खेलमा भविष्य नदेखेपछि देश छोड्दै राष्ट्रिय खेलाडी, खेलकुद मन्त्रालय भन्छ- सुविधाबारे अध्ययन हुँदैछ

खेलमा भविष्य नदेखेपछि देश छोड्दै राष्ट्रिय खेलाडी, खेलकुद मन्त्रालय भन्छ- सुविधाबारे अध्ययन हुँदैछ

A+ A A-

राष्ट्रिय फुटबल टिमका तीन खेलाडी सन्तोष तामाङ, नवीन गुरुङ र दर्शन गुरुङ सोमबार एकसाथ अस्ट्रेलिया पुगे । सन्तोष टिमका मिडफिल्डर, नवीन डिफेन्डर र दर्शन फरवार्ड हुन् ।

उनीहरू तीनै जनाले अस्ट्रेलियाको स्थानीय क्बलबाट फुटबल खेल्न नेपाल छोडेका हुन् । उनीहरूलाई युनाइटेड एफसी मेलवर्नले अस्ट्रेलियामा स्वागत गरेको थियो ।

उनीहरू तीनै जना राष्ट्रिय टिममा अटाएका खेलाडीहरू हुन् । दर्शनले गत महिना एएफसी एसियन कप छनोटअन्तर्गत कुवेतविरुद्धको खेलमा नेपालका लागि गोल नै गरेका थिए ।

यसरी नेपालमा फुटबलरले आफ्नो भविष्य नदेखेर अस्ट्रेलिया पुगेको पहिलो घटना भने होइन । यसअघि पनि राष्ट्रिय टिमका अन्य पाँच जना खेलाडी अस्ट्रेलिया पुगेका थिए । राष्ट्रिय टिमका खेलाडी सुमन लामा र आशिष लामा अस्ट्रेलियामै छन् ।

त्यसअघि टिमका मिडफिल्डर हेमन गुरुङ, एनल न्यौपाने र बिमल बस्नेत पनि अस्ट्रेलिया हानिएका थिए । यसरी नेपालमा खेलकुद जगत्‌मा आफ्नो भविष्य नदेखेर विदेशिनेमा फुटबल खेलाडी मात्रै छैनन्, अरु खेलका खेलाडी पनि विदेशिने क्रम बढैको छ । ब्याडमिन्टनकी राष्ट्रिय खेलाडी रञ्जना भट्ट पनि खेलजीवन छाडेर विदेशिने तयारीमा छिन् । खेलक्षेत्रमा भविष्य नदेख्दा आफू विदेशिनुपरेको दु:खेसो उनले गरेकी छिन् । उनी क्यानडा जाने तयारीमा छन् ।

कञ्चनपुरकी भट्ट ५ कक्षा पढ्दैदेखि ब्याडमिन्टन खेल्न सुरु गरेकी थिइन् । पछिल्लो समय सशस्त्र प्रहरी बल (एपीएफ) तथा नेपाल आर्मी क्लबमा आबद्ध भएर १६ पटक राष्ट्रिय र पाँच पटक अन्तर्राष्ट्रियस्तरमा ब्याडमिन्टन खेलेको अनुभव उनीसँग छ ।

नेपालमा खेल्नुभन्दा आफ्नो भविष्य राम्रो बनाउने उद्देश्यले क्यानाडा जान लागेको भट्टले शिलापत्रलाई बताइन् । ‘मैले गेम धेरै खेलेँ । अहिले कुनै क्लबमा आबद्ध छैन । अब भविष्य बनाउन पढ्न क्यानाडा जान लागेकी हुँ,’ भट्ट भन्छिन् ।

यसअघि पनि विभिन्न खेलविधाका खेलाडीहरू विदेशिएका छन् । तेक्वान्दोका अधिकांश राष्ट्रिय खेलाडी खेलजीवन छोडेर विभिन्न देशमा सेक्युरिटी गार्डको रूपमा काम गर्न पुगेका छन् ।

राष्ट्रिय फुटबल टिमका पूर्वकप्तान राजुकाजी शाक्य खेल खेलेर जीवन धान्नै असहज हुन थालेपछि खेलाडी बाहिरिने गरेको बताउँछन् ।

‘हरेक खेलाडीले भविष्य हेरेको हुन्छ । खेल खेल्न सक्दासम्म मात्रै हाम्रो समाज र राष्ट्रले हेर्छ, मैदानबाहिर खेलाडीको अवस्था कस्तो हुन्छ, कसैलाई थाहा छैन । त्यस्तो अवस्थामा खेलाडीहरू कसरी खेल खेलेर नेपाल बस्छन्,’ शाक्य भन्छन् ।

यसअघि खेल्न भनेर विदेश पुगेका खेलाडी विदेशमै लुकेरसमेत बसेका थिए ।

नेपाल फुटबल संघ (एन्फा) का अध्यक्ष पंकजविक्रम नेम्वाङ भने खेलाडी नै राष्ट्रको सम्पत्ति भएको र आर्थिक रुपमा खेलाडी बलियो हुनुपर्ने बताउँछन् ।

हालै सम्पन्न एन्फाको चुनावमा समेत उनी खेलाडीलाई केन्द्रमा राखेर चुनावी मैदानमा उत्रिएका थिए ।

युवा तथा खेलकुद मन्त्रालयका प्रवक्ता सहसचिव विदुरप्रसाद खनाल भने पहिलाको तुलनामा अहिले सरकारले खेलाडीलाई केही भत्ता उपलब्ध गराएको र बाँच्न कठिन नभएको बताउँछन् ।

‘हामीले खेलाडीको उचित व्यवस्थापन गर्नुपर्छ भनिरहेका छौँ । त्यसबारेमा केही काम हुँदै नभएको पनि होइन । अहिले पनि खेलाडीको सेवासुविधाबारे अध्ययन भइरहेकाे छ । खेलाडीलाई नेपालमै खेल्ने र बस्ने वातावरण बन्छ,’ खनालले भने ।

प्रकाशित मिति: मंगलबार, असार २१, २०७९ १५:५०