देउवालाई स्वेच्छाचारी रूपमा चल्न नदिने शेखर समूहको रणनीति, ४१ प्रतिशत मतको कदर गर्न माग

देउवालाई स्वेच्छाचारी रूपमा चल्न नदिने शेखर समूहको रणनीति, ४१ प्रतिशत मतको कदर गर्न माग

A+ A A-

गत मंसिरमा १४ औंँ महाधिवेशनबाट दोस्रो कार्यकालका लागि सभापति निर्वाचित हुँदा देउवाले पार्टीको केन्द्रीय कार्यसमिति अत्यधिक बहुमत पनि पाएका थिए । त्यही बहुमतको बलमा देउवाले पार्टीमा आफ्ना विरोधी खेमालाई भूमिकाबिहीन बनाउँदै लगेपछि सभापतिमा देउवासँग प्रतिस्पर्धा गरेका डा. शेखर कोइरालाले अब चुप नबस्ने रणनीति तय गरेका छन् ।

पार्टीको भ्रातृ संगठन गठनामा होस् वा सरकारका नियुक्ति र निर्णय । कुनै पनि देउवाले आफ्ना प्रतिस्पर्धी डा. कोइरालासँग कुनै छलफल वा परामर्श गर्दैनन् । देउवा एकलौटी रुपमा अगाडि बढिरहेका छन् । सभापतिमा पराजित भएपछि देउवालाई रचनात्मक सहयोग गर्ने घोषणा गरेका डा. कोइरालाले पहिलो पटक वृहत रुपमा आफू निकट नेताहरूको बैठक गरेका छन् । कोइराला देउवाले निर्मम रुपमा अगाडि बढेको निष्कर्षका साथ आफू निकट नेतहरूको बैठक बोलाउने अवस्थामा पुगेको एक केन्द्रीय सदस्यले बताए ।

बत्तिसपुतलीस्थित अनुपम फुडल्याण्डमा दुई दिनसम्म भएको यो भेलाले अब देउवाको कार्यशैलीविरुद्ध एकजुट भएर संघर्ष गर्नुपर्ने निष्कर्ष निकालेको छ । सो बैकठमा सहभागी पूर्व केन्द्रीय सदस्य हृदयराम थानीका अनुसार बैठकमा कोइराला समूहको ४१ प्रतिशत मतको कदर सभापति देउवाबाट नभएको निष्कर्ष निकालिएको छ ।

सभापति देउवाको समूहबाट महामन्त्रीमा दुबैजना उम्मेदवार पराजित भएपछि बाध्यतात्मक रुपमा कोइराला समूहबाट निर्वाचित महामन्त्री गगन थापालाई जिम्मेवारी दिएका छन् । गगन थापा कोइराला समूहको दुई दिने बैठकमा सहभागी भए । उनले सभापति देउवाको कार्यशैलीविरुद्ध आफूहरूले संघर्ष गरिरहेको र अझ गर्नुपर्ने आवश्यकता रहेको बताए । बैठकमा पदाधिकारीबाट पार्टीको आन्तरिक शक्तिसंघर्षबारे सकरात्मक जवाफ आएको थानीले बताए । उनले भने, ‘पदाधिकारीहरूले बैठकमा आफूले गरेका र गरिरहेका संघर्षबारे जानकारी गराउनु भएको छ । सबैको कदर र न्यायोचित भूमिका दिइनुपर्छ भन्ने उहाहरूले बताउनु भयो ।’

सभापति देउवाले आफू निकट उपसभापति पूर्णबहादुर खड्कालाई जिम्मेवारी थोपारिरहेका छन् भने कोइराला समूहबाट निर्वाचित उपसभापति धनराज गुरुङले पार्टी कार्यालयमा राम्रो कार्यकक्षसमेत पाएका छैनन् । खड्कालाई स्थानीय चुनावमा चुनाव परिचालन समितिको संयोजक बनाइयो, हरेक सर्वदलीय बैठकमा सहभागी हुन्छन् । र उपभापतिले नेतृत्व गर्ने पार्टीको सबैभन्दा बलियो नीति तथा प्रशिक्ष प्रष्ठिानको प्रमुख पनि खड्कालाई बनाइयो । तर, गुरुङले भने काम नै पाएका छैनन् ।

यतिमात्र होइन कोइराला समूह देउवा पार्टीको विधानअनुसार पनि नचलेको निष्कर्षमा पुगेको छ । महाधिवेशन सकिएको दुई महिनाभित्र विभाग गठन गर्नुपर्ने। ६ महिनामा नीति महाधिवेशन गर्नुपर्ने र संसदीय बोर्ड गठन गर्नुपर्ने भए पनि देउवाले यी कुनै काम गरेका छैनन् ।

त्यतिमात्र होइन, म्याद सकिएका भ्रातृ तथा शुभेच्छुक संगठन विघटन गरेका देउवाले ती संगठनको तदर्थ समिति गठन गर्दा पनि आफू निकटलाई मात्र मनोनयन गरेका छन् । नेविसंघ, तरुण दल, आदिवासी जनजाती संघ र किसान संघमा देउवाले आफू निकटलाई अध्यक्षमा मनोनीत गरेका छन् । यी महत्वपूर्ण मनोनयन गर्दा देउवाले कोइराला समूहको ४१ प्रतिशत मतको कदर नगरेको दुई दिने बैठकले निष्कर्ष निकालेको छ ।

प्रधानमन्त्रीका रुपमा वदनाम
एक अनौपचारिक भेटमा डा. कोइरालाले भनेका थिए, ‘सरकारमा गएपछि देउवा झन बलियो भए । प्रधानमन्त्री नभएको भए सायद सभापति पनि हुँदैनथिए । त्यसैले संघर्ष गर्न त्यति सहज छैन । उनले सबै शक्ति दुरुपयोग गर्न सक्छन् ।’ कोइरालको संकेत देउवाको कार्यशैली र सुशानमा कमजोर ट्र्याक रेकर्डतर्फ थियो ।

दुई दिन बत्तिसपुतलीमा भएको बैठकले पनि देउवाले सरकारको नेतृत्व गरिरँदा आर्थिक सुशासनको खिल्ली उडाएको निष्कर्ष निकालेको छ । ‘देशमा बजेट बनाउनेदेखि लिएर पछिल्लो चरणमा आर्थिक सुशसानको चरम रूपमा खिल्ली उडाइएको छ । व्यापक रूपमा नीतिगत भ्रष्टाचारहरू गरिएको छ,’ बैठकपछि पत्रकारहरूलाई जानकारी दिँदै केन्दीय सदस्य गोविन्दराज पोखरेलले भने, ‘यसलाई हामीले जतिसक्दो तुरुन्त रोक्नुपर्छ भन्ने हाम्रो समूहको निष्कर्ष रह्यो ।’

सरकार सञ्चालनमा प्रश्न उठाउँदै जनतामाझ गरिएका बाचा पूरा गर्न सरकार असफल बनेको बैठकले निष्कर्ष निकालेको छ । मलखादको उपलब्धता, जनजीविकाको प्रश्न, विकास खर्च, लगानीको वातावरण बनाउने, अर्थतन्त्रको सूचक राम्रो बनाउने कुरा गर्न नसकेको तथा जनतालाई राहत दिन सरकार असफल भएको कोइराला समूहको निष्कर्ष छ ।

सुशासनका पार्टीले जनाएको प्रतिबद्धता पनि सरकारले पूरा नगरेको पोखरेलले बताए । राजस्व अनुसन्धान विभाग, सम्पत्ति सुद्धिकरण, राष्ट्रिय अनुसन्धान विभाग प्रधानमन्त्री मतहतबाट हटाउने भनेर पार्टीले गरेको निर्णय सरकारले कार्यान्वयन नगरेको पोखरेलले बताए ।

कोइराला समूहले यही असार २७ गते बस्ने केन्द्रीय कार्यसमिति बैठकमा पार्टीको विधानअनुसार नचलेको, आर्थिक सुशासन कायम गर्न नसकेको, एकलौटी रुपमा अगाडि बढेको विषयलाई जोडतोडका साथ उठाउने तयारी गरेको छ ।

देउवामाथि शेखर समूहको आरोप- सुशासनको खिल्ली उडाइयो, नीतिगत भ्रष्टाचार व्यापक भयो

प्रकाशित मिति: शुक्रबार, असार १७, २०७९ २०:१९