जब विरोधलाई कर्मचारीले ‘फेरि भेटौँला’ भन्दै मन्त्रालयबाट बिदाइ गरे

A+ A A-

स्वास्थ्य तथा जनसंख्या मन्त्रालयमा सोमबार नवनियुक्त मन्त्री भवानीप्रसाद खापुङ र राज्यमन्त्री हीराचन्द्र केसीको स्वागत तथा निवर्तमान मन्त्री विरोध खतिवडाको बिदाइ कार्यक्रम थियो । रोचक त के थियो भने निवर्तमान मन्त्री खतिवडाका लागि तय गरिएको कार्यक्रमको नाम, ‘फेरि भेटौँला’ ।

कार्यक्रममा उद्घोषकले ‘फेरि भेटौँला’ भन्ने वाक्य पूरा वाचन गर्न नपाउँदै खतिवडाले मञ्चबाट ठट्यौलीमा भन्न भ्याए, ‘पहिला फेरि जितौँला भन्नुपर्‍यो नि !’ उनको ठट्टासँगै मन्त्रालयका कर्मचारी र पत्रकारले भरिएको हलमा हाँसो पनि भरियो । कर्मचारीले थपे, ‘जितका लागि शुभकामना ।’

२२ असोज २०७८ मा स्वास्थ्य तथा जनसंख्या मन्त्रालयको जिम्मेवारी सम्हालेका थिए, खतिवडाले । उनी ९ महिना मन्त्रालयको नेतृत्वमा रहे । करिब एक घण्टा हलमा चलेको स्वागत तथा बिदाइ कार्यक्रममा मन्त्रालयका सचिवदेखि कर्मचारीसम्मले निवर्तमान मन्त्री खतिवडाकै प्रशंसामा धेरै समय बिताए ।

मन्त्रालयका सचिव डा. रोशन पोखरेलले खतिडासँगको नौ महिनाको समय कसरी बित्यो, थाहै नभएको टिप्पणी गरे । ‘नौ महिनामा भएको काम देख्नुभएकै छ । नौ महिना कसरी बित्यो, थाहा छैन । बोल्ने कुरा छैन,’ उनले भने, ‘उहाँले नाइँ भन्नुहुन्थेन । सचिवले लगेकोमा नाइँ नभन्दा काम गर्न सजिलो भयो ।’

मन्त्रालयका अर्का सचिव देवकुमारी गुरागाईंदेखि स्वास्थ्य सेवा विभागका महानिर्देशक डा. दीपेन्द्ररमण सि‌ंहले पनि खतिवडाको खुलेरै प्रशंसा गरे । तर, मन्त्री हुँदा कर्मचारीको सरुवा गरेर आलोचित बनेका खतिवडाको बिदाइमा उपस्थित अन्य कर्मचारीहरू (सरुवा भएका) भने निराश देखिन्थे ।

मन्त्री भएको सुरुका केही महिना खतिवडाले कर्मचारीको सरुवामा नै बढी समय खर्चिएका थिए । तर, सोमबार बिदाइमा सचिवदेखि कर्मचारीबाट प्रशंसाका शब्दसहित ढाका टोपी पाएपछि खतिवडा दंग देखिन्थे । साथ र सहयोग पाएकोमा खतिवडाले पनि कर्मचारीको प्रशंसा गर्न भ्याए ।

खतिवडाले सय दिनको अवधिमा अधिकांश समय कर्मचारी अदलबदलमै खर्चिए

सचिव पोखरेलले बिदाइ र स्वागत दुईवटा कुरामा एकैपटक बोल्न गाह्रो भएको अनुभव सुनाए । त्यसको समेत जवाफ फर्काउन भ्याए खतिवडाले । उनले ठट्यौली गर्दै भने, ‘सचिवज्यूले बिदाइ र स्वागत भिन्दाभिन्दै गर्न पाएको भए हुन्थ्यो भन्नुभयो । दुइटा सचिव हुनुनुन्थ्यो । एउटाले स्वागत, एउटाले बिदाइ गरेको भए हुने थियो ।’ हलमा फेरि हाँसो गुञ्जियो ।

खतिवडाले फेरि थपे, ‘बहालवाला र हट्ने एकै ठाउँमा बसेर हाँसेर यसरी कार्यक्रम विरलै हुन्छ ।’ मन्त्री पद गुम्दैमा आफू दु:खी नभएको भाव बेलाबेलामा ठट्टामार्फत देखाउन खोज्दै थिए खतिवडा । तर, उनी तिनै हुन्, जो मन्त्री पद जोगाउन पत्रमा हस्ताक्षर गरेर पार्टीअध्यक्ष माधव नेपाललाई बुझाउन लागिपरेका थिए । बिदाइ कार्यक्रममा उनले आफूले गरेको कामको स्मरणसमेत गरे ।

‘५ देखि १२ वर्ष उमेरका लागि कोरोना खोप लगाउन सफल भएका छौँ । सायद १५–२० वटा देशले पनि लगाएका छन कि छैनन् । अस्पताल निर्माण, आईसीयू, भेन्टिलेटर, ज्येष्ठ नागरिक अस्पताल निर्माण र ठूला अस्पताललाई डिजिटल सिस्टममा लगेका छौँ,’ उनले भने ।

चारपटक सांसद बनेका खतिवडा मन्त्रालयमा आएपछि नीतिगत र स्वास्थ्यक्षेत्रमा सुधारको काम गर्ने अपेक्षा कर्मचारीहरूको थियो । ‘परिपक्व मन्त्री पायौँ भन्ने थियो । तर, उहाँ पनि कर्मचारी सरुवामै केन्द्रित हुनुभयो,’ मन्त्रालयका एक कर्मचारीले भने । एक स्वास्थ्य संस्था एक चिकित्सक कार्यक्रम र स्वास्थ्य बीमाजस्ता मन्त्रालयका कार्यक्रम छायामा परेका छन् ।

खापुङ मन्त्रीमा बढुवा

खतिवडासँगै मन्त्रालयमा राज्यमन्त्रीको रूपमा छिरेका थिए, नवनियुक्त मन्त्री खापुङ । तर, खतिवडा मन्त्रालयबाट बाहिरिँदा खापुङ बढुवामा परे । नवनियुक्त मन्त्री खापुङ र खतिवडाले पनि एकले अर्काको प्रशंसा गरे । ‘हिजो बेलुकासम्म उहाँसँग राज्यमन्त्री नै थिएँ । मन्त्रालयमा सँगै आएका थियौँ । यहाँ आउँदा मास्क लगाएर आएका थियौँ । अहिले हलुका भएको छ । महामारीबाट सहज जनजीवन ल्याउनमा सफल भयौँजस्तो लाग्छ,’ खापुङले भने ।

निवर्तमान मन्त्री खतिवडाले पनि सबैको सहभागितामा महामारी नियन्त्रण गर्न सकिएको बताउँदै नवनियुक्त मन्त्री खापुङलाई राज्यमन्त्रीको नौ महिनाको अनुभवले काम गर्न सहज हुने बताए । ‘म कानुनको विद्यार्थी आएर हात्ती छामेको जस्तो गर्नुपर्ने छैन । उहाँले अनुभव प्राप्त गर्नुभएको छ । उहाँलाई काम गर्न सजिलो छ,’ खतिवडाले भने, ‘हामी एउटै पार्टीका पनि हौँ ।’

मन्त्री खापुङले पनि नौ महिनामा मन्त्री र राज्यमन्त्रीबीच कुनै द्वन्द्व नभएको सुनाए । ‘नौ महिनाको अवधि संयुक्त रूपमा बितायौँ । राज्यमन्त्री र मन्त्रीबीच द्वन्द्व सुनिएन,’ खापुङले भने, ‘जनताले पाउने सेवा सुविधामा त्रुटि रहेछ भने सच्याउनुपर्छ ।’ गरिब जनतालाई स्वास्थ्य सेवाको पहुँचमा ल्याउन पहल गर्ने उनले प्रतिबद्धता जनाए ।

‘गरिब दु:खी पीडित भएर बसेकालाई सर्वसुलभ सेवा पुर्‍याउनेछौँ,’ उनले भने । कर्मचारीलाई उनले ढिलासुस्ती नगर्न निर्देशन दिँदै उनले आफू पनि कुनै प्रलोभनमा नपर्ने बताए । ‘मन्त्रीको तहबाट ढिलासुस्ती र अलमल हुने छैन । अनेक प्रलोभनतिर ध्यान केन्द्रित गर्ने नआउने स्थिति बनाउन एक ढिक्का हुनुपर्छ,’ उनले भने ।

नवनियुक्त मन्त्रीका सामु चुनौती पनि उत्तिकै रहेको बताउँछन् मन्त्रालयका कर्मचारीहरू । ‘नौ महिना राज्यमन्त्री भएकाले अनुभव छ । कर्मचारी सरुवातिर लाग्ने हो भने उही पुरानै स्थिति हुन्छ । कर्मचारीको व्यवस्थापन, स्वास्थ्यका नीतिगत निर्णय, स्वास्थ्य बीमा, महामारी नियन्त्रण नै उहाँका लागि चुनौती हो,’ मन्त्रालयका उच्च अधिकारी भन्छन् ।

सम्बन्धित समाचार

प्रकाशित मिति: सोमबार, असार १३, २०७९ १८:४१