गुल्मी पहिराे अपडेट : मृत्यु हुनेकाे संख्या ९ पुग्याे

A+ A A-

गुल्मीमा पहिरोमा परी मृत्यु हुनेको संख्या ९ पुगेको छ । जिल्लाको सत्यवती गाउँपालिका -४ लिम्घा र वडा नम्बर ३, ठूलोलुम्पेकमा पहिरोमा पुरिएर ९ जनाको मृत्यु भएको हो । पहिरोमा परी अझै चार जना हराइरहेका छन् । पहिरोले घरहरु बगाउँदा सत्यवती गाउँपालिका- ४ लिम्घामा ६ जना र वडा नं. ३ ठूलोलुम्पेकमा ३ जनाको मृत्यु भएको हो ।

लगातारको वर्षाका कारण लिम्घाको भिरकुनामा दुई सय मिटर माथिबाट आएको पहिरोले तीन घर बगाउँदा ६ जनाको मृत्यु भएको हो । स्थानीय छली विश्वकर्मा, चन्द्र बहादुर विश्वकर्मा र धन बहादुर विश्वकर्माको घर बगाएको वडाध्यक्ष दानबहादुर रानाले जानकारी दिए । पहिरोमा परि ३२ वर्षीया निर्मला विक, २९ वर्षीया पम्फा विक, १२ वर्षीया अञ्जली विक, ५ वर्षीया हिमांशु विक, ७० वर्षीया छली विक र ९ वर्षीया सिवानी विकको मृत्यु भएको छ भने ७ वर्षीया तारा विक र डेढ वर्षीय एक बच्चा बेपत्ता भएको वडाध्यक्ष रानाले जानकारी दिए ।

लगातार भइरहेको वर्षाका कारण साेमबार राति ३ बजे पहिरोले सूर्यलाल पौडेल, चन्द्रबहादुर विक, रीता विक, बनबहादुर विक र परी विकको घर पनि पुरेको छ । पहिरो आएको थाहा पाएपछि उनिहरुले भागेर ज्यान जोगाएको रानाले बताए । अझै पनि २० घर जोखिममा रहेकाले सबैलाई सरस्वती माध्यमिक विद्यालयमा स्थानान्तरण गरिएको छ ।

सत्यवती गाउँपालिकै वडा नम्बर ३ ठूलोलुम्पेकको दाङसिङ्गामा पहिरोले घर पुरिएर तीन जनाको ज्यान गएको छ । ३० वर्षीया तिलकुमारी तरामु, उनका छोरा १० वर्षीय दर्शन तरामु मगर र दुर्गा सिन्जालीको मृत्यु भएको स्थलगत रूपमा उद्दारमा खटिएका सशस्त्र प्रहरी प्रमुख दिनेश रायमाझीले बताए । तिलकुमारीकी छोरी करिष्मा र धनी तरामु घाइते भएका छन् । लुम्पेककै सिङ्दिमा रुद्रबहादुर विकको घर भत्किएँदा माया र बबि विक बेपत्ता छन् । अहिले प्रहरी तथा स्थानीय बासिन्दाले उनीहरुको खोजी गरिरहेका छन् ।

अहिले स्थानीयसहित जिल्ला समन्वय समिति, नेपाल रेडक्रस सोसाइटी र विभिन्न राजनीतिक दलका नेता लिम्घा पुगेका छन् । ठूलोलुम्पेकमा प्रहरी नायव उपरीक्षक मीन घले र सशस्त्र प्रहरी नायव उपरीक्षक दिनेश रायमाझीसहितको टोली उद्धारमा खटिएका छन् । लिम्घामा इलाका प्रहरी कार्यालय रिडीका प्रहरी निरीक्षक राधेश्याम सिहसहितको प्रहरी टोली पुगेको छ । घटनास्थलको अवलोकन र राहत वितरणका लागि परराष्ट्रमन्त्री प्रदीप ज्ञवाली, प्रदेश ५ का सामाजिक विकासमन्त्री सुदर्शन बराललगायतका मन्त्री तथा अन्य नेता घटनास्थल पुगेका छन् । प्रमुख जिल्ला अधिकारी यदुनाथ पौडेलले अहिले उद्धारपछी राहत र पुर्नस्थापनाको काम सुरु भएको बताए ।

विभिन्न मन्त्रीद्धारा दुःख व्यक्त

सत्यवती गाउँपालिकाको लिम्घा र ठूलोलुम्पेकमा पहिरोमा परी जनधनको क्षतिप्रति मुख्यमन्त्री शंकर पोखरेलले दुःख व्यक्त गरेका छन् । त्यसैगरी परराष्ट्रमन्त्री प्रदीपकुमार ज्ञवाली, श्रम, रोजगार तथा सामाजिक सुरक्षा मन्त्री गोकर्ण विष्ट, ५ नम्बर प्रदेशका सामाजिक विकासमन्त्री सुदर्शन बराललगायतका नेताहरुले मंगलबार छुट्टाछुट्टै विज्ञप्ति जारी गर्दै घटनाप्रति दुःख व्यक्त गरेका छन्।

प्रकाशित मिति: बुधबार, साउन ८, २०७६ ०५:५३