मलेसियाली कम्पनी बेस्टिनेटमा छापा, यो कम्पनीले नेपालबाट प्रति–कामदार ५२ सय ठग्छ

मलेसियाली कम्पनी बेस्टिनेटमा छापा, यो कम्पनीले नेपालबाट प्रति–कामदार ५२ सय ठग्छ

A+ A A-

विदेशी कामदारमाथि आर्थिक भार बोकाउँदै आएको मलेसियाली कम्पनी बेस्टिनेटको मलेसियाको राजधानी क्वालालम्पुरस्थित मुख्यालयको भवनमा बुधबार त्यहाँको भ्रष्टाचारविरोधी आयोगले छापा मारेको छ ।

बेस्टिनेट नामक उक्त कम्पनीले कामदार भर्ना लिने २५ वटा बंगलादेशी कम्पनीलाई दोहोरो मापदण्ड अपनाउँदै छनोट गरेको आरोपमा ‘मलेसियन एन्टी करप्सन कमिसन’ले छापा मारेको समाचार बंगलादेशको ‘द बिजनेस पोस्ट’ले छापेको छ ।

दोहोरो मापदण्ड अपनाउँदै बेस्टिनेट कम्पनीले बंगलादेशी एजेन्सीहरूलाई कामदार छनोटका लागि अनुमति दिएको अभियोगमा कम्पनीका प्रमुख मोहम्मद अमिन अब्दुल नोरलाई भने जेलमा छन् । उनले नेपालमा समेत स्वास्थ्य र बायोमेट्रिकका नाममा कामदार ठग्दै आएका थिए ।

बेस्टिनेटका प्रमुख अमिनलाई कठघरामा राखिएको एक वर्ष भएको द बिजनेस पोस्टले जनाएको छ । उनी बंगलादेशी नागरिक हुन् ।

बेस्टिनेट नामक कम्पनी मलेसियामा विदेशी कामदारको केन्द्रीकृत प्रबन्ध प्रणाली (एफडब्लूसीएमएस) सरकारलाई प्रदान गर्ने र सञ्चालन गर्ने फर्म हो । तर, पछिल्लो समय यो कम्पनी रोजगारीका लागि भित्रिने विदेशी कामदारको बायोमेट्रिक र स्वास्थ्य परीक्षणका लागि त्यहाँको सरकारसँग मिलेर सिन्डिकेटको काम गर्दै आएको छ ।

मलेसियाका राजनीतिकर्मी, पूर्वश्रममन्त्री र अन्य मन्त्रीहरूसँगको मिलेमतोमा बेस्टिनेटले विदेशी कामदार धेरै भित्रिने देश नेपाल, बंगलादेश र इन्डोनेसियाका केही व्यक्तिसँग मिलेर स्वास्थ्यका नाममा सिन्डिकेट लगाई ठगी गर्दै आएको मलेसियन न्युजपोर्टल ‘द भाइब्स’ले जनाएको छ ।

मलेसियन एन्टी करप्सन कमिसनले क्वालालम्पुरस्थित बंगलादेशको उच्चायोगका श्रम अट्याची मोहम्मद नाज्मस सदात सलिमसँग पनि भेटेर सोधपुछ गरेको छ । २५ वटा बंगलादेशी कम्पनीको छनोटमा बंगलादेशी दूतावासको भूमिकामाथि त्यस क्रममा आयोगका अधिकारीहरूले सोधपुछ गरेको द भाइब्सले उल्लेख गरेको छ ।

गत ८ जूनमा मलेसियाका विपक्षी नेता अनवर इब्राहिमले प्रधानमन्त्री इस्माइल साबरी याकुबलाई बेस्टिनेट तथा अर्को प्रवासी कामदार आपूर्तिकर्ता कम्पनी ‘अल्ट्रा किराना एसडीएन’माथि कारबाही गर्न आग्रह गरेको थियो । उनीहरूको पनि बेस्टिनेटबाट कमिसन लिने गरेको आयोगको अनुसन्धानमा देखिएको थियो ।

राजनीतिक कनेक्सनको फाइदा उठाउँदै अमिनले मलेसियामा आप्रवासी कामदार प्रवेश गराउने सबै अनलाइन प्रणाली हत्याएका छन् । बेस्टिनेटका मालिक अमिनको मलेसियामा ठूलो राजनीतिक कनेक्सन भएकाले उनको सिन्डिकेट तोड्न सरकारले पनि सकेको छैन ।

नेपालको सिन्डिकेटसँग कनेक्सन

नेपालमा स्वास्थ्य व्यवसायी महासंघमा आबद्ध व्यवसायीले मात्र मेडिकल गर्न पाउने व्यवस्थाको सुरुवात बेस्टिनेट कम्पनीकै कारण सुरु भएको रोजगार व्यवसायीहरूको आरोप छ ।

बंगलादेशमा कामदार छनोटमा सिन्डिकेट नेपालमा पनि चलाउन बेस्टिनेटले प्रयास गरिरहेको थियो । जसका लागि बेस्टिनेटका केही कर्मचारीले नेपालमा राजनीतिक पहुँच पनि खोजेको र उनीहरूले केही व्यवसायी, श्रम सचिव र पूर्वश्रममन्त्रीसँग छलफलसमेत गरेको व्यवसायीको दाबी छ ।

हाल मलेसिया जाने कामदारको मेडिकल रिपोर्टमा बेस्टिनेटको सिन्डिकेट कायम भइसकेको प्रगतिशील वैदेशिक रोजगार व्यवसायी मञ्च नेपालका अध्यक्ष राजेन्द्र भण्डारीले बताए ।

मलेसियाले कामदार लिन अनलाइनमार्फत काम गर्नुपर्ने र अनलाइनको सफ्टवेयर बेस्टिनेटकै चलाउनुपर्ने प्रावधान सोही कम्पनीको घुसपैठका कारण लागू गरिएको थियो । २०७५ सालका तत्कालीन श्रममन्त्री गोकर्ण विष्टले कारबाही गरेको मेडिकल बेस्टिनेटको सञ्चालन अमिनले नै गरेका थिए ।

सिन्डिकेट लागू नभएसम्म नेपाली कामदारलाई मलेसिया जान नदिन बेस्टिनेटले अनेक प्रयास गरिरहेको मञ्चका अध्यक्ष भण्डारीले बताए । ‘बेस्टिनेटको सहयोगमा नेपालमा पनि मेडिकल गर्न सिन्डिकेट लागू भएको थियो । यसका सरकारकै केही व्यक्तिको सहयोगमा सफ्टवेयरबाट नेपालमा कामदारको मेडिकल हुन थाल्यो,’ उनले भने, ‘पहिला मलेसिया जाने कामदारको स्वास्थ्य परीक्षण २०५ वटै मेडिकलबाट हुन्थ्यो । तर, २०७० सालयता भने बेस्टिनेटसँग मिली सिन्डिकेट गराएर ३९ वटा स्वास्थ्य व्यवसायी संस्थाहरूलाई मात्र मेडिकल गर्न दिइयो ।’

मलेसिया जाने कामदारले मेडिकल गर्दा हाल स्वास्थ्यका लागि करिब ५६ सय रुपैयाँ बुझाउनुपर्छ । कामदारले स्वास्थ्य मेडिकल गर्दाको ३ हजार २ सय भने मलेसियाको बेस्टिनेट कम्पनीमै अवैध बाटोबाट गइरहेको श्रम मन्त्रालयले स्रोत जनाएको छ ।

यस्तै, बायोमेट्रिकका नाममा मलेसिया जाने कामदारले ३ हजार ५ सय रुपैयाँ तिर्नुपर्छ । जसमा २ हजार १ सय मलेसियाको बेस्टिनेट कम्पनीमा अवैध रूपमा जाने गरेको मन्त्रालयले जानकारी दियो ।

मलेसिया रोजगारीमा जाने कामदारसँग बेस्टिनेटले बिनाकारण ५ हजार २ सय रुपैयाँ आर्थिक भार बोकाउने गरेको श्रम मन्त्रालयका अधिकारीहरूले बताइरहेका छन् ।

बेस्टिनेट कम्पनीसँग नेपालमा स्वास्थ्य व्यवसायी महासंघका अध्यक्ष कैलाश खड्काले स्वास्थ्य र बायोमेट्रिकको काम गर्दै आएका छन् । खड्काकै महासंघमार्फत बेस्टिनेटमा पैसा जाने गरेको व्यवसायीले आरोप लगाउँदै आएका छन् ।

प्रकाशित मिति: आइतबार, असार २६, २०७९ १२:५०