गुण्डा नाइके समीरमानलाई भेट्न जेल पुगेका डीएसपी केसीमाथि प्रहरीले थाल्यो छानबिन

गुण्डा नाइके समीरमानलाई भेट्न जेल पुगेका डीएसपी केसीमाथि प्रहरीले थाल्यो छानबिन

समीरमानसिंह बस्नेत ।

A+ A A-

गुण्डा नाइके समीरमानसिंह बस्नेतलाई भेट्न जेल पुगेको खुलेपछि प्रहरी वृत्त स्वयम्भूका प्रमुख प्रहरी नायब उपरीक्षक (डीएसपी) मिलन केसीमाथि प्रहरीले छानबिन सुरु गरेको छ ।

गुन्डा नाइके बस्नेतलाई भेट्न जेलभित्र पुगेको खुलेपछि काठमाडौं प्रहरी परिसरले डीएसपी केसीमाथि आन्तरिक छानबिन थालेको हो । निर्माण व्यवसायी संघका तत्कालीन अध्यक्ष शरदकुमार गौचनको हत्या आरोपमा पुर्पक्षका लागि जेल चलान भएका बस्नेतलाई भेट्न डीएसपी केसी आइतबार सुन्धारा कारागार पुगेको प्रहरीको उच्च स्रोतले जनाएको छ ।

प्रहरी स्रोतका अनुसार डीएसपी केसी अर्का गुण्डा नाइके अमृत केसीलाई लिएर कारागार पुगेका थिए । काठमाडौं प्रहरी प्रमुख वरिष्ठ प्रहरी उपरीक्षक (एसएसपी) सुदीप गिरीले भने डीएसपी केसीले गुण्डा नाइकेलाई भेटेकोबारे आफूले जानकारी लिइरहेको बताए ।

‘यो विषयमा म अहिले केही पनि बोल्दिनँ, कुरा के हो बुझ्दैछु,’ एसएसपी गिरीले शिलापत्रसँग भने । जेलमा रहेका गुण्डा नाइकेबारे केही अनुसन्धान र सोधपुछ गर्न जेलभित्र प्रहरी अधिकारी जानुलाई सामान्य विषय मानिए पनि उनी गोप्य रूपमा कारागार पुगेका हुन् ।

प्रहरीको कुनै पनि माथिल्लो निकायलाई रिपोर्टिङ नै नगरी कारागार पुगेको खुलेपछि डीएसपी केसीमाथि काठमाडौं प्रहरी परिसरले सोधपुछसमेत गरिसकेको स्रोतको दाबी छ । सोधपुछका क्रममा डीएसपी केसी कारागार पुगेको पुष्टि भएपछि विभागीय कारबाहीको प्रक्रिया अगाडि बढाउने तयारी काठमाडौं प्रहरीको छ ।

गौचन हत्याका मुख्य योजनाकार बस्नेतले कारागारभित्रैबाट पछिल्लो समय विभिन्न आपराधिक गतिविधि सञ्चालन गर्दै आएका छन् । एक वर्षअघि बस्नेत समूहको नाम लिएर प्राइभेट नम्बरबाट फोन गरेर धम्क्याउँदै निर्माण व्यवसायीहरूसँग मोटो रकम माग्ने गरेको खुलेको थियो । सो प्रकरणबारे प्रहरीको केन्द्रीय अनुसन्धान ब्युरो (सीआईबी) र तत्कालीन महानगरीय प्रहरी अपराध महाशाखाले अनुसन्धान नै गर्नुपरेको थियो ।

निर्माण व्यवसायीलाई धम्क्याउँदै फिरौती रकम उठाउने गतिविधिमा तत्कालीन गृहमन्त्री रामबहादुर थापाका भाइ नरेश थापासहितको भूमिका शंकास्पद देखिएको थियो र थापासिहत ८ जनालाई प्रहरीले पुर्पक्षका लागि जेल चलानसमेत गरेको थियो । तीमध्ये थापा भने जेलमुक्त भइसकेका छन् । उनीहरू कारागारभित्र कार्यरत प्रहरी जवानको मिलोमतोमा बस्नेतलाई भेट्न पटक-पटक कारागार पुगेको खुलेको थियो ।

२३ असोज २०७४ मा आफूले मागेको साढे २ करोड रुपैयाँ रकम नदिएको भन्दै समीरको निर्देशनमा गौचनको हत्या भएको थियो । समीर १७ मंसिर २०७४ मा पक्राउ परेका हुन् । यसअघि समीरलाई नख्खु कारागारबाट मुस्ताङ कारागार पठाउन लागिएको थियो । तर, उनकी श्रीमती माया शेरचनले प्रहरीले इन्काउटर गर्न मुस्ताङ सरुवा गरेको भन्दै सर्वोच्च अदालतमा निवेदन दिएपछि उनलाई फेरि सुन्धारा कारागारमा ल्याएर राखिएको थियो । पछिल्लो समय काठमाडौं प्रहरीका विभिन्न वृत्तमा रहेका प्रमुखमाथि आपराधिक गतिविधिमा संलग्न गुण्डा नाइकेसँगको उठबस बाक्लिएको आरोप लाग्न थालेको छ ।

एक साताअघि दरबारमार्गको ‘प्लाटिनम डिस्को’ मा बालुवाटारका प्रतीकभाष्कर सिंहमाथि आपराधिक गतिविधिमा संलग्न हुँदै आएका काभ्रेको भुम्लु गाउँपालिकाका डलर लामा, नमोबुद्ध नगरपालिकाका सञ्जय लामा, रोशी गाउँपालिकाका कुलध्वज लामासहितको १० जनाको समूहले कुटपिट गरेका थिए । कुटपिटमा संलग्न उनीहरू गुण्डा नाइके दावा लामा समूहका सदस्य हुन् । दावा भने अहिले कांग्रेसको राजनीतिमा सक्रिय छन् ।

प्रकाशित मिति: मंगलबार, जेठ ३१, २०७९ १६:५४