राजपा अध्यक्ष मण्डलकाे संयाेजकबाट बिदा भए अनिल झा, अब राजकिशोरकाे पालाे

A+ A A-

राष्ट्रिय जनता पार्टी (राजपा) नेपालमा अनिल झाकाे संयोजक बन्ने पालाे सकिएकाे छ । राजापामा अध्यक्ष मण्डलको संयोजकको जिम्मेवारी गत ६ जेठदेखि सम्हालेका झाले औपचारिकताका लागि भएकाे जम्मा एउटा बैठककाे मात्रै अध्यक्षता गर्न पाए । दुई वर्ष दुई महिनाअघि मधेसकेन्द्रित ६ दल मिलेर गठन भएको राजपा अध्यक्ष मण्डलको प्रत्येक दुई महिनामा संयोजक आलोपालो गरेर परिवर्तन हुने गर्छ ।

गत ४ मंसिरमा राजापा अध्यक्ष मण्डलको संयोजक राजेन्द्र महतो हुने भनी अध्यक्ष मण्डलको बैठकले गरेको निर्णयप्रति असहमति राख्दै पहिलोपटक राजापा अध्यक्ष मण्डलको बैठक अनिल झाले बहिष्कार गरेको कारण उनीमाथिको असहयोगका कारण बैठक बस्न नसकेको एक पदाधिकारीले शिलापत्रलाई बताए ।

६ दल एकीकरण हुँदा तत्कालीन तराई मधेस लोकतान्त्रिक पार्टीका अध्यक्ष महन्थ ठाकुरलाई ठूलो दलको हैसियतले राजपा अध्यक्ष मण्डलको संयोजक बनाइएको थियो । तर, उनले सहमतिको आधारमा करिब डेढ वर्षसम्म संयोजक सम्हालेपछि गत ५ मंसिरदेखि राजेन्द्र महतो अध्यक्ष मण्डलको संयोजक बनेका थिए ।

तत्कालीन अध्यक्ष मण्डलको संयोजकको हैसियतले ठाकुरले चार महामन्त्री, तीन सहमहामन्त्रीसहित केन्द्रीय सदस्यमा गरेको नियुक्ति विवादमा परेपछि ४ मंसिर २०७५ मा भएको राजपा अध्यक्ष मण्डलको बैठकले बहुमतको आधारमा सबै मनोनयन रद्द गर्दै महतोलाई अध्यक्ष मण्डलको संयोजक बनाएको थियो ।

महतो अध्यक्ष मण्डलको संयोजक हुँदा बोलाएको अध्यक्ष मण्डलको बैठकसमेत सदस्य अनिल झाले केन्द्रीय कार्यालयको आफ्नै कक्षमा बसेर बहिष्कार गरेका थिए । कुनै बेला नेपाल सदभावना पार्टीको अध्यक्ष महतोले महामन्त्री झालाई पार्टीबाट निकालेका थिए । सोही बेलादेखि दुवै नेताबीचको तिक्तता हालसम्म पनि देखिएको छ ।

अध्यक्ष मण्डलको संयोजक भएपछि अनिल झाले पार्टी अध्यक्ष मण्डलको बैठक बसाउन गरिएको प्रयासलाई महतोको असहयोगका कारण सफल हुन सकेको थिएन ।

‘अध्यक्ष मण्डलको बैठक कसैले असहयोग वा अनुपस्थितिले गर्दा बस्न नबसेको होइन, ६ जना अध्यक्ष उपत्यकामा उपस्थित नभएर मात्रै हो,’ राजापा महासचिव केशव झाले भने, ‘हालै बाढीपहिरो र प्राकृतिक विपत्तिका कारण अध्यक्षहरु निर्वाचन क्षेत्रमै व्यस्त भएर तत्काल बैठक नबसेको मात्र हो ।’ उनका अनुसार झाकाे कार्यकालमा जनकपुरमा एउटा बैठक बसेकाे थियाे ।

राजपा अध्यक्ष मण्डलका सदस्य झालाई असहयोग गर्ने योजनामा अर्का अध्यक्ष शरतसिंह भण्डारी र महेन्द्र रायले पनि साथ दिएका छन् ।

अध्यक्ष मण्डल नै दुई गुटमा

७ वैशाख २०७४ मा तत्कालीन तमलोपा, सदभावना पार्टी, राष्ट्रिय मधेस समाजवादी पार्टी, तराई मधेस सदभावना पार्टी, मधेसी जनअधिकार फोरम (गणतान्त्रिक) र नेपाल सदभावना पार्टीबीच पार्टी एकता भएको थियाे ।

तत्कालीन ६ पार्टीका ६ अध्यक्ष नै अहिले राजपा अध्यक्ष मण्डलको संयोजक बनेका छन् । अध्यक्ष मण्डलका ६ मध्ये संसदीय दलको नेतासमेत रहेका महन्थ ठाकुरलाई अध्यक्ष मण्डलका अनिल झा र राजकिशोर यादवले साथ दिएका छन् ।

अर्कातिर, अध्यक्ष मण्डलका सदस्य राजेन्द्र महतोलाई भने शरतसिंह भण्डारी र महेन्द्र रायले समर्थन गरेका छन् । विगतमा एकै दलमा बसेका नेता भने यतिबेला फरक फरक गुटमा लागेका छन् ।

कुनै बेला कांग्रेसका कोषाध्यक्ष र सोही पार्टीबाट उपसभामुखसम्म भएका महन्थ ठाकुर र कांग्रेसबाट केन्द्रीय सदस्य र मन्त्रीसमेत भएका शरतसिंह भण्डारी राजेन्द्र महतोको गुटमा छन् । त्यस्तै, ठाकुर नेतृत्वको तत्कालीन तमलोपा फुटाएर तमसपा बनाएका महेन्द्र राय पनि ठाकुरइतरकाे गुटमा अर्थात् महतोको गुटमा लागेका छन् ।

यता, महतो अध्यक्ष भएको सदभावनाबाट कारबाहीमा परेका अनिल झा भने ठाकुरको गुटमा लागेका छन् । कांग्रेस पृष्ठभूमि भएर उपेन्द्र यादवको फोरममा लागेका राजकिशोर यादवले भने ठाकुरलाई साथ दिएका छन् ।

ठाकुर नेतृत्वको राजपा गुट सत्तारुढ नेकपाको कट्टर विरोधीका रुपमा कांग्रेससँग सहकार्य गर्दै सरकारलाई दबाबमा राख्ने अभियानमा लागेका छन् । तर, महतो भने सांगठनिक शक्ति आर्जन गर्न सिद्धान्त र विचार मिल्ने दलको आधारमा उपेन्द्र यादव नेतृत्वको समाजवादी पार्टीसँग एकीकरण गर्ने कसरतमा छन् ।

तत्कालीन सबैभन्दा ठूलो पार्टी तमलोपाको अध्यक्षको हैसियतले ठाकुरले डेढ वर्षसम्म अध्यक्ष मण्डलको संयोजक भएका थिए भने ५ मंसिरदेखि ५ माघसम्म दाेस्राे ठूलो दल सदभावना पार्टीको अध्यक्षको हैसियतले राजेन्द्र महतोले संयोजकको जिम्मेवारी सम्हालेका थिए ।

६ माघदेखि ५ चैतसम्म महेन्द्र राय तत्कालीन तमसपा अध्यक्षको हैसियतले राजपा अध्यक्ष मण्डलको संयोजक भएका थिए । ६ चैतदेखि ५ जेठसम्म शरतसिंह भण्डारी तत्कालीन रामसपा पार्टी अध्यक्षको हैसियतले पार्टी संयोजक भएका थिए ।

६ जेठदेखि ५ साउनसम्म अनिल झा नेसपाको अध्यक्षको हैसियतले अध्यक्ष मण्डलको संयोजक बनेका थिए भने सोमबार ६ साउनदेखि तत्कालीन फोरम गणतान्त्रिकका अध्यक्ष राजकिशोर यादव अध्यक्ष मण्डलको संयोजक बन्दै छन् ।

महाधिवेशनको मिति सरेको सर्‍यै

७ वैशाखमा ६ मधेसवादी दल एकीकरण भई राजपा गठनको घोषणा गर्दा र सोही वर्षको असारमा पार्टी विधान निर्वाचन आयोगमा दर्ता गराउँदा एक वर्षमा महाधिवेशन गर्ने प्रतिबद्धता थियो । तर, स्थानीय, प्रदेश र संघीय निर्वाचन र पार्टीको आन्तरिक किचलोका कारण अढाइ वर्षमा पनि महाधिवेशनको टुंगो लागेको छैन ।

५ पटक महाधिवेशनको घोषणा मिति सर्दै गरेको राजपाले गत असोजदेखि नै सदस्यता वितरण अभियान सुरु गरेको थियो । तर, पटक पटक गरी पार्टी सदस्यता वितरणको मिति सर्दै गएको छ ।

पहिलोपटक सदस्यता वितरण गर्न चैत मसान्तभित्र केन्द्रीय कार्यालयमा पठाइसक्न जिल्ला समितिलाई दिएको अन्तिम मिति सर्दै सर्दै असार मसान्त पुगेको छ । हालसम्म ११ जिल्लाले मात्र विवरण पठाएको महासचिव केशव झाले बताए ।

आगामी कात्तिक अन्तिम सातामा हुने भनिएको राजपाको पहिलो अधिवेशन पनि हुने वा नहुने शंकाकै घेरामा छ । अर्को मधेस केन्द्रित दल फोरमले अन्य दलसँग एकीकरण घोषणा गर्दै पार्टीको महाधिवेशन टार्दै आएको छ ।

राजपाले पनि महाधिवेशनको मुखमा फेरि उपेन्द्र यादवको समाजवादी पार्टीसँगको एकीकरणको पासा फ्याकेर महाधिवेशनको झन्झटबाट पार पाउने दाउमा लागेको छ ।

प्रकाशित मिति: सोमबार, साउन ६, २०७६ ०४:१७