ठूला करदाता कार्यालयले लक्ष्यको ८० प्रतिशत मात्रै कर उठायो, असारमा साढे ३२ अर्ब

ठूला करदाता कार्यालयले लक्ष्यको ८० प्रतिशत मात्रै कर उठायो, असारमा साढे ३२ अर्ब

A+ A A-

शनिबार करिब एक अर्ब ७५ करोड रुपैयाँको राजस्व उठाएपछि ठूला करदाता कार्यालयले चालु आर्थिक वर्षमा एक खर्ब ८३ अर्ब रुपैयाँ बराबरको राजस्व उठाएको छ ।

सरकारले उठाउने कुल राजस्वमा ठूला करदाता कार्यालयमार्फत उठाइने राजस्वको हिस्सा मात्रै २० प्रतिशत हाराहारी रहेको छ ।

यो कार्यलालयलाई चालु आर्थिक वर्षमा २ खर्ब २३ अर्ब रुपैयाँको राजस्व उठाउने लक्ष्य दिइएकोमा लक्ष्यको ८० प्रतिशत मात्रै राजस्व उठाउन सकेको हो ।

गत वर्ष उठाएको राजस्वको हिसाबले ठूला करदाता कार्यालयका प्रमुख कर प्रशासक शिवलाल तिवारीले विगतको तुलनामा ५४ अर्ब रुपैयाँ अर्थात् ३१ प्रतिशत बढी राजस्व उठाउने लक्ष्य दिइएको बताए । गत आर्थिक वर्षमा १ खर्ब ६९ अर्ब रुपैयाँको राजस्व उठाएको ठूला करदाता कार्यलयले याे वर्ष १४ अर्ब बढी मात्रै राजस्व पुर्‍याउन सकेको हो ।

'गत आर्थिक वर्षको तुलनामा ८ प्रतिशत बढी राजस्व उठाए पनि लक्ष्य धेरै राखिएको कारण पूरा गर्न सकिएन', प्रमुख कर प्रशासक शिवलाल तिवारीले भने ।

चार वर्षमा ठूला करदाता कार्यालयले उठाएको कर

आर्थिक वर्ष २०७५/७६ : १ खर्ब ६२ अर्ब
आर्थिक वर्ष २०७६/७७ : १ खर्ब ८४ अर्ब
आर्थिक वर्ष २०७७/७८ : १ खर्ब ६९ अर्ब
आर्थिक वर्ष २०७८/७९ : १ खर्ब ८३ अर्ब

ठूला करदाता कार्यालयमार्फत् उठाइएको करमध्ये असारमा उठाएको करको योगदान मात्रै १८ प्रतिशत रहेको छ । प्रमुख कर प्रशासक तिवारीले असार महिनामा मात्रै साढे ३२ अर्ब बढीको कर उठाएको जानकारी गराएका छन् ।

असारमा पूर्ण आयकरमध्ये ३० प्रतिशत कार्यकर उठ्ने गर्छ । आयकर ऐन- २०५८ को दफा ९४ अनुसार कुनै व्यवसाय वा लगानीबाट निर्धारणयोग्य आय भएको वा हुने व्यक्तिले तीन किस्तामा कर दाखिला गर्नुपर्ने हुन्छ । त्यसैले पुस मसान्तमा ४० प्रतिशत, चैत मसान्तमा ७० प्रतिशत र असार मसान्तमा १०० प्रतिशत रकम तिर्नुपर्ने हुन्छ । अर्थात् शत प्रतिशतमा ४० प्रतिशत पुसमा, थप ३० प्रतिशत चैतमा र थप ३० प्रतिशत असार मसान्तसम्म बुझाउनुपर्ने हुन्छ ।

ठूला करदाता कार्यालयको दायरामा ८० करोड रुपैयाँभन्दा बढीको वार्षिक कारोबार गर्ने करदाता पर्ने गर्छन् । ४० करोडभन्दा बढी ८० करोडभन्दा कमको कारोबारमा मध्यस्तरीय करदाता कार्यालयले कर उठाउँछ भने ४० करोडभन्दा तलको कारोबारमा सोझै आन्तरिक राजस्व विभागले कर उठाउँछ ।

ठूला करदाता कार्यालयले समेत आफ्नाे लक्ष्य पूरा गर्न नसेपछि सरकराले चालु आर्थिक वर्षमा आफ्नो लक्ष्यअनुसारको राजस्व उठाउन पनि असफल भएको देखिएको छ । विभाज्य रकमबाहेक ११ खर्ब ८० अर्बको राजस्व उठाउने लक्ष्य राखिएकोमा शनिबार साँझसम्म १० खर्ब ६८ अर्ब रुपैयाँ मात्रै राजस्व उठेको छ ।

प्रकाशित मिति: शनिबार, असार ३२, २०७९ १८:४४