युराेपकाे सपना देखेर दिल्लीका काेठीमा पुग्दैछन् नेपाली युवती, सरकार रमिते

A+ A A-

नुवाकोटकाे विदुर नगरपालिका सिर्जनानगरकी कमला अधिकारी (नाम परिवर्तन) रोजगारीका लागि नर्वे जान गत फागुन महिनामा भारतको राजधानी दिल्ली पुगिन् । अधिकारी एजेन्टमार्फत नर्वे वैदेशिक रोजगारीमा जान भनेर दिल्ली पुगेको चार महिना भयो । तर, नर्वे पठाउँछु भनेर दिल्ली पुर्‍याउने एजेन्ट जमुना घिमिरे सम्पर्कविहीन भएपछि उनी दिल्लीमै अलपत्र अवस्थामा बसेकी छिन् । हाल, उनी एक नेपालीले दिल्लीमै सञ्चालन गरेको होटलमा काम गर्दै बसेकी छिन् ।

नेपालमा पर्यटक गाइडको काम गर्दै आएको अधिकारीको अंग्रेजी राम्रै थियो । उनीले त्रिचन्द्र क्याम्पसबाट बिए गरेपछि पर्यटक गाइडकाे काम गर्दै आएकी थिइन् । अधिकारी पुतलीसडकस्थित जेनिका कन्सल्टेन्सीमा अन्तर्वार्ता दिएर छनोट भएपछि वैदेशिक रोजगारीमा नर्वे जान उनै घिमिरेसँग दिल्ली पुगेकी हुन् ।

भारतमा रहेका नेपालीहरूको संस्था मिसन नेपाल संस्थामार्फत सम्पर्कमा आएकी अधिकारीले एजेन्ट जुमनाले ५ लाख रुपैयाँ लिएर दिल्लीबाटै फरार भएको जानकारी दिइन् । एजेन्ट हराएपछि नेपालमा बुझ्दा घिमिरेको कन्सल्टेन्सी दर्ता नै नगरी ठगी गर्ने उद्देश्यले खोलेको रहेछ भन्ने थाहा पाएको उनी बताउँछिन् ।

आफू मात्र होइन, एजेन्ट घिमिरेले अन्य २५ जनाभन्दा धेरैलाई नर्वेमा वैदेशिक रोजगारीमा पठाउने आश्वासन देखाएर दिल्लीमा ल्याएर अलपत्र पारेर भागेको अधिकारीले बताइन् । ‘रोजगारीका नाममा तस्करीमा परेका नेपाली महिलाहरू धेरै दिल्लीका गल्लीमा दैनिक एजेन्ट खोज्दै हिँडेको देखिन्छ । दिल्लीमा धेरै नेपालीहरू रोजगारीका नाममा ठगिएर बसेका छन् । उनीहरू न घर फर्किन सक्छन् न त विदेश नै जान सक्ने अवस्था छ । यहाँभन्दा विजोग हुने ठाँउ छैन’, उनले भनिन्, ‘दिल्लीको गल्लीभित्र वैदेशिक रोजगारीमा हिँडेका नेपाली महिलाहरूको समस्या कसैले सुन्दैन । कतिपय महिलाहरू खर्च नभएपछि बाध्यताले कुबाटो रोजेका छन् । कतिपय महिलालाई एजेन्टले नै ल्याएर शारीरिक शोषण गरिरहेको र गर्न बाध्य बनाएकाे सुनाउँछन् ।’

दिल्लीका गल्लीमा आँसु पुस्दै दैनिक सयौँ महिला घुमिरहेका हुन्छन् । उनीहरू पनि विदेशीन एजेन्टमार्फत दिल्ली आएको र यसरी ठगिएको महिलालाई खाडीका देश, युरोप र अप्रिकी पठाइदिने प्रलोभन देखाएर एजेन्टले ३ लाख रुपैयाँसम्म ठगी गरेको उनको भनाइ छ ।

अधिकारीले भन्ने नेपालीहरूको सहयोग लिएर दिल्लीमा अलपत्र परेका महिलाहरूलाई उद्धार गर्न पहल गरिरहेकी छिन् । नर्वे जान आफूले करिब ७ लाख रुपैयाँ फसाएकाे उनकाे भनाइ छ ।

उनले दिल्लीबाटै जुमना घिमिरेको नाममा मानव बेचबिखन गरेको अभियोगमा मानव बेचबिखन अनुसन्धान ब्युरोमा उजुरी समेत गरेकी छिन् ।

अधिकारीसँगै काठमाडौं नेपालटारकी सरिता महर्जन (नाम परिवर्तन) दिल्लीमा अलपत्र परेर बसेकी छिन् । उनी पनि अधिकारीले काम गर्दै बसेको नजिकैको नेपालीकै एक होटलमा काम गरिरहेकी छिन् । महर्जन पनि एजेन्टमार्फत माल्टा जाने भन्दै दिल्ली पुगेकी हुन् । उनलाई काभ्रे घर बताउने जीतेन्द्र तामाङले माल्टाको एक होटलमा वेटरको रोजगारीमा पठाइदिने भन्दै गत वैशाखमा दिल्ली पुर्‍याएका हुन् । तामाङ वैदेशिक रोजगारीमा युरोप र अफ्रिका पठाइदिन्छु भन्दै ठगी गरेको आरोपमा पटक–पटक जेल परेर छुटेकाे ब्युरो प्रहरीको रर्कडमा छ ।

क्यानडा, अमेरिका, युरोप, अष्ट्रेलियाजस्ता देशमा पठाउने भन्दै दलालहरूले लाखौँ रुपैया असुलेर अलपत्र पारेका वा पर्खन भन्दै एउटा कोठामा थुनेर धेरै नेपाली महिलाहरूलाई राखेका छन् ।

वैदेशिक रोजगारीमा जाने चक्करमा फसेका नेपालीहरू दिल्लीका शहरमा चक्कर लगाउन बाध्य छन् । कतिपय पुरुष दिनभरि एजेन्ट खोज्दै हिँडेर राति पार्कमा गएर सुत्ने गरेको उनको भनाइ छ ।

मानव तस्करीको अन्तर्राष्ट्रिय गिरोहबाट फसेका महिलाहरू दिनहुँ बाह्रखम्बा, पहाडगञ्जको भित्र रोड, गान्धीरोड, काश्मरी चोकमा भेटिने गरेको दिल्लीस्थित हेल्प नेपाली मिसनका कवि कार्कीले जानकारी दिए । बाह्रखम्बारोडस्थित नेपाली दूतावासमा दैनिक रोजगारीका नाममा दिल्लीमा फसेका नेपालीहरू समस्या लिएर पुग्ने गरेका छन् ।

‘नेपाल फर्किने अवस्था नभएका कतिपय महिला दिल्लीकै बारमा काम गर्न पुग्छन् । कतिपयलाई फ्ल्याट भाडामा लिएर विभिन्न तारे होटलमा सप्लाई समेत दलालले गर्छन् । हामीले यो विषयमा भारतमा रहेको नेपाली दूतावासलाई पटक–पटक जानकारी गराउँदै आएका छौँ’, उनले भने, ‘दिल्लीमा कोठीभन्दा पनि कोठा (फ्ल्याट) मा युवतीहरू बेचिने गरेका छन् । उनीहरूलाई भारतीय र नेपाली दलालले फ्ल्याट भाडामा लिएर जबरजस्ती यौन धन्दामा लगाइरहेका छन् । कतिपय मिशनको सम्पर्कमा आएका महिलाई उद्धार गरी स्वदेश पठाइएको छ ।’

वैदेशिक रोजगारीको प्रलोभनमा परी दैनिक १ सय २५ जनाभन्दा धेरै महिला अन्य देश जान दिल्ली पुग्ने गरेको श्रम, रोजगार तथा सामाजिक सुरक्षा मन्त्रालयले गरेको एक अध्ययन प्रतिवेदनमा उल्लेख छ ।

(तस्वीरहरू माइती नेपालबाट लिइएकाे हाे । )

प्रकाशित मिति: सोमबार, असार २७, २०७९ ०८:३९