बागमतीका मुख्यमन्त्री र अर्थमन्त्रीको गृहजिल्लालाई सबैभन्दा धेरै बजेट

A+ A A-

बागमती प्रदेश सरकारले आगामी आर्थिक वर्ष २०७९–८० का लागि १ असारमा बजेट ल्याएको छ ।

प्रदेश सरकारले चालु आर्थिक वर्षको भन्दा १३ करोड बढी अर्थात् ७० अर्ब ९३ करोड ९२ लाख रुपैयाँको अनुमानित आयव्यय विवरण सार्वजनिक गरेको हो । चालु आर्थिक वर्षमा तत्कालीन एमाले सरकारले ५७ अर्बको बजेट ल्याएको थियो । बजेटमा भौतिक पूर्वाधारलाई धेरै प्राथमिकता दिइएको छ । सरकारको साँचो हातमा लिइरहेका मुख्यमन्त्रीदेखि बजेट बनाउने अर्थमन्त्रीले आफ्नो जिल्लामा बढी बजेट पनि खनाएका छन् ।

बागमती प्रदेशका मुख्यमन्त्री राजेन्द्र प्रसाद पाण्डे र आर्थिक मामिला तथा योजनामन्त्री शालिकराम जम्मकट्टेलको गृहजिल्ला धादिङ हो । बागमतीका १३ जिल्लामध्ये धादिङमा सबैभन्दा धेरै बजेट विनियोजन गरिएको छ । भौगोलिक रूपले विकट तर, पर्यटन क्षेत्रमा प्रचुर सम्भावना बोकेको रसुवामा भने सबैभन्दा थोरै बजेट विनियोजन गरिएको छ ।

धादिङमा ९१ करोड ३४ लाख ४० हजार रुपैयाँ बजेट छुट्याइएको छ । चालुतर्फ ६१ करोड ६१ लाख २१ हजार, पुँजीगततर्फ २९ करोड ७३ लाख १२ हजार बजेट विनियोजन गरिएको उल्लेख छ । समानीकरण अनुदानतर्फ १९ करोड १० लाख १३ हजार, सशर्त अनुदानतर्फ ३३ करोड ८१ लाख १५ हजार, विशेष अनुदानतर्फ ८ करोड ७० लाख र समपूरक अनुदानमा २९ करोड ७७ लाख १२ हजार धादिङलाई बागमती प्रदेश सरकारले विनियोजन गरेको हो ।

धादिङपछि सबैभन्दा धेरै बजेट काभ्रेलाई विनियोजन भएको छ । काभ्रेलाई ९० करोड ८३ हजार बजेट विनियोजन गरिएको हो । काभ्रेबाट प्रदेश सरकारमा दुई मन्त्री छन् । कृषि तथा पशुपन्छी विकासमन्त्री बसुन्धरा हुमागाईं र युवा तथा खेलकुदमन्त्री रत्न ढकालको गृहजिल्ला हो, काभ्रे । काभ्रेमा चालुतर्फ ५४ करोड ९ लाख ६८ हजार र पुँजीगततर्फ ३५ करोड ९१ लाख १५ हजार बजेट छुट्याइएको हो ।

संघीय राजधानीसमेत रहेको काठमाडौं जिल्लामा प्रदेश सरकारले ८८ करोड ९ लाख ५२ हजार रुपैयाँ बजेट विनियोजन गरेको छ । काठमाडौंलाई चालुतर्फ ६२ करोड २८ लाख १४ हजार र पुँजीगततर्फ २५ करोड ८१ लाख ३८ हजार बजेट छुट्याइएको हो । सरकारले दोलखालाई ८३ करोड ५२ लाख ७२ हजार रुपैयाँ बजेट छुट्याएको छ । चालुतर्फ ४१ करोड ५१ लाख १ हजार र पुँजीगततर्फ २२ करोड २९ लाख ७४ हजार बजेट विनियोजन गरेको हो ।

नुवाकोटलाई ८० करोड २८ लाख ८ हजार रुपैयाँ बजेट छुट्याएको छ । चालुतर्फ ४९ करोड ७९ लाख १ हजार र पुँजीगततर्फ ३० करोड ४९ लाख ७ हजार बजेट विनियोजन भएको हो । सरकारले सिन्धुपाल्चोकलाई ७६ करोड ९४ लाख ५३ हजार रुपैयाँ बजेट छुट्याएको छ । चालुतर्फ ५३ करोड ३२ लाख २१ हजार र पुँजीगततर्फ २३ करोड ६२ लाख ३२ हजार बजेट विनियोजन गरेको हो ।

मकवानपुरलाई ७५ करोड ८६ लाख २० हजार बजेट विनियोजन भएको छ । मकवानपुरमा चालुतर्फ ४७ करोड ५२ लाख २६ हजार र पुँजीगततर्फ २८ करोड ३२ लाख ९४ हजार बजेट छुट्याइएको हो । रामेछापलाई सरकारले ५५ करोड ५७ लाख बजेट विनियोजन गरेको छ । चालुतर्फ ३७ करोड ३ लाख ७३ हजार र पुँजीगततर्फ १८ करोड ५३ लाख २७ हजार बजेट विनियोजन भएको हो ।

चितवनलाई ५५ करोड ४६ लाख २६ हजार रुपैयाँ बजेट छुट्याएको छ । चालुतर्फ ३८ करोड ४३ लाख ९५ हजार र पुँजीगततर्फ १७ करोड २ लाख ३१ हजार बजेट विनियोजन भएको हो । सिन्धुलीलाई ५४ करोड १० लाख ५५ हजार रुपैयाँ बजेट विनियोजना भएको छ । चालुतर्फ ३६ करोड १ लाख ५८ हजार र पुँजीगततर्फ १८ करोड ८ लाख ९७ हजार बजेट छुट्याएको हो ।

प्रदेशका अधिकांश जिल्लालाई छुट्याइएको बजेटको करिब आधा बजेट तीनवटा जिल्लालाई विनियोजन भएको छ । जसमध्ये उपत्यकाको ललितपुर र भक्तपुरसहित रसुवालाई थोरै बजेट छुट्याइएको हो । ललितपुरलाई ४४ करोड ८५ लाख ८५ हजार रुपैयाँ बजेट छुट्याइएको छ । चालुतर्फ ३० करोड ६४ लाख ९ हजार र पुँजीगततर्फ १४ करोड ३१ लाख ७६ हजार बजेट विनियोजन भएको हो ।

प्रदेश सरकारले भक्तपुरलाई ३१ करोड ९४ लाख ९७ हजार रुपैयाँ बजेट छुट्याएको छ । चालुतर्फ १९ करोड ९८ लाख ५७ हजार र पुँजीगततर्फ ११ करोड ९६ लाख ४० हजार बजेट भक्तपुरलाई विनियोजन गरेको हो । रसुवा जिल्लालाई भने जम्मा २६ करोड ९८ लाख ३५ हजार रुपैयाँ बजेट विनियोजन भएको हो । चालुतर्फ २० करोड ६० लाख ५३ हजार र पुँजीगततर्फ ६ करोड ३७ लाख २२ हजार बजेट विनियोजन भएको हो ।

प्रकाशित मिति: शुक्रबार, असार ३, २०७९ ०६:४७