कांग्रेसका ३९ शुभेच्छुक संस्थाले दिए विद्रोहको चेतावनी

A+ A A-

नेपाली कांग्रेसले पार्टी निकटका शुभेच्छुक संस्थालाई नियन्त्रण गर्ने उद्देश्यले नियमावली ल्याएको भन्दै ३९ वटा भ्रातृ संस्थाले पार्टीसँग विद्रोह गरीे सम्बन्ध विच्छेद गर्ने चेतावनी दिएका छन् ।

पार्टी केन्द्रीय कार्य समितिको असारमा बसेको बैठकले विधान नियमावली मस्यौदा समितिद्वारा पेस भएको नियमावली परिमार्जनसहित पारित गर्ने निर्णय गरेपछि शुभेच्छुक संस्थाहरूले पार्टीको निर्देशन र नियन्त्रणमा रहन नसकिने भन्दै विद्रोह गर्नेे चेतावनी दिएका हुन् ।

नेपाल ट्रेड युनियन कांग्रेसका कार्यवाहक सभापति महेन्द्र यादवको नेतृत्वमा बिहीबार नियमावली मस्यौदा समितिका संयोजक र सदस्यसँग भेट्न गएको टोलीले आफ्ना माग पूरा नगरे कांग्रेसप्रतिको शुभेच्छा त्याग्नसमेत पछि नपर्ने चेतावनी दिएका छन् ।

पार्टी सभापति शेरबहादुर देउवा नेतृत्वमा आएपछि भएका शुभेच्छुक संस्थाका सबै महाधिवेशनमा आफू निकटको नेतृत्व नआउँदा र वर्चस्व गुमाउनुपर्दा ती संस्थामा आफ्नो प्रभाव देखाउन पार्टीले हस्तक्षेपकारी नीति नियमावलीमार्फत ल्याउन खोजेको एक केन्द्रीय सदस्यले जनाए ।

नियमावलीमा सबै शुभेच्छुक संस्थालाई ती संस्थाको महाधिवेशन गर्दा वा कार्यसम्पादन गर्ने प्रयोजनका लागि पार्टीले केन्द्रीय प्रतिनिधि पठाउन सक्नेछ र केन्द्रीय प्रतिनिधिसँगको अनिवार्य सल्लाह गरी निर्णयमा पुग्नुपर्ने व्यवस्था गरिएको छ ।

नियमावलीमा राखिएको यस्तो प्रावधानले शुभेच्छुक संस्थाको स्वतन्त्र अस्तित्व र पहिचानलाई समाप्त गरी निर्णय प्रक्रियामा समेत असर गर्ने ट्रेड युनियन कांग्रेसका उपमहासचिव गणेश केसीले बताए ।

नियमावलीमा नेपाली कांग्रेसले अनुशासनको कारबाही गरेको व्यक्तिलाई कुनै भ्रातृ वा शुभेच्छुक संस्थाले त्यस्तो व्यक्तिलाई कारबाही गर्नुपर्ने व्यवस्था छ । शुभेच्छुक संस्थाका हरेक व्यक्तिलाई आचारसंहिता लगाएर र अनुशासनको कारबाहीको दायरामा ल्याउने व्यवस्था नियमावलीमा उल्लेख छ ।

हरेक वर्ष शुभेच्छुक संस्थाले आफ्नो प्रतिवेदन पार्टीमा बुझाउने प्रावधानसमेत अनुपयुक्त भएको भन्दै प्रतिनिधिहरूले चार वर्षमा एकपटक मात्र पार्टीलाई प्रतिवेदन बुझाउनुपर्ने व्यवस्था गर्न माग गरेका छन् ।

‘शुभेच्छुक संस्थालाई पनि भ्रातृ संस्थासरह आन्तरिक काम कारबाहीमा नियन्त्रण गर्ने गरी नियमावली आएको रहेछ,’ ट्रेड युनियन कांग्रेसका उपमहासचिव केसीले शिलापत्रसँग भने, ‘हामी त कानूनअनुसार श्रम कार्यालयमा दर्ता भएका हुन्छौं । हाम्रा आफ्नै सदस्य हुन्छन्, पार्टी सदस्य होइनन् ।’

केसीले ट्रेड युनियन कांग्रेसको आफ्नै सदस्य नभएर विभिन्न संस्थाको संयोजन गरी बनेको संगठन भएको भन्दै कुनै सदस्यलाई कारबाही हामीले गर्न नमिल्ने बताए । उनले भने, ‘कानूनअनुसार दर्ता भएर सञ्चालनमा भएका संस्थालाई पार्टीको निर्देशनअनुसार कारबाही गर्न सकिँदैन ।’

नियमावली मस्यौदा समितिका एक सदस्यका अनुसार शुभेच्छुक संस्थाले पार्टीलाई वैचारिक आधारमा समर्थन गरेको भएकोले कार्यसम्पादनमा निर्देशन नमिल्ने बताए । उनले पार्टी संस्थापन पक्षले बहुमतको आडमा अनिवार्य सल्लाहमा कार्यसम्पादन गर्नु भन्ने प्रावधानले पार्टीलाई नै बदनाम गराउन खोजेको भन्दै चिन्ता व्यक्त गरे ।

पार्टीले विभिन्न पेसा, व्यवसाय गर्ने संघ संस्थाका सदस्यलाई पार्टीप्रतिको शुभेच्छा र आकर्षण बढाउनुको सट्टामा नियन्त्रण गर्न खोजेको भन्दै पार्टीले पारित गर्न लागेको नियमावलीको विषयमा छलफल गर्न ट्रेड युनियन कांग्रेसले शुक्रबार केन्द्रीय कार्यालयमा कांग्रेसका सबै शुभेच्छुक संस्थाका प्रतिनिधिको भेला बोलाएको छ ।

बिहीबार पार्टी केन्द्रीय कार्यालयमा नियमावली मस्यौदा समितिका संयोजक रमेश लेखक, सदस्यहरू प्रदीप पौडेल जीवन परियार, मीन विश्वकर्मा र ईश्वरी न्यौपानेलाई भेटेपछि अन्तिम निर्णयका लागि शुक्रबार सबै शुभेच्छुक संस्थाको भेला बोलाएको हो ।

नेपाल ट्रेड युनियन कांग्रेससँग २९ वटा राष्ट्रिय स्तरका संघसंस्था आबद्ध छन् । तर, कांग्रेस केन्द्रीय कार्यालयको रेकर्डमा २५ वटा मात्र छन् । कांग्रेसले नेपाल ट्रेड युनियन कांग्रेससँग आबद्ध नेपाल शिक्षक संघ, नेपाल प्रेस युनियन र नेपाल सांस्कृतिक संघलाई छुट्टै शुभेच्छुक संस्थाका रूपमा मान्यता दिएको छ ।

यसबाहेक कांग्रेसको शुभेच्छुक संस्थाका रूपमा १४ वटा संस्थाले मान्यता पाएका छन् । अन्तर्राष्ट्रिय श्रमिक संगठनहरूसँग सम्बन्ध राखेका नेपाल ट्रेड युनियन कांग्रेससँग आबद्ध कतिपय संस्थाले कांग्रेसको शुभेच्छुक संस्था हुन आवश्यक नभएको भन्दै यसअघि नै लबिङ गर्दै आएका थिए ।

यी सबै गरेर कांग्रेसका ३९ वटा शुभेच्छुक संस्था छन् । तर, ट्रेड युनियन कांग्रेसले भने आफू मातहत २९ वटा मात्र संस्था आबद्ध रहेको दाबी गर्दै आएको छ ।

नेपाल ट्रेड युनियन कांग्रेसका पूर्वअध्यक्ष लक्ष्मणबहादुर बस्नेत अन्तर्राष्ट्रिय श्रम संगठन (आएएलओ) को गभर्नमेन्ट बडीको सदस्य हुने पहिलो नेपाली नागरिक हुन् ।

२९ वटा राष्ट्रिय स्तरका संगठन आबद्ध नेपाल ट्रेड युनियन कांग्रेसको ५० सदस्यीय कार्यसमितिमा निवर्तमान अध्यक्ष खिलानाथ दाहाल र निर्वाचित केन्द्रीय सदस्य धु्रवचन्द्र गौतमबाहेक कार्यसमितिका सबै सदस्य पार्टी सभापति शेरबहादुुर देउवाइतरका छन् ।

पार्टीको संस्थापन पक्षले तीन वर्षयता गरेका भ्रातृ संस्थामा समेत आफ्नो बहुमत (नेपाल महिला संघबाहेक) नभएपछि भ्रातृ संस्थालाई पार्टी केन्द्रीय प्रतिनिधिमार्फत नियन्त्रण गर्ने उद्देश्य राखेको भन्दै केही केन्द्रीय सदस्यले असन्तुष्टि जनाएका छन् ।

उपसभापति विमलेन्द्र निधि, केन्द्रीय सहमहामन्त्री डा. प्रकाशशरण महत र केन्द्रीय सदस्य वीरबहादुर बलायरको डिजाइनमा नियमावलीमा त्यस्तै प्रावधान राखिएको एक केन्द्रीय सदस्यले बताए ।

यी हुन् कांग्रेसका ट्रेड युनियनमा आबद्ध शुभेच्छुक संस्था

नेपाल ट्रेड युनियन कांग्रेस
नेपाल शिक्षक संघ
नेपाल निजामती कर्मचारी युनियन (संघ)
नेपाल सांस्कृतिक संघ
नेपाल लोकतान्त्रिक वैदेशिक रोजगार व्यवसायी फोरम
प्रशासन, व्यवस्थापन र विकास केन्द्र
नेपाल लोकतान्त्रिक शेर्पा संघ
नेपाल गैरसरकारी संस्था महासंघ
प्रजातन्त्रवादी प्राध्यापक संघ, नेपाल
नेपाल डेमोक्रेटिक लयर्स एसोसिएसन
सेन्टर फर डेमोक्रेटिक इन्जिनियर्स नेपाल
प्रजातन्त्रवादी चिकित्सक संघ
नेपाल प्रेस युनियन
त्रिभुवन विश्वविद्यालय प्रजातन्त्रवादी कर्मचारी संघ

नेपाल ट्रेड युनियन कांग्रेस
नेपाल शिक्षक संघ
नेपाल कारखाना श्रमिक संघ
नेपाल निर्माण तथा सम्बद्ध श्रमिक संघ
नेपाल कृषि श्रमिक संघ
नेपाल पर्यटन तथा होटल सम्बद्ध श्रमिक संघ
नेपाल सार्वजनिक सेवा कर्मचारी संघ
नेपाल इम्ब्रोइडरी, हेन्डिक्राफ्ट तथा सिलाइ बुनाइ श्रमिक संघ
नेपाल चिया वगान श्रमिक संघ
नेपाल वित्तीय संस्था कर्मचारी संघ
नेपाल नाई संघ
नेपाल भन्सार तथा विमानस्थल सम्बद्ध श्रमिक संघ
नेपाल स्वास्थ्यकर्मी संघ
नेपाल गलैंचा श्रमिक संघ
नेपाल यातायात मजदुर संघ
नेपाल गार्मेन्ट मजदुर संघ
नेपाल ब्युटिसियन संघ
नेपाल छापाखाना तथा सम्बद्ध श्रमिक संघ
नेपाल व्यापार तथा सम्बद्ध श्रमिक संघ
नेपाल प्रेस युनियन
नेपाल गृह श्रमिक संघ
नेपाल रिक्सा तथा ठेला श्रमिक संघ
नेपाल चलचित्र श्रमिक संघ
नेपाल भारवाहक श्रमिक संघ
नेपाल सांस्कृतिक तथा कलाकर्मी संघ
नेपाल राष्ट्रिय सुरक्षा गार्ड श्रमिक संघ