काठमाडौंमा कोलकाता मिर्गौला तस्करी गर्ने गिरोह सक्रिय, निसानामा अलपत्र युवा, तीन जना पक्राउ

काठमाडौंमा कोलकाता मिर्गौला तस्करी गर्ने गिरोह सक्रिय, निसानामा अलपत्र युवा, तीन जना पक्राउ

A+ A A-

काठमाडौंबाट भारतको कोलकाता मिर्गौला तस्करी हुने गरेको खुलेको छ । मिर्गौला तस्करी गर्ने एक समूहलाई प्रहरीले नियन्त्रणमा लिएपछि सो घटना बाहिर आएको हो । प्रहरी प्रभाग कोटेश्वरको टोलीले मिर्गौला तस्करी गर्ने समूहका तीन जना र मिर्गौला बिक्री गर्न हिँडेका दुई जनालाई नियन्त्रणमा लिएको छ ।

काठमाडाै‌ं प्रहरी परिसरका प्रवक्ता एसपी दिनेश मैनालीका अनुसार पक्राउ पर्नेमा गुल्मी धागीथुङ-२ का ३१ वर्षीय विजय कुँवर, दैलेख तिलुखाना-६ का ३२ वर्षीय विमलबहादुर शाही र दैलेखकै चामुण्डा बिन्द्रासैनी नगरपालिका–६ का २९ वर्षीय धुपेन्द्रबहादुर शाही छन् ।

उनीहरूमध्ये मिर्गौला तस्करी गर्ने नाइके गुल्मीका विजय कुँवर भएको प्रहरीको दाबी छ । कुँवरले सडक बालबालिकादेखि अलपत्र परेका युवालाई मुख्य टार्गेट गरेर मिर्गौला तस्करी गर्न कोलकाता लैजाने गरेको खुलेको हो । प्रहरीले मिर्गौला बिक्री गर्न हिँडेका हेटौँडाका ३० वर्षीय युवा र सर्लाही हरिवनका २० वर्षीय युवालाई समेत नियन्त्रणमा लिएको छ । उनीहरूले पाँच लाख पाउने लोभमा आफ्नो मिर्गौला बिक्री गर्न तयार भएको खुलेको छ । उनीहरू पाँच जनालाई प्रहरीकाे मानवबेचविखन अनुसन्धान ब्युराे बुझएको छ ।

यसरी जाँदै थिए मिर्गौला बिक्री गर्न कोलकाता

कोटेश्वर प्रहरीले उनीहरूलाई गौशालाबाट पक्राउ गरेको हो । अनुसन्धानमा खटिएका प्रहरीका अधिकारीका अनुसार गुल्मीका कुँवर यसअघि पनि पटक-पटक कोलकाता काठमाडौं आवतजावत गर्दै आएका युवा हुन् ।

पछिल्लो समय उनी गौशालाको एक होटलमा बस्दै आएका थिए । त्यहीँ होटलमा बस्दा उनले पशुपति क्षेत्रमा दैनिक विभिन्न संस्थाले खुवाएको खाना खाने युवालाई टार्गेटमा राखे । त्यसका लागि उनले एक युवतीलाई प्रयोग गरेको खुलेको छ । तर, युवती भने पक्राउ परेकी छैनन् । उनको खोजी जारी रहेको प्रहरीको भनाइ छ ।

एक जना युवालाई मिर्गौला बिक्री गर्न तयार पारेबापत ती युवतीलाई कुँवरले १० देखि १५ हजार रुपैयाँसम्म कमिसन दिने गरेको खुलेको प्रहरी दाबी छ । अहिले मिर्गौला बिक्री गर्न तयार भएका दुवै जना युवालाई ती युवतीले १४ गते दिउँसो नै मिर्गौला बिक्री गर्न राजी बनाएकी थिइन् । एक मिर्गौला बिक्री गरेबाफत उनीहरूलाई ५ लाख रुपैयाँ आउने प्रलोभन देखाएको खुलेको छ । उनीहरू मिर्गौला बिक्री गर्न राजी भएपछि दुवै जनालाई सुर्खेती सेवा समाजले सञ्चालन गरेको होटलमा राखेका थिए ।

होटलमा राख्ने योजनामा सुर्खेतकै शाहीद्वयको भूमिका शंकास्पद लागेपछि उनीहरू पनि पक्राउ परेका हुन् । प्रहरीले नियन्त्रणमा लिएका दुवै जना दैनिक विभिन्न संस्थाले खुवाएका खाना खाने आउने युवाहरू हुन् । कुँवरलाई पछिल्लो समय ए पोजिटिभ र ओ-पोजिटिभ ब्लड ग्रुप भएकाको मिर्गौला आवश्यकता थियो ।

त्यसका लागि उनीहरूले चाबहिलकै एक मेडिकलमा ब्लड ग्रुपसमेत जाँच गरेको खुलको छ । प्रहरीका अनुसार उनले ब्लग ग्रुप जाँच गर्दा सवारी चालक अनुमति पत्रका लागि भनेर जाँच गराएका थिए ।

१४ गतेबाट होटलमा बसेका दुवै जना युवाका लागि कुँवरले केही थान लुगा पनि तयारी अवस्थामा राखेका थिए । तर, युवाबारे कसैले केही सोधिहाले पोखरा काममा जाने जवाफ दिनु भनेर सम्झाएका थिए । प्रहरीले मिर्गौला तस्करीको सूचना पाएर होटल पुग्दा पनि उनीहरूले कामका लागि पोखरा नै जाने बताएका थिए । तर, प्रहरीले उनीहरूलाई नियन्त्रणमा लिएर सोधपुछ गरेपछि भने मिर्गौला बिक्री गर्न कोलकाता जान लागेको स्वीकार गरेका हुन् ।

त्यसलगत्तै पक्राउ परेका कुँवरले पनि कोलकाता जाने तयारी भएको बयान प्रहरीलाई दिएका छन् । प्रहरीसँगको बयानमा कुँवरले यसअघिसमेत हिमाल श्रेष्ठसँग मिलेर ७ जना युवालाई मिर्गौला बिक्री गर्न कोलकाता पुर्‍याएको बयान दिएका छन् ।बुधबार कुँवरले ती दुई युवालाई बल्खुबाट गाडी चढाएर वीरगञ्ज, रक्सौल हुँदै कोलकाता लैजाने तयारी गर्दा उनीहरू प्रहरी नियन्त्रणमा परेका हुन् ।

बुधबार नै कुँवरलाई उनीहरूकाे व्यवस्थापनका लागि भनेर सिद्धार्थ बैंकको खातामा एक लाख रुपैयाँ पठाएका थिए । उक्त रकम पठाउनेमाथि समेत प्रहरीले अनुसन्धान थालेकाे छ । पक्राउ परेकाहरू माथि थप अुनसन्धान भइरहेको प्रहरीको दाबी छ ।

प्रकाशित मिति: शुक्रबार, असार १७, २०७९ १३:४२