जब चिनियाँ नेता लिउ विद्यार्थीलाई भात खुवाउन विद्यालयमा पुगे

तस्वीर : रासस

A+ A A-

सोमबार बिहानैदेखि काठमाडौं महानगरपालिका– २० स्थित शान्ति निकुञ्ज माध्यमिक विद्यालयमा रमझम थियो । विद्यार्थीका लागि खानपानको व्यवस्था विद्यालयमै थियो । कक्षाकोठामै पाकेकोे थियो, खाना । विद्यार्थीहरू रमाएर विद्यालय आएका थिए । शिक्षक र अभिभावक पनि बिहानै विद्यालय पुगेका थिए ।

कारण हो, विद्यार्थीलाई खाना खुवाउन चिनियाँ कम्युनिस्ट पार्टीका विदेश विभाग प्रमुख लिउ जियानचाओ आउँदै थिए । उनको स्वागतका लागि बिहानैदेखि विद्यालय प्रशासनले तयारी थालेको थियो । लिउको टोली साढे १० बजे विद्यालयको प्राङ्गणमा पुग्यो । विद्यार्थी र शिक्षकले ताली बजाएर उनलाई स्वागत गरे । लिउ पनि नमस्कार गर्दै विद्यालयमा छिरे ।

‘चिनियाँ टोली ११ बजे आइपुग्ने तालिका थियो तर उहाँहरू साढे १० बजे नै आइपुग्नुभयो,’ विद्यालयका प्रधानाध्यापक राधेश्याम प्रधानले भने । लिउको टोली आउने खबर विद्यालयले बिहीबार थाहा पाएको थियो । ‘एक हप्ताअघिसम्म हामीलाई उहाँ आउने थाहा नै थिएन,’ प्रधानाध्यापक प्रधानले भने, ‘ग्लोबल डेभलपमेन्ट तथा साउथ–साउथ कोपरेसन फाउन्डेसनले बिहीबार मात्र जानकारी गराएको हो ।’

उनले विद्यार्थीलाई आफैँ खाना पस्केर खुवाए । कक्षा कोठामा पुगेर उनले विद्यार्थीलाई साथीको व्यवहार गरेका थिए । उनले विद्यार्थीसँग फोटोसमेत खिचेका थिए । ‘विद्यार्थीलाई उहाँले आफैँ खाना पस्केर खुवाउनुभयो । हामी गौरवान्वित भएका छौँ,’ प्रधानाध्यापक प्रधाने भने ।

तस्वीर : रासस

किन पुगेको थियो लिउको टोली ?

‘स्माइलिङ चिल्ड्रेन’ परियोजनाको उद्घाटन गर्न लिउसहित ऊर्जा, जलस्रोत तथा सिँचाइमन्त्री पम्फा भुसाल विद्यालयमा पुगेका हुन् । विद्यार्थीलाई खाना खुवाएर परियोजनाको सुरुवात गरिएको हो । हाल नेपालका ३५ विद्यालयमा परियोजना सुरु गरिएको छ । र, ५ लाख बालबालिका लाभान्वित भइरहेका छन् । उक्त परियोजना ग्लोबल डेभलपमेन्ट तथा साउथ–साउथ कोपरेसन फाउण्डेसनमार्फत नेपालको शैक्षिक क्षेत्रमा सञ्चालन हुँदै आएको छ ।

कार्यक्रममा विदेश विभाग प्रमुख जियानचाओले नेपाल चीनको असल छिमेकी रहेको भन्दै प्रशंसा गरे । उनले भने, 'नेपाल चीनको असल छिमेकी साझेदार हो । दुई देशबीचको सम्बन्ध जनस्तरमा थप विस्तार हुँदै जाने विश्वास छ ।’ उनले चीन र नेपालका विद्यार्थीलाई साथी बनाउन चाहेको समेत बताए ।

तस्वीर : रासस

‘बालबालिका नेपाल–चीन मितेरीका भविष्य हुन् । बालबालिकाको खुसीले दुई देशको सम्बन्धमा नयाँ आयाम थप्न सहयोग गर्छ,’ उनले भने, ‘सम्बन्धलाई अझ मजबुत बनाउँछ । उहाँहरू नेपाल–चीन सम्बन्धको नयाँ बिउ हो ।’

चिनियाँ भाषामा बोलेका उनले दोभासेले नेपालीमा उल्था गरेका थिए । त्यसपछि विद्यार्थी र शिक्षकले ताली बजाएर उनको कुरालाई अनुमोदन गरेको दृश्य पनि रोचक देखिन्थ्यो । ‘चिल्ड्रेन स्माइल’ कार्यक्रम चिनियाँ राष्ट्रपति सी चिन फिङले सुरु गरेको समेत उनले स्मरण गराएका थिए ।

कार्यक्रममा मन्त्री भुसालले पनि चीनको सहयोग आवश्यक रहेको बताइन् । उनले नेपालको विकासका लागि सहयोग मागिन् । ‘हामीलाई चीनको सहयोग आवश्यक छ,’ उनले भनिन्, 'शताब्दीऔँदेखि नेपाल–चीनबीच जनस्तरको सम्बन्ध प्रगाढ रहँदै आएकाे छ । दुई देशबीचको मैत्रीपूर्ण सम्बन्ध अझ प्रगाढ बन्दै गएको छ ।’

करिब डेढ घण्टा विद्यालयमा बिताएर चिनियाँ विदेश विभाग प्रमुखको टोली फर्किएको थियो । लिउको टोली आइतबार नेपाल आएको हो ।