस्ट देखिएका छन् । सबै पार्टी एक्लै निर्वाचनमा जानुभन्दा गठबन्धनमै जोड दिइरहेको पाइयो । एमालेले अहिले नै यसो गर्नुपर्छ भनेर रणनीति बनाएको छैन । तर, आवश्यकता हेरी पार्टी कार्यकताको मनोभावनालाई बुझ्दै गठबन्धनको रणनीति बनाउनुपर्छ । यो छफफलको विषय हो ।’

प्रचण्डलाई प्रधानमन्त्रीकाे अफर ?

एमालेभित्र माअ‍ोवादीसँग सत्तासाझेदारीमा छलफल गरेर भए पनि गठबन्धनका लागि वातावरण बनाउनुपर्ने मत देखिन थालेको छ । प्रचण्डले आउँदो चुनावपछि पहिलो खेपमै प्रधानमन्त्री बन्ने चाहना राखेका छन् । एमाले अध्यक्ष ओली पनि प्रधानमन्त्रीको चाहनासहित चुनावी मैदानमा जाने तयारीमा छन् । तर, एकल प्रतिस्पर्धामा जाँदा एमाले सरकारमा फर्किने गरी सिट जित्न नसक्ने भएको विकल्पमाथि बहस गर्नुपर्ने तर्क उठिरहेको छ । एमालेभित्र त्यही क्रममा प्रचण्डलाई प्रधानमन्त्रीका लागि आवश्वासन दिन सकिने बारेमा पनि छलफल हुन थालेको एमालेस्रोतको दाबी छ ।

ओलीनिकट एक नेताले दिएको जानकारीअनुसार ५ वर्ष सत्ताबाहिर बस्नुभन्दा प्रचण्डलाई २ वर्षका लागि प्रधानमन्त्री दिएर गठबन्धन गर्नु उपयपुक्त हुन्छ भन्ने कोणमा नेताहरूले छलफल गर्न थालेका छन् । प्रचण्डलाई प्रधानमन्त्रीको प्रस्ताव गरेर भए पनि गठबन्धन गर्नुपर्छ भने पक्षमा सुवास नेवाङ, विष्णु पौडेल, सुरेन्द्र पाण्डे र ओलीनिकट केही नेताहरूसमेत रहेका ती नेताले दाबी गरे ।

प्रचण्डसँग जोडिएको प्रस्तावको विषयमा तत्काल टिप्पणी नगर्न अध्यक्ष ओलीले निर्देशन दिएको पनि ती नेताको भनाइ छ । शिलापत्रसँग ती नेताले भने, ‘अध्यक्ष ओली भने तत्काल प्रचण्डलाई साथ लिनेभन्दा पनि नेकपा एसका केही केन्द्रीय नेताहरूलाई चुनावमा टिकट दिएर भए पनि एमालेमा ल्याउनुपर्ने पक्षमा देखिनुहुन्छ । यसका लागि एमालेका केही नेताहरू छलफलमा व्यस्त छन् । तर, एसका नेताहरू एक्लैभन्दा पार्टी नै एकता गर्न पक्षमा छन् ।’

यद्यपि, माओवादीका अध्यक्ष पुष्पकमल दाहाल प्रचण्डले तत्काल कांग्रेस, नेकपा एस र जसपासँग गठबन्धन नटुट्ने बताउँदै आएका छन् । उनले सार्वजनिक कार्यक्रममा कांग्रेस र एसको कार्यकर्ताहरूलाई केन्द्र र प्रदेशको निर्वाचन यही गठबन्धन रहनेसमेत आश्वासन दिइरहेका छन् ।

माओवादी नेतृ पम्फा भुसालका अनुसार बाहिर हल्ला भए पनि माओवादीले तत्काल कुनै पार्टीसँग गठबन्धन गर्नुपर्छ भन्ने विषयमा छलफल गरेको छैन । शिलापत्रसँग भुसालले भनिन्, ‘पार्टीले राजनीतिक परिस्थिति हेरी गठबन्धन गर्नेछ ।’

प्रकाशित मिति: शुक्रबार, साउन ६, २०७९ १७:०४