मलेसिया जाने कामदारको स्वास्थ्य परीक्षण गर्न मेडिकलले मागे बाबुको फोटो र नागरिकता

मलेसिया जाने कामदारको स्वास्थ्य परीक्षण गर्न मेडिकलले मागे बाबुको फोटो र नागरिकता

A+ A A-

मलेसिया जाने नेपाली कामदारको स्वास्थ्य परीक्षण गर्न मेडिकल संस्थाहरूले बाबुको फोटो र नोटरी गरिएको नागरिकताको फोटोकपी मागेका छन् । भिसा लागेपछि मेडिकल गर्दा बाबुको फोटो र नोटरी गरिएको नागरिकताको फोटोकपी मागिएपछि आफूहरू समस्यामा परेको श्रमिकहरूको गुनासो छ ।

म्यानपावर व्यवसायीले नै यसलाई मलेसिया सरकारसँग भएको श्रम सम्झौताविपरीत रहेको बताउँछन् । कामदारको मेडिकल गर्दा परिवारको फोटो र नागरिताको नोटरी मागेर श्रमिकलाई दुःख दिइएको म्यानपावर व्यवसायी लक्ष्मण पौडेलले बताए ।

मलेसिया जाने कामदारको अन्तिम भिसा लागेपछि श्रमिकको मात्र स्वास्थ्य परीक्षण गर्नुपर्ने श्रम सम्झौतामा उल्लेख छ । तर, मलेसिया जाने कामदारको स्वास्थ्य परीक्षण गर्दै आएका ३८ वठा संस्थाले मंगलबारदेखि स्वास्थ्य परीक्षण गर्न पुगेका कामदारका बाबुको फोटोसहित नागरिताको नोटरी समेत मागेका छन् ।

मंगलबार स्वास्थ्य परीक्षण गर्न पुगेका कामदारसँग मेडिकलले बाबुको नागरिता र फोटोको नोटरी मागेको विषय सम्बन्धित श्रम, रोजगार तथा सामाजिक सुरक्षा मन्त्रालयलाई भने जानकारी छैन ।

मलेसियासँग भएको श्रम सम्झौतामा कामदारको भिसा नम्बरका आधारमा मात्र मेडिकल गर्नुपर्ने व्यवस्था छ । स्वास्थ्य परीक्षण गर्दा कामदारका बाबुको फोटो र नागरिताको नोटरी चाहिने विषयमा जानकारी नभएको श्रम मन्त्रालयका प्रवक्ता डण्डुराज घिमिरेले शिलापत्रलाई बताए । यो विषयमा सम्बन्धित पक्ष र निकायसँग बुझ्ने उनको भनाइ छ ।

यो विषयमा जानकारी लिन खोज्दा मलेसिया जाने कामदारको मेडिकल गर्ने नेतृत्व गरिरहेका कैलाश खड्का सम्पर्कमा आएनन् ।

दैनिक ५ हजारभन्दा धेरै कामदारले मलेसिया जाने मेडिकल गरिरहेको म्यानपावर व्यवसायीहरूले जानकारी दिएका छन् । मलेसियाको रोजगारी खुलेसँगै दैनिक ५ सयभन्दा धेरै नेपाली कामदार जान थालेका छन् ।

प्रकाशित मिति: मंगलबार, जेठ ३१, २०७९ १४:३०