विमानस्थलकाे कारुणिक दृश्य : दूधेबालक बाेकेर बुबाआमाकाे रुवाबासी

A+ A A-

शनिबार साँझ पर्वतकी पवित्रा नानु दुई वर्षको बच्चा च्यापेर त्रिभुवन अन्तर्राष्ट्रिय विमानस्थलको प्रस्थान ढोकानजिकै उभिएकी थिइन् । उनी जापानबाट घर–बिदामा आएका श्रीमान्‌लाई पुनः जापान रोजगारीमा पठाउन विमानस्थलमा बिदा गर्न पुगेकी हुन् ।

उनका श्रीमान् नारायण गुरुङ सात वर्षदेखि जापानमा कार्यरत छन् । तीन महिनाअघि घर आएका गुरुङलाई बिदाइ गर्न छोरासँग विमानस्थल पुगेकी गुरुङको आँखाबाट श्रीमान्‌सँग छुट्नुपरेको पीडा आँसु बनेर झर्दै थियाे । उनकाे आँसु काखमा च्यापेको छोराको शरीरमा झर्दै गरेकाे दृश्य निकै कारुणिक थियाे ।

'सन्तान छ भनेर घरमा बस्न मिल्दैन रहेछ । छोरालाई पढाउन र खुवाउन पैसा चाहिन्छ । त्यही भएर आमाले घरमा छोरो हेर्ने र बुबाले विदेश गएर पैसा कमाउनुपर्ने बाध्यता छ', नानुले भनिन् ।

स्वदेशमा रोजगारी नपाएपछि वैदेशिक रोजगारीमा जानुपर्ने बाध्यता भएको उनले बताइन् । ‘बुबासँग हुर्किने भाग्य नभएपछि यस्तै हो । तीन महिनासम्म बुबासँग खेल्ने बानी भएछ । बाबु विदेश जाँदा त छाेराे छटपटिँदै छ ।’

नानुजस्तै, वैदेशिक रोजगारीमा कतार हिँडेका मोरङ विराटनगरका जीवन अधिकारी पनि आफ्नो ८ वर्षीय छोरालाई विमानस्थलमै सम्झाइरहेका थिए । जीवनलाई छोराले बाबुसँगै कतार जान्छु भनेर जिद्दी गरेपछि ठूलो भएर विदेश जानुपर्छ भन्दै उनी सम्झाउँदै थिए ।

कतार एयरलाइन्समा काम गर्दै आएका जीवन दुई वर्षमा एकपटक घर बिदामा आउने गरेका छन् । 'हिजोदेखि छोराले बुबासँगै जान्छु भनेर पिछा गर्न छाडेको छैन । राति पनि छाडेर जान्छ भनेर समातेर सँगै सुतेको थियाे', जीवन भन्छन् ।

‘वैदेशिक रोजगारीमा लामो समय बस्दा छोरा–छोरीलाई पनि बुबासँग बस्न पाए हुन्थो भन्ने हुन्छ होला । विदेशको रोजगारीका कारण सन्तान र परिवारभन्दा बाहिर बस्नुपरेको छ’, उनले भने ‘रोजगारीको सिलसिलामा विदेशमै लामो समय बस्दा छोरा–छोरीलाई पनि बुबाको माया थोरै हुँदो रहेछ । त्यही भएर केही समय घर बिदामा आउँदा सँगै जान खोजेका हाेलान् । के गर्नु, आफ्नो देशमा केही गर्ने अवस्था छैन ।’

परिवार र छोरा–छोरी भनेर बस्यो भने उनीहरूको भविष्य बिग्रिने उनको भनाइ छ ।

अधिकारी र गुरुङको छोराजस्तै सातवर्षीय छोरोलाई ह्यान्ड क्यारीमा राखेर सोलुखुम्बुकी डोल्मा शेर्पा पनि श्रीमान्‌सँग छुट्टिनुपर्दा आँसु छचल्काउँदै थिइन् । उनका श्रीमान् पेम्पा शेर्पा पोल्यान्डमा सात वर्षदेखि कार्यरत छन् ।

आमा रोएको हेर्दै शेर्पाका छोरा पनि बाबुसँगै जान्न जिद्दी गरिरहेका थिए । हिजोदेखि बुबासँग जान्छु भनेर रोइरहेको छ', शेर्पाले भनिन् ।

‘हिजोसम्म आमा–बुबा र श्रीमतीको मात्र माया हुन्थ्यो । तर, सन्तान भएपछि अरुभन्दा उनीहरूको नै माया धेरै हुन्छ होला । त्यही भएर चार महिना घर बस्दा पनि उहाँले धेरै समय छोरासँगै बिताउनुभयो’, उनले भनिन् । यसैगरी, काठमाडौंका केशव श्रेष्ठ पनि विदेश जानुअगाडि १८ महिनाकी छोरीलाई विमानस्थलमा बोकेर उभिएका थिए । छोरीलाई छाडेर विदेशिन मुस्किल भइरहेको श्रेष्ठ बताउँछन् ।

तोते बोल्ने छोरीले बाबा भनेको सुन्दा विदेश नै नजाऊँजस्तो लाग्ने श्रेष्ठको भनाइ छ । साउदीबाट फर्किएर कतार रोजगारीका लागि हिँडेका श्रेष्ठलाई बिदाइ गर्न श्रीमती आएकी थिइन् ।

विमानस्थलका कर्मचारीहरूका अनुसार बुबा-आमा विदेश जाँदा छोराछोरीहरूकाे चिच्याहट दिनहुँ सुनिने गरेकाे छ । वैदेशिक रोजगारी र अध्ययनका लागि विदेश जानेका संख्या दैनिक बढिरहेको छ । हाल रोजगारीका लागि १ हजार ३ सयभन्दा धेरै नेपाली दैनिक विभिन्न देश जाने गरेको वैदेशिक रोजगार विभागको तथ्यांक छ । अध्ययनका लागि ३ सयभन्दा धेरै विद्यार्थी विदेशीने गरेको शिक्षा मन्त्रालयको वैदेशिक अध्ययन महाशाखाले जनाएको छ ।

प्रकाशित मिति: आइतबार, असार ५, २०७९ ०६:४१