कुलेखानी–भिमफेदी सुरुङलाई औचित्यहीन भनेर बल्खु–हेटौंडा सुरुङमार्गको अध्ययन

कुलेखानी–भिमफेदी सुरुङलाई औचित्यहीन भनेर बल्खु–हेटौंडा सुरुङमार्गको अध्ययन

A+ A A-

११ कात्तिकमा बागमती प्रदेशको मुख्यमन्त्री नियुक्त हुनासाथ राजेन्द्रप्रसाद पाण्डेले कुलेखानी–भीमफेदी सुरुङमार्गको काम रोके ।

हेटौँडा र कुलेखानीबाट थोरै नजिक फाष्ट ट्रयाक जोडिने र हेटौँडा–काठमाडौं जोड्ने छोटो मार्गलाई स्तरोन्नति गरिने भएपछि कुलेखानी–भीमफेदी सुरुङमार्ग औचित्यहीन भएको टिप्पणी मुख्यमन्त्री पाण्डेले दिएका थिए । पाण्डे मात्र नभई प्रदेशका आर्थिक मामिला तथा योजनामन्त्री शालिकराम जम्मकट्टेलले पनि कुलेखानी–भीमफेदी सुरुङमार्ग आवश्यक नरहेको बताएका थिए ।

प्रदेशसभाको दोस्रो ठूलो दल नेकपा माओवादी केन्द्रले भीमफेदी–कुलेखानीमा नाम जोडिएको भन्दै पोष्टबहादुर बोगटीको नाम हटाउनसमेत तत्कालीन सरकारलाई ज्ञापनपत्र बुझाए । वर्तमान गठबन्धन सरकारले प्रदेशको स्रोतले मात्रै सुरुङमार्ग निर्माण गर्न नसक्ने भन्दै कुलेखानी–भीमफेदी सुरुङमार्ग योजना रोकेका थिए ।

तर, गठबन्धन सरकारले आगामी आर्थिक वर्ष २०७९/८० का लागि बजेट प्रस्तुत गर्दै प्रदेशभित्र दुई स्थानमा सुरुङमार्ग निर्माणका लागि अध्ययन गर्न बजेट छुट्याएको छ । सरकारले बल्खु–हेटौँडा सुरुङमार्गको अध्ययन गरिने बजेट भाषणमा उल्लेख गरेको छ । यसैगरी सिन्धुलीको खुर्कोट–चियाबारी सुरुमार्गको पनि अध्ययन गरिने जनाइएको छ ।

आर्थिक मामिला तथा योजनामन्त्री जम्मकट्टेलले यी दुई सुरुङमार्गसँगै अन्य सुरुङमार्गको पनि आवश्यक अध्ययन गर्न बजेट विनियोजन गरिएको बताएका हुन् ।

सुरुङमार्गको अध्ययन संघ, स्थानीय तह र निजी क्षेत्रको साझेदारीमा गरिने बजेट भाषणमा उल्लेख छ । बजेट भाषणमा सबै सुरुङमार्ग योजनाको नाम उल्लेख नभए पनि करिब पाँच वटा सुरुङमार्ग योजनाबारे यसअघि मन्त्री जम्मकट्टेलले सार्वजनिक रूपमै घोषणा गरेका थिए । अघिल्लो सरकारले सम्भाव्यता अध्ययन सकेर ग्लोबल टेण्डरको प्रक्रियामा रहेको कुलेखानी–भीमफेदी सुरुङमार्ग रोकेको गठबन्धन सरकारले दुईभन्दा बढी सुरुङमार्गको अध्ययन गर्न बजेट थालेको हो ।

प्रकाशित मिति: बुधबार, असार १, २०७९ २०:४६