इजरायलले किन एक चरण मात्र कामदार लैजान्छ ? रोजगार सम्झौता भइसकेका ८७८ जना किन रोकिए ?

इजरायलले किन एक चरण मात्र कामदार लैजान्छ ? रोजगार सम्झौता भइसकेका ८७८ जना किन रोकिए ?

A+ A A-

सरकारले इजरायलमा नेपाली कामदार पठाउन सन् २०१५ देखि सुरु गरेको हो । तर, इजरायल सरकारले प्राविधिक कारण देखाउँदै सन् २०१८ मै कामदार लिन बन्द गर्‍यो ।

गत असोजमा इजरायलका लागि तत्कालीन नेपाली राजदूत अन्जान शाक्य र इजरायली परराष्ट्रमन्त्री गावी अस्केनाजीबीच श्रम सम्झौतामा हस्ताक्षर भयो । सोही सम्झौताका आधारमा गत मंसिरको पहिलो साता भाषा परीक्षा सञ्चालन गरी नेपालमा श्रमिक छनाैट गरिएको थियो ।

इजरायलका दीर्घकालीन स्याहार केन्द्रमा सहयोगी कामदारको रूपमा छनोट भएका १ हजार १ सय ७५ जना कामदारमध्ये करार सम्झौता (एसईसी) सम्पन्न भई २ सय ९७ जना नेपाली कामदार इजरायल पुगिसकेका छन् । बाँकी ८७८ जना कामदार लैजान भने गत फागुन महिनादेखि नै रोकिएको छ ।

सन् २०१५ मा भएको श्रम सम्झौताअनुसार ३ वर्षमा ३ सय कामदार आपूर्ति गर्ने इजरायलसँग समझदारी भए पनि यो अवधिमा १ सय ६ जना मात्र इजरायल रोजगारीका लागि गएको वैदेशिक रोजगार विभागको तथ्यांक छ ।

त्यतिबेला इजरायल जानका लागि विभागले पहिलो चरणमा गरेको आवेदनमा ८ सय १८ जनाले दरखास्त दिएका थिए । त्यसबाट अन्तिम भाषा परीक्षामा १ सय जना सहभागीमध्ये ५९ जना मात्रै छनोट भएर रोजगारीका लागि इजरायल पुगेको विभागले जनाएको छ ।

दोस्रो वर्ष करिब १ हजार जनाले आवेदन दिएका थिए । जसमा ६० जना अन्तिम छनोटमा परे पनि अन्त्यमा ४७ जना मात्र इजरायल पुगेको विभागको तथ्यांक छ । तेस्रो वर्ष इजरायलले कामदारको माग नै गर्न छाडेको थियो ।

यो पटक पनि उस्तै

नेपाल र इजरायल सरकारबीच भएको श्रम सम्झौताबमोजिम इजरायलको पिवाले छनोट गरेका १ हजार १ सय ७५ मध्ये ८ सय २१ महिला र ३ सय ५४ पुरुषको अन्तिम नामावली प्रकाशित गरिएको थियो । जसमा २ सय ९७ इजरायल पुगिसकेका छन् भने नामावली प्रकाशित भएका ८ सय ७८ जनाको रोजगार सम्झौता भए पनि कहिले इजरायलले लिने हो भन्ने निश्चित नभएको वैदेशिक रोजगार विभागले जनाएको छ ।

नेपालबाट इजरायलले नर्सिङ क्षेत्र, अस्पताल, नर्सिङ होम, दिवा सेवा केन्द्रलगायतमा नेपाली केयर गिभरमा श्रमिक आपूर्ति गर्नेगरी सम्झौता भएर एक चरणमा कामदार पठाइसकेको विभागका निर्देशक डम्बर सुनुवारले बताए ।

नेपालस्थित इजरायली दूतावासले इजरायलको परराष्ट्र मन्त्रालयका कर्मचारीहरूको श्रम विवादका कारण छनाैट भई रोकिएका कामदार इजरायल प्रस्थान हुँदा नेपाली सहयोगी कामदारको भिसा जारी हुन नसकेको जनाएको छ । सोही समस्याका कारण नेपाली कामदार रोकिएको र तत्काल कामदार आपूर्ति गर्ने विषयमा दोहोरो छलफल भइरहेको विभागले जनाएको छ ।

वैकल्पिक उपायमार्फत भए पनि कामदार पठाउनका लागि श्रम, रोजगार तथा सामाजिक सुरक्षा मन्त्रालय र परराष्ट्र मन्त्रालयले आवश्यक पहल गरिरहेको विभागले जनाएको छ । विभाग र इजरायलको जनसंख्या तथा अध्यागमन ब्युरोसँग रोजगार सम्झौता भएका कामदार पठाउन पहल भइरहेको विभागका निर्देशक सुनुवारले बताए ।

इजरायलको हेरचाह केन्द्रमा सहायक कामदारका लागि जाने नेपालीको उमेर २५ वर्ष पूरा भई ४५ वर्ष ननाघेको हुनुपर्ने सम्झौतामा उल्लेख छ । त्यस्तै, उचाइ कम्तीमा १.५ मिटर र तौल कम्तीमा ४५ केजी हुनुपर्नेछ । इजरायल गएर फर्किएका कामदारले आवेदन दिन नपाउने प्रावधान राखिएको थियो ।

इजरायल जाँदा हवाई भाडा, स्वास्थ्य बीमा, अभिमुखीकरण, पासपोर्ट, पीसीआरसहितको स्वास्थ्य परीक्षण, कल्याणकारी कोषसहित १ लाख ६५ हजार ७ सय शुल्क कामदारले व्यहोर्नुपर्नेछ । नेपालबाट इजरायल रोजगारीमा जाने कामदारको मासिक करिब २ लाख रुपैयाँ कमाइ हुन्छ ।

हाल इजरायलमा करिब ७ हजारभन्दा बढी नेपाली महिलाहरू रोजगारीमा कार्यरत रहेको सरकारी अनुमान छ । ३ वर्षअघि नै इजरायल रोजगारीमा जान भनेर हिब्रु भाषा र केयर गिभरको तालिम लिएका करिब ३ हजार महिलाहरू इजरायल जाने पर्खाइमा रहेको विभागको अनुमान छ ।

प्रकाशित मिति: मंगलबार, असार १४, २०७९ ०६:२३