इन्जिनियरिङ पेसा छाडेर कृषिमा रमेका गड्तौँला भन्छन्- पर्यटक लाेभ्याउने सपना छ

इन्जिनियरिङ पेसा छाडेर कृषिमा रमेका गड्तौँला भन्छन्- पर्यटक लाेभ्याउने सपना छ

A+ A A-

तेह्रथुम म्याङलुङ नगरपालिका– ५, पिप्लेका राजु गडतौँला कृषिलाई पर्यटन विकाससँग जोड्न लागिपरेका छन् । अध्ययनका हिसाबले हेर्ने हो भने उनी कम्प्युटर इन्जिनियर हुन् । विराटनगरबाट कम्प्युटर हार्डवेयर इन्जिनियरिङको जागिर छाडेर उनी अहिले गाउँमै कृषि पेसामा व्यस्त छन् ।

गडतौँलाले कृषिलाई पयर्टनसँग जोड्न पशुपालन, तरकारी, फलफूल खेती र होटल व्यवसाय सुरु गरे । कृषिलाई पर्यटनसँग जोड्न उनले डाउन हिल मल्टी फार्म प्रालिमा कृषिसँगै डाउन हिल कटेज नामको होटल पनि सञ्चालन गरेका छन् ।

‘करिब दुई दशक कम्प्युटर हार्डवेयर इन्जिनियरिङको काम गरेँ । त्यसपछि आफ्नै गाउँघरलाई कृषि पर्यटनमा जोड्नका लागि खेतीपाती र होटल व्यवसाय सुरु गरेँ,’ उनले भने, ‘फार्ममा बाख्रा, कुखुरा, माछापालन, एउटा तालिम हल, आधा दर्जन कटेज, वनभोजस्थल र दुई दर्जनभन्दा बढी आवश्यक संरचना छन् । यी सबै संरचना तयार गर्न करिब ४० लाख रुपैयाँभन्दा धेरै लगानी भएको छ ।’

पैसा कमाइभन्दा पनि आफू जन्मिएको गाउँमा कृषिक्षेत्रमा पर्यटन घुम्न आएको हेर्ने रहर उनको छ । यो व्यवसायमा पैसा पनि भएकाले उनले यो पेसा रोजेका हुन् । कृषि फार्मको बीचमा चाँडै स्वीमिङ पुल र चिल्ड्रेन पार्क पनि निर्माण गर्ने योजना उनले बनाएका छन् ।

फार्मको हरियालीमा रमाइलो गर्दै बालबालिका खेल्ने र पहाडको सुन्दर दृश्य हेर्दै स्वीमिङ गर्न मिल्ने गरी स्वीमिङ पुल बनाउन लागेको उनले जानकारी दिए ।

फार्ममा ६० वटा बाख्रा, १५ वटा खसी, ३ सयभन्दा बढी ब्रोइलर कुखुरा, १ सय २० वटा लोकल कुखुरा र ६ सयको हाराहारीमा माछा पालन गर्दै आएको गडतौँलाले जानकारी दिए । साथै, उनले पछिल्लो समय विभिन्न प्रकारको बेमौसमी तरकारी खेती र फलफूलको नर्सरीसमेत सुरु गरेका छन् ।

बाख्रा प्रतिगोटा ३० हजार, खसी ४० हजार, बोइलर कुखुरा साढे ३ सय र लोकल कुखुरा साढे ७ सय रुपैयाँमा फार्मबाटै बिक्री हुने गरेको र फार्ममा उत्पादन भएका बोकाखसी र कुखुरा होटलमै खपत हुने गरेको उनी बताउँछन् ।

उनको फार्म र होटलमा ७ जनाले रोजगारी पाएका छन् । कृषि पेसा र होटल सञ्चालनका लागि परिवारको साथ पाएको उनी बताउँछन् । ‘व्यवसाय गर्न थालेको करिब १८ महिना मात्र भयो । सबै खर्च कटाएर मासिक ७० हजार रुपैयाँसम्म बचत हुन्छ । आयस्रोत पनि फार्म र होटलमै लगानी गरिरहेको छु,’ उनले भने, ‘चिसो हावा अनि वारिपारि पहाडले घेरेको ठाउँ छ । त्यसमा पनि भिरालो जमिनमा कृषि फार्म खोलेको हुँदा आन्तरिक पर्यटकहरू फोटो खिच्दै चिया–कफी पिउँदै घुम्छन् । यहाँको विशेषता नै यही हो ।’

तेह्रथुमको सदरमुकाम म्याङलुङदेखि नजिकै रहेको पिप्लेमा व्यावसायिक रूपमा तालिम सञ्चालन गर्न हल र आवासको समेत सुविधा भएका कारण विभिन्न जिल्लाका धेरै संघसंस्थासँगै स्थानीय तहका प्रतिनिधिहरूसमेत कार्यक्रम गर्नका लागि होटलमा आउने गरेको उनले जानकारी दिए ।

आफ्नो कृषि फार्ममा उत्पादन भएको सामग्री होटलमा आएका ग्राहकलाई बनाएर खुवाउने गरेका कारण पनि धेरै आकर्षण बढेको उनी दाबी गर्छन् ।

होटलमा कृषि फार्ममा उत्पादन भएको ताजा तरकारी, खसी–बोकाको मासु र लोकल फलफूल पाइन्छ । फार्ममा उत्पादन भएका कृषिउपज आफ्नै होटलमा प्रयोग गर्ने भएका कारण सबै थोक अर्ग्यानिक हुने, जसले गर्दा सेवाग्राहीहरू खुसी भएर फर्किने गरेको उनको अनुभव छ ।

पछिल्लो समय उनको फार्ममा आन्तरिकका साथै बाह्य पर्यटकसमेत आउन थालेका छन् । सामान्य समयमा दैनिक ६०–७० जना, चाडपर्व, शुक्रबार–शनिबार २ सय जनाजति पर्यटक फार्म र होटलमा घुम्न आउने गरेको गडतौँलाले सुनाए । सरकारले बर्सेनि घोषणा गर्ने कृषिमैत्री योजना र बजेटबाट ग्रामीण भेगका किसानले लाभ लिन नपाएको उनको गुनासो छ ।

प्रकाशित मिति: बिहीबार, असार २३, २०७९ ०७:५४