सुदूरपश्चिम प्रदेशसभा बैठक अनिश्चित, सुरु भएन बजेटमाथिको छलफल

A+ A A-

सुदूरपश्चिम प्रदेशसभामा बजेटमाथिको छलफल अझै अनिश्चित बनेको छ । असार मसान्तभित्र बजेट पारित गरिसक्नुपर्ने कानुनी व्यवस्था भए पनि बजेट ल्याएको चौथो साता बित्दा पनि छलफल सुरु हुन नसकेको हो ।

बजेटलाई लिएर सत्तापक्षीय दलभित्रै चर्को असन्तुष्टि देखिएपछि संसद बैठक नै बसेको छैन । कार्य व्यवस्था परामर्श समितिका बैठकमा सत्ता पक्षकै सांसदले बजेट संशोधन हुनुपर्ने अडान राखेपछि बजेटमाथिको छलफलका लागि बोलाइएका संसदका तीनवटा बैठक स्थगित भएका छन् ।

यही १६ असारका बोलाइएको पछिल्लो बैठक पनि स्थगित भएपछि संसद सचिवालयले संसद बैठक अनिश्चितकालका लागि स्थगित गरिएको सूचना जारी गरेको छ । बजेटमाथिको छलफलका लागि संसद सचिवालयले असार ८, १२ र १६ गते संसद बैठक बोलाएको थियो ।

कार्यव्यवस्था परामर्श समितिको बैठकमा सांसदहरूले बजेट संशोधन हुनुपर्ने अडान राखेपछि १६ असारमा बोलाइएको बैठक पनि अन्तिम समयमा स्थगित गरिएको थियो । कतिपय सम्पन्न भएका योजनामा पनि बजेट हालिएको, कतिपय योजना दोहोरिएका भन्दै सांसदहरूले तिनलाई सच्याउनुपर्ने माग बैठकमा गरेका थिए ।

सरकारको लापरबाहीका कारण बजेटमाथिको छलफल अघि बढ्न नसकेको सत्तापक्ष सांसदहरूले बताएका छन् । ‘अहिले बजेटमाथिको छलफल अघि बढ्न सकेको छैन । सरकारले नै छलफल अघि बढाएको छैन’, प्रदेशसभा सदस्य दुर्गा विकले भनिन् । सरकारकै कमजोरीका कारण सभा अघि बढ्न नसकेको उनले बताइन् ।

आर्थिक मामिला मन्त्री प्रकाश रावलले सरकारकै कमजोरीका कारण बजेटमाथिको छलफल अनिश्चित रहेको बताए । सत्ताको नेतृत्व गरिरहेको नेकपा माओवादी केन्द्र तथा सत्तासाझेदार नेपाली कांग्रेस र नेकपा एकीकृत समाजवादीभित्रै बजेटलाई लिएर चर्को असन्तुष्टि छ ।

सत्तारुढ दलका सांसदले सार्वजनिक रुपमै बजेटको चर्को आलोचना गरिरहेका छन् । आफ्नै पार्टीका आर्थिक मामिला मन्त्री रावलले ल्याएको बजेटमा एकीकृत समाजवादीका अधिकांश सांसदको असन्तुष्टि छ । बजेट संशोधन गर्नुपर्ने दवाव उनीहरूले दिइरहेका छन् ।

माओवादी केन्द्रका प्रदेशसभा सदस्य महेशदत्त जोशीले बजेटमा देखिएका त्रुटिहरू सच्याइनुपर्ने बताएका छन् । संसदीय दलको बैठकमा पनि आफूहरूले बजेटका त्रुटिहरू सच्याएर जानुपर्ने धारणा राखेको उनले बताए । केही दिनअघि भएको दलको बैठकमा मुख्यमन्त्री भट्टले बजेटको समर्थन गर्न आफ्नो पार्टीका सांसदलाई आग्रह गरेका थिए । ‘हामीले यो बजेटको प्रशंसा गर्न सकिँदैन, त्रुटिहरू सच्याउनुपर्छ भन्यौँ,’ जोशीले भने, ‘बैठकमा बजेटको पक्षमा बोल्ने भन्ने कुरा भएको थियो ।’

बैठक स्थगित गरेर सरकारले सत्तापक्षकै असन्तुष्ट सांसदहरूलाई मनाउन छलफल गरिरहेको कांग्रेसका प्रदेशसभा सदस्य भरतबहादुर खड्काले बताए । गत १६ असारमा भएको कार्य व्यवस्था परामर्श समितिको बैठकमा अधिकांश सदस्यले बजेट परिस्कृत नगरेसम्म छलफल हुन नसक्ने अडान लिएको बताए ।

‘कमिसनका लागि विचौलियाको सेटिङ्गमा बजेट ल्याइएको छ । बजेटले आर्थिक अनुशासनको पालना गरेको छैन’, उनले भने, ‘यसलाई सच्याउनुपर्छ भन्नेमा हामी एकमत छौँ ।’ सत्तापक्षकै सांसदले विरोध गर्न थालेपछि प्रदेशसभामा बजेटमाथिको छलफल सुरु हुन सकेको छैन ।

बिचौलियाको सेटिङ्गमा बजेट ल्याइएको आरोप लगाउँदै प्रमुख प्रतिपक्षी एमालेले पनि बजेट संशोधन नभएसम्म सदन सञ्चालन हुन नदिने अडान लिएको छ । आर्थिक मामिलामन्त्री रावलले १ असारमा आगामी आर्थिक वर्ष २०७९/८० का लागि ३६ अर्ब ७४ करोड ६४ लाख ६५ हजारको बजेट सदनमा प्रस्तुत गरेका थिए ।

प्रकाशित मिति: आइतबार, असार २६, २०७९ १५:३९