सात अफ्रिकी महिलाबाट २ दिनमा ५१ किलो हेरोइन बरामद गर्ने प्रहरीको ‘ह्वाइट डस्ट’ अपरेसन

सात अफ्रिकी महिलाबाट २ दिनमा ५१ किलो हेरोइन बरामद गर्ने प्रहरीको ‘ह्वाइट डस्ट’ अपरेसन

A+ A A-

अफ्रिकी नागरिक ४६ वर्षीया म्युरेल साम्बाको नेपाल यात्रा पहिलो थिएन । भिजिट भिषामा विभिन्न देश पुगिरहने साम्बाको नेपाल यात्रा तेस्रो पल्टको थियो । ए ०६३७६९८१ नम्बरको पासपोर्ट भएकी उनी पहिलोपटक गत वर्षको माघ र फागुनमा मात्रै नेपाल आएर फर्किएकी थिइन् ।

दुईपटकको नेपाल यात्रा सुखद रूपमा सकेर फर्किएकी साम्बा फेरि फ्लाई दुबई उडानबाट पाँच दिनअघि २९ जेठमा नेपाल आइपुगिन् । यसअघि एक्लै नेपाल आएर फर्किएकी उनी यसपटक भने अफ्रिकाकै सिब्सी एन्डिकेल लिएर नेपाल आएकी थिइन् ।

नेपाल बसाईको लागि उनीहरूले अफ्रिकाबाटै ठमेलको एक होटल बुक गरेर आएका थिए । उनीहरू उक्त होटलमा पुगेर बसिरहेका थिए ।

नेपाल आएर ठमेलका विभिन्न डिस्कोसमेत पुगेका उनीहरू दुवैले केही नेपाली साथीहरूसमेत बनाइसकेका थिए । तर, प्रहरीको लागुऔषध नियन्त्रण ब्युरोको टोलीले उनीहरू दुवैको निगरानी त्रिभुवन विमानस्थल ओर्लिएदेखि नै गर्न थालेको थियो ।

साम्बाले प्रहरीले आफ्नो निगरानी गरीरहेको कुरा भेउसम्म पाएकी थिइनन् । उनी नेपाल आइपुगेको एक दिनपछि ३० जेठ साढे ४ बजे प्रहरी साम्बा बसेको होटलको १०२ नम्बर कोठामा पुग्यो ।

उनीहरूको कोठा खानतलासी गरेको प्रहरीले लगेज पनि जाँच गर्‍यो । त्यही लगेजभित्र सिलाएर उनीहरूले लागुऔषध सेतो हेरोइन ल्याएको भेटिएको लागुऔषध नियन्त्रण ब्युरोका निमित्त प्रमुख प्रहरी उपरीक्षक (एसपी) जीवन श्रेष्ठले जानकारी दिए । उनीहरू दुवै जनाको लगेजबाट प्रहरीले ८/८ किलो सेतो हेरोइन फेला पारेको हो ।

एसपी जीवन श्रेष्ठ

३० जेठमा उनीहरूको साथबाट १६ किलो सेतो हेरोइन फेला पारेको प्रहरीको लागुऔषध नियन्त्रणको टोलीले दुवै जनालाई पक्राउ गरे पनि सार्वजनिक भने गरेन ।

ब्युरोको टोलीलाई फेरि उनीहरूजस्तै सेतो हेरोइनसहित अर्को अफ्रिकन टोली नेपाल आइपुग्दै गरेको सूचना आयो । ब्युरोको टोली फेरि दुबई हुँदै नेपाल भित्रिन लागेका अफ्रिन टोलीको निगरानीमा लाग्यो ।

३० जेठ साढे ६ बजे दुबई उडानबाट ३९ वर्षीया थिसाबाला नेपाल ओर्लिइन् । ब्युरोको टोलीले उनको निगरानी गरिरह्यो । उनी त्रिभुवन विमानस्थलबाट सिधै ठमेल हान्निइन् । होटल पुगेको ५ घण्टापछि प्रहरी उनी बसेको कोठामा पुग्यो ।

उनले ल्याएको लगेजमा पनि पहिला नै नियन्त्रणमा लिइएका म्युरेल साम्बा र सिब्सीले ल्याएको जस्तै गरी हेरोइन लुकाएको आशंकामा प्रहरीले उनको लगेज जाँच गर्‍यो । उनको लगेजभित्र पनि प्रहरीले ८ किलो सेतो हेरोइन फेला पार्‍यो ।

तर, ब्युरोको अपरेसन सकिएको थिएन । ३० जेठकै त्यही समयमा रोजिना नोनो पनि नेपाल आइपुगेकी थिइन् । उनी पनि ठमेलकै एक होटलमा बसेको सूचना ब्युरोले पायो । त्यही सूचनाको आधारमा साढे ११ बजे ब्युरोको टोलीले उनी बसेको कोठा खानतलासी गर्‍यो । उनको लगेजबाट पनि प्रहरीले ८ किलो सेतो हेरोइन बरामद गर्‍यो ।

अफ्रिकन महिलाहरू ठूलो मात्रामा सेतो हेरोइनसहित नियन्त्रण पर्न थालेपछि प्रहरीले अफ्रिकन महिलालाई थप निगरानीमा राख्यो । २७ जेठमा नेपाल आएकी मलेको बसेको कोठमा पनि खानतलासी गर्‍यो । उनको साथबाट पनि प्रहरीले ७ किलो सेतो हेरोइन बरामद गरेको छ ।

यो क्रम प्रहरीले जारी राख्यो । ३१ जेठमा नेपाल आइपुगेका थप दुई जना अफ्रिकन महिलालाई चाँच गर्दा ब्युरोको टोलीले उनीहरूको साथबाट थप २ किलो खैरो हेरोइन र १० किलो सेतो हेरोइन बरामद गर्‍यो ।

यसरी लागुऔषध नियन्त्रण ब्युरोको टोलीले २ दिनमा ठमेलबाट ७ अफ्रिकन महिलाको साथबाट ४९ किलो सेतो हिरोइ् र २ किलो खैरो हेरोइन बरामद गरेको छ । हेरोइनसहित पक्राउ परेकालाई ब्युरोले बिहीबार पत्रकार सम्मेलन गरेर सार्वजनिक गरेको छ ।

ब्युरोका एसपी श्रेष्ठले उनीहरू फरक-फरक समूहबाट भरियाको रूपमा नेपाल ट्रान्जिट बनाएर आएको बताए । ‘एक/दुई दिनको फरकमा उनीहरू नेपाल आए पनि फरक-फरक समूहको भरिया भएर नेपाल आइपुगेको अनुसन्धानबाट देखिन्छ,’ एसपी श्रेष्ठ भन्छन्, ‘हामीले पहिला पक्राउ गरेको टोलीलाई पक्राउ गरेको सूचना सार्वजनिक नगर्दा उनीहरू नियमित चेनको रूपमा नेपाल आए ।’

ब्युराेले याे अपरेसनलाई 'ह्वाइट डस्ट' नाम दिएर चलाएकाे थियाे । ठूलो मात्रामा नेपाल भित्रिएको हेरोइन भने नेपालीहुँदै भारत पठाउने तयारी उनीहरूको रहेको प्रहरीले दाबी गरेको छ ।

प्रकाशित मिति: बिहीबार, असार २, २०७९ १९:२७