कोरियन भाषा परीक्षा : नेपालबाट २७ सय ४१ जनाकाे काेटामा १८ सय ९ जना मात्रै पास

फाइल तस्वीर

कोरियन भाषा परीक्षा विगतमा नयाँका लागि पीबीटी (पेपर बेस टेस्ट) र कोरिया गएर फर्केकाका लागि सीबीटी (कम्प्युटर बेस टेस्ट) सञ्चालन हुने गरेको थियो । कोरिया सरकारले यो वर्षदेखि यूबीटी (युविक्युट्स बेस टेस्ट) प्रणालीबाट परीक्षा सञ्चालन गरेको छ ।

कोरियन भाषा परीक्षामा सहभागी भएका धेरै परीक्षार्थी भाषामा दक्ष भए पनि यूबीटी टेस्ट परीक्षामा फेल भएका छन् ।

सन् २०२३ मा कोरिया सरकारले कृषि तथा पशुपालनतर्फ २ हजार ७ सय ४१ जना श्रमिक माग गरेको थियो । जेठ १९ गतेदेखि असार ३ गतेसम्म भएको कृषि तथा पशुपालन क्षेत्रतर्फको पहिलो चरणको कोरियन भाषा परीक्षा दिएका ६ हजार १ सय ६ जनामध्ये १ हजार ८ सय ९ जना मात्र उत्तीर्ण भएको वैदेशिक रोजगार विभाग ईपीएस कोरिया शाखाले जानकारी दिएको छ ।

कृषिमा कोरियाले मागेभन्दा ९ सय ३२ जना कम परीक्षार्थी उत्तीर्ण भएको शाखाको तथ्यांक छ । कृषि क्षेत्रका लागि परीक्षार्थीले ९० अंकको भाषा परीक्षा दिनुपर्थ्यो । अब उक्त भाषा परीक्षामा पास भएको खण्डमा १ सय १० अंकको सीप परीक्षणको परीक्षामा सहभागी हुनुपर्ने नयाँ व्यवस्थासमेत २०२२ देखि लागू भएको छ ।

यस्तै, उत्पादनमूलक क्षेत्रमा जानका लागि परीक्षार्थीले १ सय अंकको भाषा परीक्षा दिनुपर्ने व्यवस्था थियो । अब उक्त परीक्षा पास भएको खण्डमा सय अंकको सीप परीक्षा अनिवार्य दिनुपर्ने शाखाले जानकारी दिएको छ ।

सन् २०२० मा भाषा परीक्षा पास गरेका परीक्षार्थीहरूको सामान्य सीप परीक्षण गरिँदै आएको थियो । तर, अब भने भाषा परीक्षा पास गरेपछि सीप परीक्षण अनिवार्य पास गर्नुपर्नेछ ।

यूबीटीबाट पहिलो पटक परीक्षा सञ्चालन भएका कारण माग भए जति परीक्षार्थी उत्तीर्ण नभएको र के कारण विद्यार्थी फेल भए भन्ने अध्ययन भइरहेको वैदेशिक रोजगार विभागका महानिर्देशक शेषनारायण पौडेलले जानकारी दिए ।

अब नेपालमा कोरियन भाषा पढाउँदै आएका शिक्षण संस्थाले पनि सोहीअनुसार तालिमसहितको कक्षा सञ्चालन गर्नुपर्ने उनको भनाइ छ ।

भाषा मात्र अध्ययन गरेर कोरिया पुगेका युवामा समस्या देखिएपछि कोरिया सरकारले सीप परीक्षण अनिवार्य गर्न लागेको हो । कोरिया रोजगारीमा जाने नेपाली युवाको आकर्षण बढ्दो छ ।

नेपालबाट भाषा परीक्षा पास भएर गएका श्रमिकमा कोरिया पुगेपछि काम गर्न नजान्ने समस्या उत्पन्न हुने गरेको शाखाले जनाएको छ । पछिल्लो समय सीप नभएका युवा वैदेशिक रोजगारीमा जाँदा कार्यस्थलमा अंगभंग हुने र मृत्युसमेत हुने गरेको छ ।

सन् २०२२/२३ मा दक्षिण कोरियाले उत्पादनतर्फ ६ हजार २ सय १३ र कृषि तथा पशुपालनतर्फ २ हजार ७ सय ४१ गरी ९ हजार ६ सय ५४ जना श्रमिक लैजाने भनेको छ । सीप परीक्षणको दोस्रो चरणको परीक्षा भने हुनै बाँकी छ ।

उत्पादन क्षेत्रका लागि यूबीटीबाट परीक्षा सञ्चालन हुने शाखाले जनाएको छ । भाषा परीक्षाका लागि परेको आवेदनको आधारमा एक सिफ्टमा दुई सय जनाका दरले दिनमा ३ वा ४ सिफ्ट परीक्षा सञ्चालन गरेर दिनमा अधिकतम आठ सय जनाले परीक्षा दिने व्यवस्था मिलाइएको छ । शाखाले भैँसेपाटीमा रहेको एचआरडी कोरिया भाषा केन्द्रलाई तयारी अवस्थामा राखेको छ ।

वैदेशिक रोजगारका लागि आकर्षक मानिएको दक्षिण कोरिया जान ४३ हजारभन्दा बढीले आवेदन दिएको शाखाले जानकारी दिएको छ ।हालसम्म ७७ हजार नेपालीले कोरियामा रोजगार प्राप्त गरिसकेका छन् । त्यसमध्ये हाल ३५ हजार नेपाली कोरियाका विभिन्न साना तथा मझौला उद्योगमा कार्यरत छन् । पछिल्ला दुई वर्षमा विश्वव्यापी महामारी कोरोना संक्रमणका कारण परीक्षा हुन सकेन ।

कोरियाले उत्पादनमूलक, कृषि तथा पशुपालन, सेवा, निर्माण क्षेत्रमा विभिन्न १६ देशबाट श्रमिक माग गर्दै आए पनि नेपालबाट भने कृषि र उत्पादनमूलक क्षेत्रमा मात्र श्रमिक माग गरिँदै आएको छ ।

प्रकाशित मिति: शुक्रबार, असार १७, २०७९ ०६:३५