सुदूरपश्चिम प्रदेशमा सत्तापक्षकै भागमा लेखा समिति

A+ A A-

सुदूरपश्चिम प्रदेशमा एमाले र माओवादी केन्द्र मिलेर प्रदेश सरकार गठन गर्दा नेपाली कांग्रेस प्रमुख प्रतिपक्ष दलको भूमिकामा थियो । कांग्रेस प्रतिपक्ष दल भएकै कारण संसदीय परम्पराअनुसार प्रदेश सभाको सार्वजनिक लेखा समिति नेपाली कांग्रेसको भागमा पर्‍यो । सरकारले गरेका विभिन्न आर्थिक गतिविधिलगायतको निगरानी गर्ने उद्देश्यसहित सार्वजनिक लेखा समिति प्रतिपक्षी दललाई दिने परम्परा छ ।

सोही परम्परा अनुसार सुदूरपश्चिममा सार्वजनिक लेखा समितिको सभापतिमा नेपाली कांग्रेसकी सांसद नन्दा कुमारी बम समितिको सभापति चुनिइन् । तर, अहिले तत्कालीन प्रमुख प्रतिपक्षी दल कांग्रेस आफै प्रदेश सरकारमा सामेल छ ।

स्थानीय तहको निर्वाचन अघि नै कांग्रेस सरकारमा सहभागी भए पनि लेखा समितिको नेतृत्व भने फेरिएको छैन ।

अहिले पनि समितिको सभापतिमा बम नै रहेकी छिन् । यसको अर्थ कांग्रेस दोहोरो भूमिकामा छ । सार्वजनिक लेखा समितिले विशेष गरी सरकारले गरेका आर्थिक गतिविधिको निगरानी गर्ने जिम्मेवारी भए पनि आफै सरकारमा हुँदा समितिको कामको निष्पक्षतामा प्रश्न उठ्न सक्ने मान्यता छ ।

सार्वजनिक लेखा समिति प्रतिपक्षकै भागमा हुनुपर्ने भन्ने कुनै व्यवस्था नभए पनि सरकारको निगरानीका लागि प्रतिपक्षलाई उक्त समितिको नेतृत्व दिइने गरिएको सुदूरपश्चिम प्रदेश सभाका सभामुख अर्जुनबहादुर थापाको भनाइ छ । उनले सुदूरपश्चिम प्रदेशसभाको सार्वजनिक लेखा समितिको सभापति पनि प्रतिपक्षी दलले नै लिँदा उपयुक्त हुने बताए ।

यद्यपि अहिले यस विषयमा छलफल नै नभएको उनले बताए । उनका अनुसार सार्वजनिक लेखा समितिका विषयमा अहिले प्रदेशसभाको प्रमुख प्रतिपक्षी दल नेकपा एमाले पनि मौन रहेको छ ।

नेकपा एमालले भने सार्वजनिक लेखा समिति कांग्रेस आफैले छोडोस् भन्ने चाहिरहेको छ । एमाले सांसद लिलाधर भट्टले कांग्रेस सरकारमा सहभागी भइसकेपछि आफै छोड्नुपर्ने बताए ।

‘प्रतिपक्षको भागमा रहने सार्वजनिक लेखा समितिको जिम्मेवारीबाट कांग्रेस सरकारमा सहभागी भइसकेपछि आफै छोड्नु पर्थ्याे ’ उनले भने, ‘तर सरकारमा सहभागी भएको २ महिनाभन्दा बढी बिते पनि लेखा समिति कांग्रेसले छोड्न मानेको छैन । समितिको नेतृत्व कांग्रेस आफैले छोडोस् भन्ने हामी चाहन्छौँ ।’ यद्यपि उनले समितिको नेतृत्व एमालेले नै पाउनुपर्छ भनेर अहिले दाबी नगरेको बताए ।

नेपाली कांग्रेसका सांसद भरतबहादुर खड्काले सार्वजनिक लेखा समितिका विषयमा अहिलेसम्म कुनै छलफल नै नभएको बताएका छन् । उनले सार्वजनिक लेखा समिति प्रतिपक्षी दलकै भागमा हुनुपर्ने बताए । ‘सार्वजनिक लेखा समिति प्रतिपक्ष दलले लिने परम्परा छ,’ खड्काले भने, ‘तर अहिलेसम्म कुनै छलफल नै भएको छैन । समिति प्रतिपक्षले नै पाउनुपर्छ ।’ सार्वजनिक लेखा समितिका सभापति बमले कांग्रेस सरकारमा सहभागी भएको अढाई महिना बिते पनि राजीनामा दिएकी छैनन् ।

प्रकाशित मिति: बिहीबार, असार १६, २०७९ १८:४९