प्रदेश ५ सरकारले किन्यो २९ करोडका गाडी

A+ A A-

प्रदेश नम्बर ५ का मन्त्रालय, प्रदेश सभा र न्यायाधिवक्ताको कार्यालयले आर्थिक वर्ष ०७५/०७६ मा २९ करोड २६ लाखको सवारी साधन खरिद गरेको छ ।

सवारी साधन खरिदको लागि प्रदेशका मन्त्रालय, प्रदेश सभा र न्यायाधिवक्ताको कार्यालयको लागि ३१ करोड ८८ लाखको बजेटको व्यवस्था गरेको थियो ।

प्रदेश ५ मा सबै भन्दा बढी प्रदेशसभा सचिवालयले ८ करोड ६१ लाख ६७ हजारको सवारी साधन खरिद गरेको छ भने सबैभन्दा कम प्रदेश न्यायाधिवक्ताको कार्यालयले ५९ लाख ६४ हजारको सवारी साधन खरिद गरेको छ ।

मुख्यमन्त्री तथा मन्त्री परिषदको कार्यालयले ३ वटा ५४ लाख ९९ हजार पर्ने निशान टेरानो खरिद गरेको छ । त्यसैगरी २ वटा ३८ लाख १० हजार पर्ने महिन्द्रा पिकअप र २ वटा ७० लाख ५० हजार पर्ने महिन्द्र स्कर्पियो सवारी खरिद गरेको छ ।

प्रदेश ५ को प्रदेश सभा सचिवालयले विषयगत समितीका सभापतिहरुका लागि ७ करोड ५४ लाखमा ११ ओटा टाटा स्ट्रोम र ११ वटै गाडिको डेकोरेसनको लागि ४ लाख ६३ हजार, सचिवलाई ५३ लाख ९५ हजार पर्ने निशानको टेरानो कार, ३५ लाख ८५ हजार पर्ने एउटा महेन्द्र पिकअप, कर्मचारीहरुलाई ७ लाख ५६ हजारको ४ ओटा बजाज कम्पनीको मोटरसाइकल र ५ लाख ६२ हजार पर्ने ३ वटा स्कूटी खरिद गरेको छ ।

मुख्यमन्त्री शंकर पोख्रेलले नै सम्हालेको आर्थिक मामिला तथा योजना मन्त्रालयले २ करोड ५० लाख बजेट छुट्याएकोमा १ करोड ५७ लाख सवारी खरिद तथा मर्मतमा खर्च गरेको छ ।

प्रदेशको आन्तरिक मामिला तथा कानुन मन्त्रालयले २ वटा महिन्द्रा स्कर्पियो र २ वटा बोलेरो पिकअप गरी ४ वटागाडी र सुजुकी कम्पनीको १० ओटा मोटरसाइकल र ५ वटा स्कुटर गरि १५ वटा दुई पांग्रे सवारी खरिद गरेको छ । सवारी खरिद गर्न २ करोड ३५ लाख रुपैया सकेको छ ।

त्यस्तै, प्रदेशको उद्योग, पर्यटन, वन तथा वातावरण मन्त्रालयले पनि सवारी खरिदमा ३ करोड १० लाख ४० हजार बजेट सकेको छ ।

मन्त्रालयलाई २ करोड ५० लाख बजेट विनियोजन गरिएकोमा सवारी खरिदको लागि बजेट अपुग भएपछि ६० लाख बजेट रकमान्तर गरी थप गरिएको हो ।

मन्त्रालयले मन्त्रीको लागि १ टाटा स्ट्रोम, सचिवको लागी १ डस्टर र २ वडा आफू मातहतका डिभिजन र निर्देशनालयलाई ३ ओटा गाडी खरिद गरेको छ । साथै मन्त्रालयले ४ वटा बजाज डिस्कभर र २ पल्सर गरि ६ वटा २ पांग्रे सवारी खरिद गरेको हो ।

प्रदेशको सामाजिक विकास मन्त्रालयले एउटा स्कर्पियो र मन्त्रालयका लागि ४ वटा महेन्द्र पिकअप खरिद गरेको छ । साथै मन्त्रालयले कर्मचारीहरुको लागि यमाहा कम्पनीका ५ वटा स्कूटी र १६ वटा मोटरसाइकल गरि २१ ओटा २ पांग्रे सवारी खरिद गरेको छ ।

भौतिक पूर्वाधार तथा यातायात मन्त्रालयले २ वटा महेन्द्र पिकअप र १२ वटा मोटरसाइकल खरिद गरेको छ । भूमि, कृषि तथा सहकारी मन्त्रालयल ७ वटा सवारी खरिद गरेको छ ।

त्यस्तै, कर्मचारीहरुको लागि ५ वटा स्कूटी र १२ वटा मोटरसाइकल गरि १७ ओटा दुई पांग्रे सवारी खरिद गरेको छ ।

त्यस्तै, प्रदेश न्यायधिवक्ताको कार्यालयले सवारी खरिदको लागि ७२ लाख बजेट पाएकोमा ४४ लाख ६० हजारको एउटा स्कर्पियो र १–१ स्कूटी र मोटरसाइकल गरि ५९ लाख ६४ हजारको सवारी खरिद गरेको छ ।

प्रकाशित मिति: सोमबार, साउन ६, २०७६ २०:३२