मलेसियामा अवैध रूपमा बसेका विदेशी श्रमिकलाई पुनः प्रवेशमा प्रतिबन्ध लगाइँदै, ९० हजार नेपाली प्रभावित

मलेसियामा अवैध रूपमा बसेका विदेशी श्रमिकलाई पुनः प्रवेशमा प्रतिबन्ध लगाइँदै, ९० हजार नेपाली प्रभावित

A+ A A-

मलेसिया सरकारले अवैध रूपमा बसी स्वदेश फर्किने प्रक्रियामा सहभागी नभएका विदेशी कामदारलाई मलेसिया प्रवेशमा आजीवन प्रतिबन्ध लगाउने चेतावनी दिएको छ ।

मलेसियाले गत जून ३० तारिखमा समाप्त हुने गरी गैरकानुनी आप्रवासीलाई स्वदेश फर्किन ‘रिक्यालिब्रेसन प्रोग्राम’ सञ्चालन गरेकोे थियोे ।

उक्त कार्यक्रमअन्तर्गत मलेसियाका गृहमन्त्री हाम्जा जैनुद्धिनले २ लाख ४३ हजार २ सय ९७ जना अलेखबद्ध आप्रवासी स्वदेश फर्केको र २ लाख ८२ हजार ५ सय ६१ जना फर्किने प्रक्रियामा रहेको आप्रवासीको एक कार्यक्रममा सम्बोधन गर्दै जानकारी दिएका छन् । जसमा २० हजारभन्दा बढी नेपालीसमेत रहेको र उनीहरूको राहदानीसहित ट्राभल डकुमेन्ट बनाउने काम भइरहेको मलेसियास्थित नेपाली दूतावासले जनाएको छ । ‘रिक्यालिब्रेसन प्रोग्राम’मा सहभागी भएकाहरू स्वदेश फर्किरहेको दूतावासले जानकारी दिएको छ ।

यस्तै, मलेसियाको अध्यागमन विभागका महानिर्देशक खैरुल ड्जैमी दाउदले खोजतलासका क्रममा पक्राउ पर्ने अवैधानिक हैसियतमा बसेका विदेशी कामदारलाई विभागका डिटेन्सन सेन्टरमा थुनामा राखी आजीवन मलेसिया प्रवेश नपाउने गरी ‘डिपोर्ट’ गर्ने बताएका छन् । उनले मलेसियामा अवैध बसेका कामदारको समयावधि हेरी त्यस्तो नियम कार्यान्वयनमा ल्याउनेसमेत बताए ।

उनले अवैध बसेका करिब १५–१७ लाख विदेशी कामदारलाई मलेसिया फर्किन आजीवन प्रतिबन्ध लगाउन सकिनेसमेत जानकारी गराएका थिए । जसमा ९० हजारभन्दा बढी नेपालीसमेत पर्न सक्छन् ।

मलेसियाले गत नोभेम्बरमा विदेशी कामदारलाई वैधानिक भएर काम गर्न वा जरिवाना तिरेर स्वदेश फर्किन रिक्यालिब्रेन कार्यक्रम सार्वजनिक गरेकोे थियो । मलेसियामा अवैध रूपमा बसेका विदेशी कामदारका लागि आफ्नो देश फर्काउन मलेसियाली सरकारले यस्तो कार्यक्रम बर्सेनि ल्याउने गरेको छ ।

९० हजारभन्दा धेरै नेपाली पनि अवैध

मलेसियामा ९० हजारभन्दा धेरै नेपाली कामदारहरू पनि अवैध रूपमा बसेर काम गरिरहेको नेपाली दूतावासको अनुमान छ । दूतावासका अनुसार मलेसियामा करिब साढे ३ लाख नेपालीहरू छन् । योभन्दा बाहेक ९० हजारको हाराहारीमा श्रम अवधि सकिएका नेपाली मलेसियामै रोजगारदाता कम्पनीमा लुकेर काम गरिरहेको दूतावासले जनाएको छ ।

मलेसियामा धेरै नेपालीहरू अवैध रूपमा बसेर काम गरिरहेको र उनीहरूलाई राहदानीसँगै डकुमेन्ट बनाई स्वदेश फर्किन नियोगले पटक–पकट आग्रह गरिरहेको मलेसियाका लागि नेपाली कार्यवाहक राजदूत मोति श्रीषले जानकारी दिए ।

कोरोनाका कारण श्रमअवधि सकिएका धेरै नेपाली कामदार स्वदेश नफर्की अवैध भई काम गरिरहेको उनले बताए । ‘श्रम सम्झौता भए पनि ४ वर्षसम्म मलेसियाको रोजगारी बन्द भयो । त्यसका कारण नेपालीहरू फर्किन नपाउने डरले स्वदेश फर्किएनन् । धेरै कमाउने लोभमा पनि यहाँ अवैध हुन्छन् ।’ उनले भने, ‘मलेसिया रोजगारीका लागि आएका कतिपय कामदार अवैध भई रमाइलो गर्दै बसेका छन् । काम गरेर कमाएको पैसा यतै सकेर स्वदेश फर्किन नचाहनेहरू पनि छन् । यो पनि मुख्य समस्या हो ।’

उनका अनुसार मलेसियामा रोजगारीका लागि गएका महिला कामदार पनि अवैध बसेर रोजगारी गर्ने गरेको उनको भनाइ छ ।

मलेसियाले सुरु गरेको रिक्यालिब्रेसन कार्यक्रममा इन्डोनेसियाका कामदार ठूलो मात्रामा सहभागी भएका छन् । इन्डोनेसियापछि बंगलादेश र नेपालीहरू मलेसियामा धेरै अवैध रूपमा बस्ने गरेका छन् ।

रिक्यालिब्रेसन कार्यक्रममा सहभागी नेपालीको संख्या मलेसियाले कामदार भित्र्याउने अन्य देशको तुलनामा अत्यन्तै थोरै रहेकोे दूतावासले जनाएको छ । मलेसियामा अवैध रूपमा बसेको नेपाली कामदार घर फिर्ती कार्यक्रममा कमै मात्र सहभागी हुने गरेको दूतावासले बताउँदै आएको छ ।

मलेसियाबाट गएका ५ वर्षमा घर फिर्ती कार्यक्रममार्फत करिब ७० हजार नेपाली कामदार स्वदेश फर्किएको दूतावासको भनाइ छ ।

जेठ महिनामा मलेसिया जान ९ हजार ६ सय ४९ जना श्रम स्वीकृति लिएको वैदेशिक रोजगार विभागले जनाएको छ । हाल मलेसिया दैनिक ४ सयभन्दा धेरै कामदार रोजगारीका लागि जाने गरेको विभागले जनाएको छ ।

प्रकाशित मिति: आइतबार, असार १९, २०७९ १५:१५