७ करोड पर्ने जग्गाको कर तिर्न मालपोत पुगेकी शान्ताले जब आफ्नै मृत्यु भइसकेको प्रमाणपत्र देखिन्

७ करोड पर्ने जग्गाको कर तिर्न मालपोत पुगेकी शान्ताले जब आफ्नै मृत्यु भइसकेको प्रमाणपत्र देखिन्

A+ A A-

लमजुङकी शान्तादेवी लोहनीको परिवार २४ वर्षदेखि जापानमा बस्दै आएको थियो । जापानमै व्यवसाय गरेर बसिरहेका उनको परिवार कहिलेकाहीँ मात्रै नेपाल आउँथ्यो ।

जापानमा बस्न थालेपछि २०६१ मा पहिलो पटक नेपाल फर्किएको लोहनी परिवारले त्यही बेला १३ माघ ०६१ मा कीर्तिपुर नगरपालिका– २, मा रहेको कित्ता नम्बर ३४४ को ३६१ वर्ग किलोमिटरमा फैलिएको जग्गा खरिद गर्‍यो ।

लोहनी परिवार जग्गा किनेको केही समयमै फेरि जापान फर्कियो । त्यसयता लोहनीको परिवार बीचबीचमा नेपाल-जापान आउजाउ गर्दै आएको थियो । नेपाल आएका बेला शान्ता जग्गाको कर तिर्न कलंकीस्थित मालपोत कार्यालय पुग्थिन् ।

पछिल्लो ३ वर्षयता भने लोहनी परिवार नेपाल फर्किन पाएको थिएन । तीन वर्षपछि उनीहरू एक महिनाअघि ५ जेठमा नेपाल फर्किए । नेपाल फर्किएपछि यस अघिझैँ लोहनी परिवार आफ्नो जग्गाको कर तिर्ने र बायोमेट्रिक प्रणालिमा अभिलेखन गर्ने तयारीमा थियो । त्यसैको लागि शान्तादेवी लोहनी १३ जेठमा जग्गाको पुर्जा लिएर कलंकी मालपोत पुगिन् ।

तर, मातपोत कार्यालय पुग्दा भने उनी छाँगाबाट खसेझैँ भइन् । बायोमेट्रिक प्रणालीमा अभिलेखन गर्न र कर तिर्न पुगेकी शान्तादेवी लोहनीलाई मालपोतका अधिकारीले भनेका थिए, ‘यो जग्गा त शान्तादेवीको नामबाट १५ पुस ०७७ मै मृत्यु नामसारी भएर उनका पति तारानिधि लोहनीको नाममा नामसारी भएको र उनको नामबाट पनि १० फागुन ०७७ मै भक्तपुरका सुनिता कर्माचार्यको नाममा नामसारी भएको पो देखिन्छ ।’

जीवितै रहेकी शान्तादेवीको मृत्यु भएको प्रमाण पुर्‍याएर उनको नाममा भएको जग्गा मालपोत कार्यालयबाट दुई पटक नामसारी भइसकेको थियो । उनले आफू जीवितै भएको त बताइन् तर, मालपोतमा पेस भएको कागजातले १३ भदौ ०७७ मै कालगतीले मृत्यु भएको देखाउँथ्यो ।

मालपोतमा उनको मृत्युको प्रमाणपत्र मात्रै थिएन । उनको मृत्युपछिको हकवाल श्रीमान् तारानिधि लोहनी आफू नै भएको नाता प्रमाणित गराएर जग्गाको नामसारी भएको थियो । त्यसपछि पनि उक्त जग्गा बिक्री भइसकेको थियो ।

कागजातमा उल्लेख भएअनुसार उक्त जग्गा एक समूहले मृत्यु प्रमाणपत्रसहित सबै काजगाज कीर्ते गरेर ३ करोड ७० लाख रुपैयाँमा कर्माचार्याको नाममा नामसारी गरेको खुलेको छ । हाल उक्त जग्गाको मूल्य ७ करोड बराबरको हुन आउने प्रहरीको भनाइ छ ।

यसरी कीर्ते कागाजात बनाएर लोहनी परिवारको जग्गा बिक्री गर्ने समूहका पाँच जनालाई प्रहरीको केन्द्रीय अनुसन्धान ब्युरो (सीआईबी) ले पक्राउ गरेर आइतबार सार्वजनिक गरेको छ ।

यसरी पर्‍यो कीर्ते गर्ने समूह सीआईबीको फन्दामा

कीर्ते कागजातका आधारमा आफ्नो जग्गा कर्माचार्याको नाममा नामसारी भएको थाहा पाएको लोहनी परिवार अनुसन्धान गरिपाउँ भन्दै सीआईबीसम्म पुगेको थियो ।

डीएसपी गोविन्दराज काफ्ले

सीआईबीले आर्थिक अपराध पिलरका प्रमुख प्रहरी नायव उपरीक्षक (डीएसपी) गोविन्दराज काफ्लेको कमान्डमा अनुसन्धान टोली खटायो ।

काफ्लेको टोलीले करिब १५ दिन लामो अनुसन्धानबाट लोहनीको जग्गा कीर्ते गरेर बिक्री गर्ने समूहलाई पक्राउ गर्न सफल भएको सीआईबीका प्रवक्ता प्रहरी उपरीक्षक (एसपी) श्यामकुमार महतोले जानकारी दिए ।

पक्राउ पर्नेमा दार्चुला मालिकार्जुन गाउँपालिका– ७ का महावीर चन्द, सिन्धुपाल्चोक मेलम्ची नगरपालिका– ४ का गणेशबहादुर खनाल, सोलुखुम्बुको दुधकोशी गाउँपालिका– १ का बाबुराम कार्की, नुवाकोट तारकेश्वर गाउँपालिका– १ का प्रेमप्रसाद खनाल र काठमाडौं तारकेश्वर नगरपालिका- १६ की ममता भनिने माया श्रेष्ठ छन् ।

उनीहरूको साथबाट प्रहरीले केही थान नक्कली नागरिकता, नक्कली जग्गाधनी पुर्जा, विभिन्न व्यक्तिका ६० थान फोटो । १४ थान मोबाइल फोन र २९ थान सीम कार्ड बरामत गरेको छ ।

अनुसन्धानमा खटिएका प्रहरी नै चकित

नक्कली र कीर्ते कागजात बनाएर अर्काको नाममा रहेको जग्गा नै बिक्री वितरणको धन्दामा लागेका उनीहरूबारेको अनुसन्धानमा लागेको सीआईबीको टोली नै चकित परेको छ ।

प्रहरी अनुसन्धानले लोहनी परिवारको मात्रै नभएर यही समूहले काठमाडौं र चितवनमा गरेर अर्काको नाममा रहेको ४ बिघा जग्गा कम्पनी र नक्कली जग्गाधनी खडा गरेर बिक्री वितरणको तयारी गरेको खुलाएको छ ।

सीआईका प्रवक्ता महतोका अनुसार चितवको २८ बिघा जग्गा उनीहरूले नक्कली कम्पनी दर्ता गरेर आफ्नो नाममा नामसारी गरेको खुलेको छ ।

एसपी श्यामकुमार महतो

‘यो समूहलाई हामीले चाँडै पक्राउ गरेर कीर्ते कागजात बनाएर बिक्री गर्न लागिएको जग्गा रोकिएको छ,’ एसपी महतो भन्छन्, ‘उनीहरूको समूहले चितवनको जग्गा बिक्रीको अन्तिम चरणमा पुगेका बेला चितवनबाटै पक्राउ गर्न सफल भयौँ ।’

सीआईबीको अनुसन्धानले लोहनीको जग्गा कीर्ते गर्न नक्कली तारानिधि लोहनी हुनेमा दार्चुलाका चन्द रहेको देखाएको छ । त्यस्तै आर्थिक कारोबारको जिम्मा भने भक्तपुरका खनाल, नक्कली कागजात बनाउने मूख्य योजनाकार सोलुखुम्बुका कार्की र नुवाकोटका खनाल रहेको देखिन्छ । भक्तपुरका श्रेष्ठ जग्गा खरिद गर्ने व्यक्ति खोज्ने विचौलीया रहेको प्रहरी अनुसन्धानले खुलाएको छ ।

अन्य जग्गाको नक्कली र कीर्ते कागजात बनाउने काममा यही भूमिकामा उनीहरू रहेको खुलेको छ । सीआईबीको टोलीले उनीहरूमाथि थप अनुसन्धान गर्न पहिलो पटक अदालतबाट सात दिनको म्याद थप गरेर अनुसन्धान जारी रोखको छ ।

प्रकाशित मिति: आइतबार, असार ५, २०७९ २१:१२