नेपालीबाटै ठगिन्छन् साउदीमा अवैध बसेका नेपाली कामदार

A+ A A-

इलाम चुलाचुली– ३, किराँत गाउँका प्रवेश लिम्बू साउदी अरब बसेको ४ वर्ष भयो । उनको श्रम अवधि सकिएको पनि १८ महिना पुगिसकेको छ ।

उनी मंगलबार साउदी प्रहरीको आँखा छल्दै साउदीस्थित नेपाली दूतावासमा आफू ठगिएको भन्दै उजुरी गर्न पुगे । लिम्बूलाई नेपालको स्थायी ठेगाना यकिन नभएका प्रदीप आचार्य नाम गरेका व्यक्तिले स्वदेश फर्काइदिन्छु भन्ने प्रलोभन देखाएर २ हजार ७ सय रियाल (८० हजार रुपैयाँ) लिएर पनि नेपाल पठाएनन् ।

पछिल्लो समय आचार्य सम्पर्कमा समेत नआएपछि आफू ठगिएको थाहा पाएकाे शिलापत्रको सम्पर्कमा आएका लिम्बूले बताए । आफूलाई ठग्ने व्यक्तिले झापाका अन्य पाँच जनाभन्दा धेरै व्यक्तिलाई समेत ठगेको उनको दाबी छ ।

यस्तै, झापा धरमपुर– २, का अग्नि कार्की पनि अवैध बसेका कारण साउदीमा ठगिएका छन् । उनी स्वदेश फर्किने आसमा एक नेपाली मूलका भारतीय नागरिकबाट करिब ९० हजार रुपैयाँ ठगिए ।

अवैध बसेका कारण उनीसँग साउदीको आवासीय अनुमतिपत्र (अकामा) थिएन । भारतीय नागरिक कविर तामाङले अकामा बनाइदिने र स्वदेश फर्किन सहजीकरण गरिदिने भन्दै ठगी गरेको साउदी–नेपाल कामदार सम्पर्क समितिमार्फत शिलापत्रको सम्पर्कमा आएका कार्कीले बताए ।

साउदीमा अकामाको प्रलोभनमा परी धेरै नेपाली ठगिएका छन् । यसरी अकामा बनाइदिन्छु, राम्रो रोजगारीमा लगाइदिन्छु र स्वदेश फर्किने वातावरण बनाइदिने भन्दै नेपालीले नै अवधै बसेका कामदारलाई ठग्ने गरेको कार्की बताउँछन् ।

अवैध कामदारलाई ठगी गर्ने नेपालीहरू पनि अवैध बसेका हुने गरेको उनको भनाइ छ ।

यस्तै, साउदीमा अवैध रूपमा बसेका नेपालीबाटै ठगिने गरेको दूतावासले जनाएको छ । यस्तो ठगी काममा गिरोह नै सक्रिय भएको र अकामा र एक्जिट भिसाको प्रसोसिङका लागि कुनै खर्च नलाग्ने साउदीस्थित नेपाली दूतावासका प्रवक्ता ऋषिराज आचार्य बताउँछन् ।

यदि कसैले 'एक्जिट भिसा मिलाइदिन्छु, दूतावासमा मैले चिनेको मानिस छन्' भन्दै पैसा मागेमा त्यस्ता मानिसको पछि नलाग्न उनले साउदीमा रहेका नेपाली कामदारलाई आग्रह गरेका छन् ।

साउदीका विभिन्न कम्पनी तथा प्रतिष्ठानहरूमा कार्यरत रहँदा साउदी आवासीय अनुमतिपत्र (अकामा) नबनाइएका वा नवीकरण नगरिएका वा हुरूब लगाइएकामध्ये करिब ५ सय नेपालीलाई दूतावासले स्वदेश फर्काएको छ ।

दूतावासले जून महिनामा १ सय ८६, मेमा २ सय ११ र अन्य समस्यामा परेका १ सय ३ जना नेपाली स्वदेश फर्किएको जनाएको छ । वैदेशिक रोजगार विभागले सार्वजनिक गरेकाे पछिल्लो प्रगति विवरणमा समेत साउदी अरबबाट धेरै नेपालीलाई उद्धार गर्नुपर्ने अवस्था रहेको जनाएको छ ।

नेपाल पठाउन एक्जिट भिसा लगाइदिन्छु वा सेटिङमा नेपाल पठाउँछु भन्दै अवैध रूपमा बसेका कामदारलाई आफ्नै देशका नागरिकले ठगी गरिहेको उजुरी दैनिक आउने गरेको त्यहाँ रहेको नेपाली दूतावासले जनाएको छ ।

एक्जिट भिसाको जानकारी यसरी लिन सकिन्छ

साउदीबाट नेपाल फर्किन एक्जिट भिसा प्रोसेसिङ खर्च लाग्दैन । एक्जिट भिसाको प्रक्रिया गर्न कति पनि शुल्क तिर्नु नपर्ने दूतावासले जनाएको छ । साउदीमा समस्यामा परेकाहरूलाई सेटिङमा स्वदेश फकाइदिन्छु, मैले साउदीका प्रहरी र अन्य मानिसहरू चिनेको छु भन्दै आश्वासन देखाउने क्रम बढेको भन्दै दूतावासले त्यस्ता मानिसको पछि नलाग्न सुझाव दिएको छ ।

दूतावासका अनुसार साउदीमा रहेको नेपाली दूतावास र महावाणिज्यदूतावासले एक्जिट भिसा प्रोसेसिङ गरिदिन्छ । एक्जिट भिसाको प्रोसेसिङ दूतावासले निःशुल्क गरिदिन्छ । तर, एक्जिट भिसा लागिसकेपछि नेपाल फर्कने हवाई टिकट भने स्वयम्‌ले व्यवस्था गर्नुपर्ने दूतावासले जनाएको छ ।

अकामाको म्याद सकिएको ३ महिनाभन्दा बढी भइसकेको छ भने वा साउदी गएको ३ महिनाभन्दा बढी समयसम्म पनि कम्पनीले अकामा नबनाइदिएमा र कम्पनीले हुरुब लगाइदिएको अवस्थामा दूतावासले एक्जिट भिसाको प्रक्रिया अघि बढाइदिन्छ ।

अकामाको म्याद भएकाहरूको एक्जिट भिसाको प्रक्रिया दूतावासले गर्न मिल्दैन । तर, दूतावासले एक्जिट भिसा सबैले भन्दैमा गर्दैन । जुन ठाउँबाट आफ्नो अकामा बनेको हो त्यही ठाउँको श्रम कार्यालय र अध्यागमन कार्यालयमा मात्र एक्जिट भिसाका लागि प्रोसेसिङ गर्नुपर्ने साउदी सरकारको नियम छ । सोहीअनुसार दूतावासले आफ्नो फेसबुक पेजमा सूचनामार्फत जानकारी पनि गराउँदै आएको छ ।

त्यसैले एक्जिट भिसा प्रोसेसिङका लागि दूतावास जानुभन्दा पहिले आफ्नो अकामा कहाँबाट बनेको हो, अनिवार्य रूपमा जानकारी कामदार स्वयम्‌लाई हुनुपर्छ ।

रियादबाट अकामा बनेकाहरू मात्रै एक्जिट भिसा प्रोसेसिङका लागि रियादमा रहेको दूतावासमा जाँदा हुन्छ । रियादभन्दा बाहिरबाट अकामा बनेकाहरूले एक्जिट भिसा प्रोसेसिङका बारेमा फोनबाटै जानकारी लिन दूतावासले भनेको छ ।

दूतावासका अनुसार कोही कसैले अकामा बनाउने आश्वासन दिएमा साउदी प्रहरीलाई ९११ नम्बरमा फोन गरी आफू पनि ठगीबाट बच्न र अरूलाई पनि बचाउन दूतावासले आग्रह गरेको छ ।

एक्जिट भिसा प्रोसेसिङका बारेमा बुझ्न ०५०००२१४०९ वा ०५४७०४५२७२ मा दूतावासमा सम्पर्क गर्न सकिन्छ ।

प्रकाशित मिति: बिहीबार, असार १६, २०७९ १८:१५