प्रदेश ५ सरकारद्वारा दुईवटा कार्यविधि स्वीकृत

मन्त्रिपरिषद्को निर्णय सार्वजनिक गर्दै प्रदेश ५ सरकारका प्रवक्ता बैजनाथ चौधरी । तस्बिर : विकाश पराजुली/शिलापत्र

A+ A A-

प्रदेश ५ को मन्त्रिपरिषद् बैठकले दुई वटा कार्यविधि स्वीकृत गरेको छ । सोमबार बसेको बैठकले खानेपानी सरसफाई तथा स्वच्छता (वास) कार्यविधि र शैक्षिक परामर्श सेवा तथा भाषा शिक्षणसम्बन्धी कार्यविधि स्वीकृत गरेको हो । त्यसबोहक उद्योग पर्यटन वन तथा वातावरणमन्त्री लिला गिरीको नेतृत्वमा चीन भ्रमणमा जाने सदस्यहरुको भ्रमण स्वीकृत गरेको छ ।

भ्रमणमा मन्त्री गिरीसहित प्रदेशसभा सदस्यहरु दधिराम न्यौपाने, सरास्वती गौतम, निर्मला क्षेत्री, बाबुराम गौतम, मुख्यमन्त्री तथा मन्त्रिपरिषद्को कार्यालयका सचिव बसन्त अधिकारी, उद्योग पर्यटन वन तथा वातावरण मन्त्रालयका सचिव धनञ्जय पौडेल, मुख्यमन्त्री तथा मन्त्रिपरिषद्को कार्यालयका कृष्ण केसी र लुम्बिनी अञ्चल अस्पतालका डा. सागर न्यौपानेको भ्रमण बैठकले स्वीकृत गरेको हो । त्यस्तै सैनामैना नगरपालिका र चीनको गान्सु प्रान्तअन्तर्गत भगिनी सम्बन्ध कायम गर्न नेपाल सरकारलाई स्वीकृत पठाउने निर्णय पनि बैठकले गरेको छ ।

खानेपानी सरसफाई तथा स्वच्छता (वास) कार्यविधिमा सबै गाउँपालिकाले बासको कार्यविधि बनाउनुपर्ने उल्लेख गरिएको छ । यसको अनुगमन नियन्त्रण भने भौतिक पूर्वाधार मन्त्रालयअन्तर्गत खानेपानी महाशाखाले गर्ने सरकारका प्रवक्ता बैजनाथ चौधरीले बताए ।

सो कार्यविधिमै खानेपानीका लागि आवश्यक निवेदन हाल्न एप निर्माण हुनेछ । उक्त एपको माध्यमबाट उपभोक्ता खानेपानीका लागि आवश्यक निवेदन दिन मन्त्रालय धाउनुपर्ने बाध्यता अन्त्य हुने उनको भनाइ छ । त्यसैगरी शैक्षिक परामर्श सेवा तथा भाषा शिक्षणसम्बन्धी कार्यविधिमा कन्सल्टेन्सीहरुले सेमिनारका लागि केन्द्रमा दिनुपर्ने निवेदन प्रदेश सरकारमा दिए मात्र पुग्ने गरी कार्यविधि बनाइएको छ ।