समयमै पानी नपरेपछि कैलालीका किसानलाई समस्या

A+ A A-

कैलालीको धनगढी उपमहानगरपालिका– १५, कनरीका राजकुमार डगौराले एक बिघा १५ कट्ठा जमिनमा धानखेती लगाउँदै आएका छन् । आफ्नो र बटैया गरेर उनले एक बिघा १५ कट्ठा जमिनमा धानखेती लगाउँदै आएका हुन् । समयमै यस वर्ष पानी नपरे पनि उनीहरू महँगोमा डिजेल किनेर बोरिङबाट सिँचाइ गर्न बाध्य भएका छन् ।

‘आकाशे पानीको भरमा परेका थियौँ,’ उनले भने अहिलेसम्म पानी नपरेपछि बोरिङबाट पानी लगायौँ । डिजेल पनि महँगो भइसकेको छ, एक घण्टा पानी लगाएको महँगो डिजेल खर्च गरेर खेती गरेको उनले बताए ।

उनीजस्तै कनरीका वीरेन्द्र साउद पनि यस वर्ष बोरिङबाट पानी लगाउन बाध्य भएका छन् । समयमै पानी नपरे पनि बोरिङबाट पानी लगाउन बाध्य भएको उनले बताए । ‘बोरिङबाट पानी लगाउन धेरै गाह्रो छ । डिजेलको भाउ पनि महँगो छ,’ उनले भने, 'अर्कोतिर बोरिङमा राम्रोसँग पानी आउँदैन । समयमै मल पनि नपाएका उनले अहिलेसम्म राम्रोसँग पानी पनि नपरेपछि खेती लगाउनै समस्या भएको बताए । अरुको बोरिङबाट पानी लगाउँदा प्रतिघण्टा २ सय रुपैयाँ तिर्नुपरेको उनले बताए ।

धनगढी– १६, उर्मा गाउँकी रामदुरारी चौधरीले पनि यस वर्ष रोपाईं बोरिङकै पानीबाट गरिरहेको बताएकी छन् । उनले करिब एक बिघा जमिनमध्ये १० कट्ठा जतिको रोपाइँ बोरिङकै पानीले गरेको बताइन् ।

‘धानखेती नगरे पनि हुँदैन,' रामदुरारीले भनिन्,’ कहिल्यै समयमा पानी पर्दैन । कहिले बढी पानी परेर धान बिग्रिन्छ । किसान जहिल्यै पनि मारमा पर्छौं । कहिले मल पाइँदैन, कहिले पानी पर्दैन । खेतीपाती गर्न पनि किसानलाई समस्या रहेको उनी बताउँछिन् ।

यस वर्ष कैलालीमा समयमै वर्षा हुन नसकेपछि किसानहरू मारमा परेका छन् । असारको दोस्रो सातासम्म पनि किसानलाई चाहिनेजति पानी नपरेपछि उनीहरू समस्यामा परेका छन् । आकाशे पानीको भरमा परेका किसानहरू पानी नपरेपछि खोलानालानजिकैबाट पम्पसेट लगाएर खेती लगाउन बाध्य भएका छन् । मंगलबार बिहान यहाँ वर्षा भएको छ तर त्यो रोपाइँका लागि पर्याप्त नभएको किसानहरू बताउँछन् ।