पप रेकर्ड गरें, आधुनिक गाएर हिट भएँः प्राश्ना शाक्य

A+ A A-

नेपाली गीत संगीत क्षेत्रको नौलो नाम होइन, प्राश्ना शाक्य । शाक्यका ओइलाएको फूललाई फेरि फुलायौं, ए कान्छा मलाई, ए हावा, लामो बाटोजस्ता दजनौं गीत चर्चित छन् । उनले पप, आधुनिक गीत, लोक पप र चलचित्रका गीत गाइसकेकी छन् । उनी झन्डै दुई दशकदेखि नेपाली संगीतमा क्रियाशील छिन् । शाक्य विभिन्न देश तथा विदेशमा हुने सांगीतिक कार्यक्रममा समेत व्यस्त हुन्छिन् । शाक्यले मैथिली र भोजपुरी भाषाका गीत पनि गाएकी छन् । शाक्यसँग नेपाली गीत संगीतबारे शिलापत्रकर्मी पवन बराइलीले गरेको कुराकानी:

सांगीतिक क्षेत्रमा कसरी प्रवेश गर्नुभयो ?

मेरो बाल्यकाल धरानमै बित्यो । धरानमा विभिन्न सांगीतक कार्यक्रम हुन्थे । म डान्स गर्न रुचाउँथें । म स्कुलको कार्यक्रममा भाग लिन्थें । त्यसैको प्रभावले म सांगीतिक क्षेत्रमा तानिएँ ।

औपचारिक रेकर्ड गरिएको तपाईंको पहिलो गीत कुन हो ?

‘जाऊँ हिँड प्रियसी जाऊँ हिँड’ बोलको गीत पहिलो औपचारिक रेकर्ड भएको गीत हो । त्यो बेला मलाई संगीतको खासै ज्ञान थिएन ।

कक्षा आठमा पढ्दै थिएँ । अग्रजहरूले मलाई गाउन लगाउनुभएको थियो । मैले पछि फर्किएर हेर्नुपरेन । भोजपुरी मैथली गीतहरू गाउने अफर आयो ।

एसएलसी पछि ‘हाई हेल्लो’ एल्बम निकालें । मेरो बुबाले रहर गरेर निकालिदिनुभएको हो । त्यो गीतमा म आफंैले पनि मोडलिङ गरेकी थिएँ । केही मान्छेले मात्रै मलाई चिने । म पनि सानै थिएँ । त्यो गीत खासै चलेन ।

एसएलसी पछि म्युजिक कलेजमा पढ्न थालें । त्यस बेला अहिलेजस्तो प्रविधिको विकास भएको थिएन । ठीकै चल्यो । ‘आवाज–२’ भन्ने एल्बम मलाई प्रश्ना शाक्य भनेर चिनाउने एल्बम हो ।

कतिको संघर्ष गर्नुपर्‍यो ?

२०५८ सालदेखि निरन्तर सांगीतिक क्षेत्रमा छु । सुरु सुरुमा निकै गाह्रो भयो । मेरो परिवारबाट सांगीतिक क्षेत्रमा कोही पनि आउनुभएको थिएन । सबै व्यापार व्यवसायमा लाग्नुभएको छ । मेरो परिवार मलाई डाक्टर बनाउन चाहन्थ्यो । तर, मैले संगीत रोजें ।

त्यो बेला कलाकारलाई कसैले मान्यता दिँदैनथे । मलाई पनि कार्यक्रममा भाग लिन जान मन लाग्थ्यो । तर, मलाई सहभागी हुन दिइँदैनथ्यो ।

धरानमा हुने विभिन्न सांगीतिक कार्यक्रममा गाउन थालें । सबैले चिन्न थाले । मेरा बाआमालाई पनि ‘प्रश्नाको बुबाआमा’ भन्ने थाले । त्यसपछि परिवारको सहयोग मिल्न थाल्यो । जीवनमा संघर्ष भनेको गर्नुपर्छ । अहिले पनि संघर्ष गर्दै छु । अहिले पनि संगीत सिक्दै छु ।

पहिले र अहिले संगीत क्षेत्रमा कस्तो फरक पाउनुभएको छ ?

नेपाली गीतसंगीतले पछिल्लो समय ठूलो फड्को मारेको छ । पहिले प्रविधिको विकास भएको थिएन । हामीले एल्बम निकाल्ने बेला अर्कै खालको संघर्ष थियो । प्रचार प्रसार गर्ने माध्यमहरू पर्याप्त थिएनन् । गीत निकाले पनि आफूलाई चिनाउन निकै गाह्रो हुन्थ्यो । समाचार प्रकाशित गरिदिनुस् भन्नुपथ्र्याे ।

अहिले तपाइँसँग पैसा छ, चाँडै नै खुबी देखिन्छ । यदि पैसा छैन भने धेरै गाह्रो छ । गायन क्षमता भएर मात्रै भएर पनि हुँदैन । प्रविधिको ज्ञान हुनुपर्छ । मेहनत गर्नलाई धेरै अवसर छन् । त्यसैले गीत संगीतमा त्यसैले त्यो बेला र यो बेला आकाश पतालको फरक छ ।

पछिल्लो समय गीतसंगीत युट्युबमा अड्किएको छ । लाइक र सब्सक्राइबबाट गीतको मूल्यांकन गरिन्छ । राम्रो गाउने गायक गायिका पनि छायाँमा परेका छन् ।

यस्तो हुँदाचाहिँ नराम्रो लाग्छ । तर, हामी कलाकार हौं । आफ्नो क्षेत्रबाट लागिरहेका छौं । मेरो गीतलाई माया गर्ने श्रोताले अझै नै माया गरिरहनुभएको छ ।

सांगीतिक क्षेत्रमा तपाइँ लामो समयदेखि क्रियाशील हुनुहुन्छ । आफैंले आफूलाई कसरी मूल्यांकन गर्नुहुन्छ ?

सामान्य विचारधारा बोकेकी मान्छे हुँ । त्यति साह्रो गीत गाउन जान्ने मान्छे होइन, कला भएको मान्छे हुँ । गीत गाउन रुचाउने मान्छे हो । गीत गाउने खुबीचाहिँ धेरथोर छ । आफूलाई मूल्याकँन गर्दा अझै पनि आफूलाई निखार्न नसकेको हो कि भन्ने लाग्छ । अहिले पनि यस क्षेत्रमा क्रियाशील नै छु ।

गीत गाएर बाँच्न सकिन्छ ?

गीत संगीतमा आत्मसन्तुष्टिकै लागि आउने हो । म आफैंले पनि गीत संगीतमा राम्रो गर्न सकिरहेको छैन जस्तो लाग्छ । गीतसंगीत नै सिक्दै छु । म सन्तुष्टचाहिँ छैन । र, असन्तुष्ट हुन पनि आफैंमा राम्रो पनि हो । सन्तुष्ट भयो, अगाडि बढ्न सकिँदैन ।

कलाकारितमा लागेका मान्छेलाई खाना लाउनु पुग्दैन भनेर भन्छन् । तर मलाई सामान्य जीवन बिताउन पुगिरहेको छ । वास्तवमा अहिले कलाकारको पारिश्रमिक बढेको छैन । नेपालमा निश्चित पारिश्रमिक लिएर काम गर्ने वातावरण नै बनेको छैन ।

भविष्यमा कस्ता गीत गाउने सोचमा हुनुहुन्छ ?

म अरुणा लामाका गीत गाएर हुर्किएकी हुँ । मैले रेकर्ड गरेको पप गीत हो । मेरो शैली पप होइन, आधुनिक गीत गाउने गायिका हुँ । रेडियो नेपालमा मैले आधुनिक गीत गाएँ ।

म आधुनिक गीत गाएरै हिट भएकी हुँ । पप, र्‍याप, लोकगीत र लोकपप पनि गाइसकेकी छु । अबचाहिँ फेरि पप गीत गाउन मन छ ।

प्रकाशित मिति: शुक्रबार, साउन ३, २०७६ २१:५७