पाँचथरका विर्जमानले सुसाइट नोट लेखेर मलेसियामा आत्महत्या गरे

A+ A A-

रोजगारीको खोजीमा साढे ५ वर्षअघि मलेसिया पुगेका पाँचथरको फालेलुङ गाउँपालिका- १ का विर्जमान कामीले 'आत्महत्या' गरेका छन् । ३८ वर्षीय विर्जमानले शनिबार मलेसियाको कोलालम्पुरस्थित आफू कार्यरत कम्पनीले दिएको कोठामा आत्महत्या गरेका हुन् ।

विर्जमानले आत्महत्या गर्नुअघि दुई छोरी र श्रीमतीका नाममा सुसाइट नोटसमेत लेखेका छन् । उनले सुसाइड नोटमा छोरीलाई आफू बाँचेर पनि सुख दिन नसकेको, दिदी–बहिनी मिलेर बस्नु भनेर लेखेका छन् । त्यस्तै श्रीमतीलाई भने उनले सुख दिन नसकेको उल्लेख गरेका छन् ।

विर्जमानकी श्रीमती गोमाका अनुसार श्रीमान्‌ले उनलाई दसैँमा घर आउछु भनेका थिए । 'दसैँमा घर फर्किने भनेर म र छोरीसँग शुक्रबार साँझ फोनमा गफ गरेको श्रीमान् शनिबार झुन्डिएर आत्माहत्या गरेको खबर आयो,' गोमा भन्छिन्, 'यो सुन्दा छाँगाबाट खसेजस्तो भए पनि छोरीका अगाडि सहेर बसेकी छु ।'

विर्जमानले अहिले कमाइ छैन भनेर सुनाउने गरेको गोमा बताउँछिन् । आफूले गाउँ-घरमै बनिबुतो गरौँला भनेर सम्झाएको उनको भनाइ छ । ‘दुई जना छोरी पढाउन भनेर मलेसिया गएका थिए । जहिले तीन महिनापछि आउँछु भनेको चार वर्ष भयो । तर, पैस छैन भनेर आउनुभएन,’ गोमा भन्छिन्, ‘उहाँ मलेसिया जाँदा लागेको ऋणसमेत तिर्नुभएको छैन । ५ रोपेनी जग्गा छ । यो जमिनमा कोदो र मकै मात्र फल्छ । अब छोरी र म कसरी बाच्नु ?’

आफूले मलेसिया नजान सम्झाएको गोमाले बताइन् । तर, विर्जमानले साउदी जान्छु भनेर मलेसिया गएको उनी बताउँछिन् । ‘२ लाख ऋण गरी मलेसिया जानुभएको थियो । ५ वर्षमा एक लाख मात्र पठाउनुभयो । विदेश जान ३ लाख खर्च भएको थियो । २ लाख रुपैयाँ अझै तिर्ने बाँकी छ,’ उनले भनिन्, ‘उहाँ जाँदा लागेको ऋण कसरी तिर्नु ? अरुको बनीबुत्तो गरेर छोरी पाल्दैछु । फेरि अवैध बस्नुभएको रहेछ । केही क्षतिपूर्ति पनि पाइँदैन रे । समस्यामाथि समस्या थपियो ।’

मलेसियामै बस्दै आएका पाँचथरका दिलकुमार लिम्बुका अनुसार विर्जमानको अन्त्येष्टि मलेसियामै गरिएको छ । विर्जमानको कमाइ र आर्थिक अवस्था कमजोर भएकाले मलेसियामा रहेका नेपालीहरूले चन्दा संकलन गरेर उनको अन्तेष्टि गरिदिएको लिम्बु बताउँछन् ।

मलेसियामा आत्महत्या, दुर्घटना र अन्य समस्याका कारण नेपालीहरूको मृत्य हुने गरेको छ । पछिल्लो समय अवैध रूपमा बसेर काम गर्ने धेरै नेपालीहरूको मृत्यु भए पनि स्वदेश फर्काउन समस्या भइरहेको त्यहाँ रहेको नेपाली दूतावासले जानकारी दिएको छ ।

जेठसम्म रोजगारीका लागि मलेसियामा पुगेका ७ सय ३४ जना नेपालीहरूको मृत्यु भएको वैदेशिक रोजगार वोर्डको सचिवालयको तथ्यांक छ ।

प्रकाशित मिति: आइतबार, असार १२, २०७९ १५:२९