कांग्रेसको गुट रोग सामाजिक सञ्जालमा छताछुल्ल

A+ A A-

अभिव्यक्ति स्वतन्त्रतामाथि बन्देज लगाउने उद्धेश्यले सरकारले मिडिया काउन्सिललगायत प्रेससम्वन्धि विधेयक ल्याएको भन्दै विरोधमा उत्रिएका कांग्रेस नेताले पार्टी नेतृत्वलाई पनि त्यस्तै आरोप लगाएका छन् ।

कांग्रेस नेता डा. शेखर कोइरालाले पार्टी भित्र पनि अभिव्यक्ति स्वतन्त्रतामाथि बन्देज लगाउन खोजिएको भन्दै मान्य नहुने चेतावनी दिएका छन् ।

सामाजिक सञ्जाल फेसवुकमार्फत डा. कोइरालाले पार्टी केन्द्रीय कार्यसमितिले स्वीकृति गरिनसकेको नियमावलीले कांग्रेसभित्रै व्यक्तिगत स्वतन्त्रता र बिचार माथि बन्देज लगाउन खोजिएको आरोप लगाएका हुन् ।

डा. कोइरालाको भनाईमाथि टिप्पणी गर्दै सभापति देउवा निकट केन्द्रीय सदस्य मीन विश्वकर्माले ‘सस्तो लोकप्रियताका लागि गरिएको निरर्थक हल्ला’ भनेका छन् ।

अर्का केन्द्रीय सदस्य जीबनबहादुर शाहीले ‘यस्ता काइतेका कारण पार्टीको अवस्था नाजुक भएको टिप्पणी गरेका छन् । फेसबुकमै नेताको आरोप प्रत्यारोपपछि प्रेस युनियनका पूर्वसभापति मुरारी शर्माले भने पार्टीका नेताले आफ्नो स्वार्थका लागि बिवेक गुमाउँदा पार्टीमा दुरावस्था आएको लेखेका छन् ।

उनले लेखेका छन्, ‘शुरुदेखि नै नेपाली कांग्रेस र त्यसका नेताहरूले आफ्नो स्वार्थका लागि बिबेकिय स्वतन्त्रता गुमाउदाको परिणाम कांग्रेस दुराबस्थामा पुगेको हो । तथ्य यही हो ।’

केन्द्रीय सदस्य डा. कोइरालाले कांग्रेसमा फरक बिचार राख्दैमा अनुशासनको कारबाही गर्ने उदेश्यले पार्टीको नियमावली आउन लागेको भन्दै त्यो मान्य नहुने चेतावनी नेतृत्वलाई समेत दिएका छन् ।

‘ईतिहासको कुनै कालखण्डमा बीपी सशस्त्र क्रान्तिमा हुनुहुन्थ्यो । सुवर्णजी दरबार र भारतसग संवादमा हुनुहुन्थ्यो । किशुनजी दरबारसँग संवाद हुनै नसक्ने भन्दै जेलमा हुनुहुनुथ्यो’, ऐतिहासिक दृष्टान्त प्रस्तुत गर्दै कोइरालाले लेखेका छन्, ‘तीन शीर्ष नेताको एकै समयमा फरक-फरक बिचार आएको स्मरण गराउँछु ।’

पार्टी केन्द्रीय कार्यालयमा नियमावली मस्यौदा समितिले पेश गरेको प्रतिवेदनलाई केन्द्रीय सदस्यहरुको सुझावलाई समेटेर परिमार्जनसहित लाने निर्णय ३० असारमा बसेको केन्द्रीय कार्य समिति बैठकले गरेको थियो ।

नियमावलीमा सुभेच्छुक संस्थालाई नियन्त्रण गर्न खोजेको देखि लिएर पार्टी नेतृत्वको आलोचना गरेमा अनुशासनको कारबाहीमा परिनेसम्मका व्यवस्था छन् । यस्तो प्रावधानको संस्थापन पक्षधरले समर्थन गरेपनि असन्तुष्ट नेताहरुले बिरोध गर्दै आएका छन् ।

मंगलबार बस्ने भनिएको केन्द्रीय कार्य समिति बैठक विहीबारसम्मको लागि स्थगित गरिएको छ । नियमावली प्रतिवेदनमा सुुझाव समेटेर ल्याउन केन्द्रीय कार्य समितिले म्याण्डेड दिए पनि मस्यौदा समितिका संयोजक रमेश लेखक भारततर्फ लागेपछि चार दिनदेखि बैठक बस्न सकेको छैन ।

‘कांग्रेस यस्तो लोकतान्त्रिक पार्टी भन्ने अनि लोकतान्त्रिक पार्टीमा बिचारमाथि अंकुश लगाउने ?’ पार्टी सभापति देउवामाथि लक्षित गर्दै डा. कोइरालाले प्रश्न गरेका छन्, ‘यो मान्य हुन सक्दैन । कांग्रेस बिचारको विविधताको पार्टी हो ।’

डा. कोइरालाको सो अभिव्यक्तिको कांग्रेस केन्द्रीय सदस्य तथा सांसद मीन विश्वकर्माले हास्यास्पद भनेर टिप्पणी गरेका छन् । सभापति देउवानिकटका नेता विश्वकर्माले शेखरको फेसबुक स्टाटसमा प्रतिक्रिया दिदै ‘बिधानले नगरेको नियमावलीले बिचारमा बन्देज लगाउने कुरा हास्यस्पद’ लेखेका छन् ।

‘यस्तो पनि होला र ?’ विश्वकर्माले प्रश्न गर्दै लेखेका छन् ‘सस्तो लोकप्रियताका लागि निरर्थक हल्ला किन गर्या होला सज्जनहरुले ???’

डा. कोइरालाप्रति देउवा निकट केन्द्रीय सदस्य जीवनबहादुर शाही पनि खनिएका छन् । उनले कोइरालाको बिचारलाई काइतेको संज्ञा दिएका छन् । ‘आफूलाई मै हौ भन्ने काईतेहरूका कारण पार्टीको अबस्था नाजुक हुने भो’, शाहीले कोइरालाको स्टाटसमा टिप्पणी गरेका छन् ।

कांग्रेस बरिष्ठ नेता रामचन्द्र पौडेल पुत्र चिन्तनले भने डा. कोइरालाको भनाईप्रति समर्थन जनाउँदै कांग्रेस परिवर्तनकारी शक्तिको रुपमा विगतमा रहेको र भावी दिनमा पनि रहने भन्दै विगतका घटनालाई कसैले चाहेर पनि परिवर्तन गर्न नसक्ने लेखेका छन् ।

प्रकाशित मिति: बुधबार, साउन ८, २०७६ ०४:२२