जनार्दनमाथि छानबिनः अर्थका कर्मचारीले दिएनन् कुनै क्लु, यी हुन् अबका आधार

A+ A A-

करका दर हेरेफेर गर्न १४ जेठ मध्यरातमा असम्बन्धित व्यक्ति अर्थ मन्त्रालय ल्याएको विषयमा १० दिनको समयावधिसहित बनाइएको संसदीय छानबिन समितिले आठ दिनको समय सकेको छ । योबीचमा केही कागजी काम गरेको छ भने सम्बन्धित अधिकारीहरूको बयान लिने काम सकेको छ ।

यद्यपि निवर्तनमान अर्थमन्त्री शर्मामाथिको बयान कुन प्रकिया र ढाँचाबाट लिने भन्ने विषयमा अन्योल देखिएको छ । छानबिन समितिमा रहेका केही सदस्यहरूले सीसीटीभी फुटेजको सवालमा समिति एउटा निचोडमा पुगेपछि मात्रै शर्मासँग बयान लिनुपर्ने बताएका छन् ।

अहिलेसम्मको स्थितिले भने शर्माले 'क्लिन चिट' पाउने सम्भावना देखिएको छ । १४ जेठमा अर्थ मन्त्रालयमा लामो समय काम गरेका पूर्वनासु रघुनाथ घिमिरे आएको भन्ने विषयमा कुनै पुष्टि गर्ने आधार संसदीय समितिले भेटेको छैन ।

'पुष्टि हुने गरेर कागज र 'क्लु' केही पाइएको छैन', छानबिन समितिमा रहेका एक सदस्य भने । त्यस्तै सीसीटीभी फुटेज डिलिट गरिएको हो भन्ने आधार पनि नपाइएको उनीहरूको दाबी छ । अर्थ मन्त्रालयले उपलब्ध गराएको फुटेजले पनि केही आधार नदिएको उनले बताए । छानबिन समितिले सम्बन्धित दिनको फुटेज माग गरेकोमा त्यो फुटेज मेटिएको जिकिर अर्थ मन्त्रालयको छ ।

छानबिन समितिले अर्थ मन्त्रालयका १० जना अधिकारीसँग बयान लिँदा 'थाहा भएन' र 'आएकै छैन' भन्नेबाहेकको उत्तर आएकाे छैन । बजेट महाशाखा प्रमुख र राजस्व व्यवस्थापन महाशाखा प्रमुखहरूले बयानका क्रममा आफूलाई यस विषयमा जानकारी नै नभएको दाबी गरेका छन् भने अन्य आठ अधिकारीले करका दरहरू हेरफेर गर्ने क्रममा असम्बन्धित व्यक्ति आउन नसक्‍ने र नआएको दाबी गरेका छन् ।

तर, करका दरहरू हेरफेर गरिएको विषयमा सरोकारवालालाई नै जानकारी नै नभएको भन्ने विषयमा शंका उत्पन्न भएको छानबिन समितिका एक सदस्यले बताए । 'अहिले छानबिन समिति फरक ढंगले फरक लक्ष्य राखेर काम गरेको होला, तर बयानका क्रममा सम्बन्धित प्रमुखबाट करका दर हरेफेर भएको विषयमा 'मलाई जानकारी दिइएन' भनियो, हेरेफेर गरेको ठीक छ कि छैन भन्दा 'सम्बन्धित व्यक्तिलाई सोध्नू' भनियो', उनले थपे, 'राजस्व महाशाखा प्रमुखले राजस्वको दर थाहा नपाउने र बजेट महाशाखा प्रमुखले बजेटका कार्यक्रम नै थाहा नपाउने गरी कसले काम गर्‍याे त भन्ने शंका उत्पन्न भएको छ ।'

तर, अहिलेसम्मको बयानका क्रममा असम्बन्धित व्यक्ति आएको सवालमा र फुटेज डिलिट गरिएको सम्बन्धमा 'क्लु' नभेटिएको कारण अब सम्भावित दुई उपायबाट अघि बढ्नुपर्ने सुझाव दिइएको छ । पहिलो विकल्पका विषयमा छानबिन समितिले विज्ञको राय समेत लिएको छ । त्यो भनेको सीसीटीभी फुटेज रिट्राइभ गर्ने । यस विषयमा छानबिन समिति इन्जिनियरहरूसँग छलफल गरेको छ ।

दोस्रो विकल्पका रूपमा असम्बन्धित भनिएका घिमिरेका दुईवटा मोबाइल सिम ट्र्याक गर्ने । उनले दुईवटा एनटीसी र एनसेल फाेन प्रयोग गर्ने गरेको बताइएको छ । 'मन्त्रालयमा आएर फोन गरिएको भनिएको छ, उनका कम्तीमा त्यस दिन प्रयोग गरिएका दुईवटा फोन ट्रयाक गरियो भने पनि धेरै कुरा थाहा हुन्छ, क्लु भेटिने आधार बन्छ', एक आईटी विज्ञले भने ।

संसदीय छानबिन समितिका सचिव सुरेन्द्र अर्यालले अब कसरी अघि बढ्ने र अनुसन्धानको प्रकिया अब कसरी लैजाने भन्ने विषयमा बैठकपछि मात्रै भन्न सकिने बताएका छन् । 'छानबिन समितिका धेरै सुविधाहरू रहेका छन् । आफैँ कार्यविधि पनि बनाएको छ । कसरी अघि बढ्ने छलफलबाटै निचोडमा पुगिने छ', अर्यालले भने ।

प्रकाशित मिति: मंगलबार, साउन ३, २०७९ १३:५६