कर्मचारीकी श्रीमती मन परेपछि हत्या गर्ने ‘डोसा किङ’ को मृत्यु

A+ A A-

भारतीय रेस्टुराँ कम्पनी सरवण भवनका मालिक पी राजगोपालको ७२ वर्षको उमेरमा निधन भएको छ । विश्वभरी ८० वटा शाखा रहेको भारतीय रेस्टुराँ कम्पनी सरवण मालिक राजगोपालको हृदयाघातका कारण मृत्यु भएको हो ।

उनी आफ्नै कर्मचारीको हत्या आरोपमा आजीवन काराबासको सजाय पाएका व्यक्ति हुन् । भारतीय सर्वोच्च अदालतले सो सजाय सुनाएपछि उनी कारकारमा जीवन बिताउँदै आएका थिए । गत ९ जुलाईमा अदालतमा आत्मसमर्पण गरेपछि जेलमा राखिएको थियो । तर स्वास्थ्य अवस्था बिग्रिएपछि उपचारका लागि सरकारी अस्पतालमा भर्ना गरिएको थियो ।

आफ्नै एक कर्मचारीकी श्रीमती मन परेपछि उनलाई पाउन राजगोपालले ती कर्मचारीको हत्या गरेका थिए । जेल सजायबाट उन्मुक्ति पाउन सन् २००९ देखि कानुनी लडाई लडेपनि उनको अपिललाई अदालतले अस्वीकार गरेको थियो । उनका रेस्टुराँमा ब्रिक्री गरिने दक्षिण भारतीय परिकार डोसा लोकप्रिय बनेपछि उनलाई ‘डोसा किङ’ उपनाम दिइएको थियो ।

ज्योतिषीको सल्लाहमा राजगोपालले ती महिलासँग बिहे गर्ने अडान लिएका थिए । सन् २००३ मा ती महिलालाई आर्थिक प्रलोभन देखाएको, उनको परिवारका सदस्यहरूलाई धम्काएको र भाइलाई आक्रमण गरेको बताइएको छ । सन् २००१ मा आफ्ना श्रीमान् बेपत्ता भएपछि ती महिलाले राजगोपालविरुद्ध प्रहरीमा उजुरी दायर गरेकी थिइन् ।

खोजीका क्रममा उनका श्रीमानको शव जंगलमा भेटिएको थियो । अनुसन्धानका क्रममा घाँटी थिचेर हत्या गरेको पुष्टि भएको थियो । सन् २००४ मास्थानीय अदालतले उनलाई दोषी ठहर गर्दै १० वर्षको सजाय सुनाएकामा चेन्नईस्थित उच्च अदालतले त्यसलाई बढाएर आजीवन जेल सजाय सुनाएको थियो । मार्चमा सर्वोच्चले चेन्नई अदालतको फैसलालाई सदर गरेको थियो ।