कास्कीमा गत आर्थिक वर्षमा ८७ प्रतिशत बजेट खर्च

A+ A A-

कास्कीमा आर्थिक वर्ष २०७५/७६ मा ८६ दशमलव ८८ प्रतिशत बजेट खर्च भएको छ । गण्डकी प्रदेश सरकारको खर्च निकै निराशाजनक भएको भन्दै आलोचना बीढरहेको बेला कास्कीमा भने करिब् ८७ प्रतिशत बजेट खर्च भएको हो ।

कोष तथा लेखा नियन्त्रक कार्यालय कास्कीका अनुसार गत आर्थिक वर्षमा २९ अर्ब ४० करोड ५६ लाख बजेटमध्ये २५ अर्ब ५४ करोड ६८ लाख रुपैयाँ खर्च भएको हो । संघीय सरकार मातहतका करिब ९० वटा कार्यालयका लागि विनियोजन गरिएको १३ दशमलव १२ प्रतिशत अर्थात् ३ अर्ब ८५ करोड ८८ लाख बजेट खर्च हुन बाँकी रहेको छ ।

संघीय सरकारअन्तर्गत रहेका केही कार्यालय प्रदेशमा हस्तान्तरण भएको र केही कार्यालयको बजेट खर्च नहुने अवस्था रहेका कारण बाँकी रकम खर्च हुन नसकेको लेखा नियन्त्रण कार्यलयले जनाएको छ ।

जिल्लाका सिँचाइ, कृषि, सडक लगायतका इकाइ कार्यालयहरु गत आर्थिक वर्ष सुरु भएपछि मात्रै संघीय सरकारले प्रदेशलाई हस्तान्तरण गरेको थियो । लेखा नियन्त्रक कार्यालयका अनुसार ११ दशमलव ५६ प्रतिशत बजेट असारमा खर्च भएको छ । ११ महिनामा भएको खर्च रकमको तुलनामा सो रकम अत्यधिक हो ।

अन्तिम महिनामा आएर २ अर्ब ९५ करोड २९ लाख रुपैयाँ निकासा भएको कोष नियन्त्रक शिवप्रसाद पौडेलले जानकारी दिए । जसमध्ये पुँजीगत ५० प्रतिशत रकम खर्च भएको देखिन्छ । आर्थिक वर्ष सकिनै लाग्दा ठूलो बजेट खर्च भएपनि विधि र प्रक्रियाअनुसार नै खर्च भएको पौडेलले बताए ।

‘प्रक्रियागत रुपमै खर्च भएको छ । कतिपय काम बैशाख, जेठमै सकिने तर भुक्तानी अन्तिममा मात्रै लैजाने हुँदा पुँजीगत बजेट खर्च असारमा स्वाभाविक केही बढी देखिएको हो’ उनले भने, ‘भुक्तानी प्रक्रियाले बढी खर्च देखिए पनि स्वभाबिक खर्च हो ।’

कार्यालयबाट आएका भुक्तानी आदेशलाई नियमानुसार असार ३१ गतेसम्म नै सदर गरिएको उनले बताए । कास्कीमा चालुतर्फ २३ अर्ब ९९ करोढ ९५ लाख रुपैयाँ विनियोजन भएकोमा ८९ दशमलव ८७ प्रतिशत अर्थात् २१ अर्ब ५६ करोड ७९ लाख रुपैयाँ खर्च भएको छ ।

पुँजीगततर्फ ५ अर्ब ४० करोड ६१ लाख रुपैयाँ विनियोजन भएकोमा ७३ दशमलव ६० प्रतिशत अर्थात् ३ अर्ब ९७ करोड ८९ लाख रुपैयाँ खर्च भएको छ । गण्डकी प्रदेश सरकारले आर्थिक वर्ष २०७५÷७६ मा कूल रकममध्ये जम्मा ५९ प्रतिशत मात्र बजेट खर्च गरेको छ । प्रदेश सरकारको खर्चको प्रभाव थोरै भएपनि कास्की जिल्लामा देखिएको छ ।

प्रकाशित मिति: बुधबार, साउन ८, २०७६ ०१:२१