इकोलोजिस्टलाई प्रश्नः जंगली जनावर बस्तीमा किन पस्छन् ? (भिडियो)

A+ A A-

बुधबार राति काठमाडौंको नागार्जुन नगरपालिका– ८, भीमढुङ्गास्थित स्थानीय पञ्चकुमार भट्टराईको घरमा चितुवाले आक्रमण गर्दा पाँच जना घाइते भए । काठमाडौंको शहरी क्षेत्रमा यसअघि पनि चितुवा पसेका उदाहरण पाइन्छन् । अझ राष्ट्रिय निकुञ्जआसपासका क्षेत्रमा जंगली जनावरको आक्रमणबाट मानिसको मृत्यु भएको खबर नौलो होइन । पछिल्लो समय बर्दिया राष्ट्रिय निकुञ्ज क्षेत्रमा बाघको आक्रमणमा परी थुप्रैले ज्यान गुमाएका छन् ।

जंगली जनावर किन गाउँ वा शहर छिर्छन् भन्ने प्रश्नमा राष्ट्रिय निकुञ्ज तथा वन्यजन्तु आरक्ष विभागका इकोलोजिस्ट गणेश पन्त ‘सामान्यत: जंगली जनावर खानाको खोजीमा बस्ती पस्ने’ बताउँछन् । उनका अनुसार जंगली जनावर सामान्य अवस्थामा बस्तीमा पस्दैनन् । जंगलमै बस्न रुचाउँछन् । खाना र पानीको अभाव तथा उचित आवास क्षेत्र नहुँदा मात्र उनीहरू जंगलबाट बाहिर निस्कने हुन् ।

हात्ती र बँदेलजस्ता साकाहारी जनावरहरू भने धान, केरा वा अन्य बालीहरू खानका लागिसमेत बस्ती पस्ने गर्छन् । यसको मूल कारण भनेकै जंगलमा आहारा अभाव हुनु हो । अर्काेतर्फ सम्बन्धित जनावरको संख्या वृद्धि भएपछि पनि उनीहरू जंगलबाट बाहिर निक्लने इकोलोजिस्ट पन्त बताउँछन् ।

जंगली जनावरले हत्तपत्त मानिसलाई आक्रमण गर्दैनन् । पन्तका अनुसार मानिस मांसहारी जंगली जनावरको आहारा होइन । तर, जम्काभेटमा पर्नु, उनीहरूलाई जिस्क्याउनु, जनावरको बासस्थानमा मानिसको अतिक्रमण बढ्नुजस्ता कारणले गर्दा नै उनीहरूले मानिसलाई आक्रमण गर्छन् ।

जंगली जनावरले मानिसलाई सबैभन्दा बढी साँझ र बिहानको झिसमिसेमा आक्रमण गर्ने इकोलोजिस्ट गणेश पन्तको भनाइ छ । त्यसैले जंगली जनावरको प्रभाव रहेका क्षेत्रमा साँझ र बिहानको समयमा बढी सतर्क हुनुपर्ने उनी बताउँछन् ।

हेर्नुस्, जंगली जनावर किन गाउँबस्तीमा पस्छन् तथा उनीहरूको आक्रमणबाट बच्न के गर्ने भन्ने विषयमा राष्ट्रिय निकुञ्ज तथा वन्यजन्तु आरक्ष विभागका इकोलोजिस्ट गणेश पन्तसँग कुराकानी गरेर तयार पारिएको भिडियोः

प्रकाशित मिति: बिहीबार, असार ३०, २०७९ १७:५३